დიდი ათი. ხუთი ტურით ადრე ყველგან დაძაბულობაა

საქართველოს ჩემპიონატის რეგულარული გათამაშების დასრულებამდე ხუთი ტური დარჩა. პლეი ოფში გასვლისთვის ერთბაშად რვა გუნდი იბრძვის. არანაკლებ გამძაფრდა ბრძოლა უმაღლეს ლიგაში დარჩენისთვისაც, რაც აუტსაიდერის თბილისის „არმიას“ ბოლო ტურებში მიღწეულმა გამარჯვებებმა გამოიწვია.

მე-14 ტურს ქუთაისში „აიასა“ და თბილისის „ლელოს“ დაპირისპირება გახსნის. ლელოელებმა ბოლო ორ ტურში ზედიზედ ორი მარცხი იწვნიეს და საპლეიოფო ექვსეულს ოდნავ დაშორდნენ. მათი მდგომარეობა კიდევ უფრო გაუარესდება თუ „აიასთან“ კიდევ ერთ მარცხს იგემებენ. ბოლო ტურებში ვერც ქუთათურები ყოჩაღობენ, რაც ასევე აისახა მათ სატურნირო მდგომარეობაზე. ერთი სიტყვით ორივე გუნდს აუცილებლად გამარჯვება სჭირდება და მატჩი წესით უკიდურესად დაძაბული უნდა გამოდგეს.

დღესვე ითამაშებს შინ გათამაშების ლიდერ „ბათუმთან“ გორის „ჯიქი“, რომელმაც ჩემპიონატი რთულად დაიწყო. თუმცა, მას შემდეგ, რაც გუნდი ფრანგმა მწვრთნელმა დატოვა, გორულმა გუნდმა ნელ-ნელა თამაშის ხარისხი გამოასწორა და ახლა კარგი შანსი აქვს პლეი ოფში გავიდეს, რაც მედლებისთვის ბრძოლის საშუალებას მისცემს. „ბათუმი“ კი დამაჯერებლად ლიდერობს და ამ გუნდის მიზანი, ცხადია, მხოლოდ ჩემპიონობაა.

გათამაშების დებიუტანტი პატარძეულის „ვეფხვები“ უმაღლეს ლიგაში დარჩენისთვის იბრძვის. მისი მეტოქე საშინაო მატჩში მარნეულის „არმაზი“ იქნება, რომელსაც პლეი ოფში მოხვედრის კარგი შანსი აქვს და დიდი მიხვედრა არ სჭირდება იმას, რამდენად რთული შეხვედრა ელის ორივე გუნდს.

ტურის ცენტრალური შეხვედრა გაიმართება თბილისში, სადაც ქვეყნის მოქმედი ჩემპიონი „ლოკომოტივი“, რომელიც მეორე ადგილზეა, მესამეადგილოსან რუსთავის „ხარებს“ შეხვდება. რუსთავული გუნდი წლეულს შესანიშნავად ასპარეზობს და რკინიგზელებთან გამარჯვების შემთხვევაში სატურნირო ცხრილში გადაუსწრებს.

კიდევ ერთი აუტსაიდერი თბილისის „არმია“ თანაქალაქურ „აკადემიას“ შეხვდება. ორივე გუნდი ბოლო ტურებში ბრწყინვალედ ასპარეზობს. აკადემიელებს შანსიც კი გაუჩნდათ პლეი ოფში მოხვდეს. „არმიას“ კი შესაძლებლობა მიეცა უძლიერესთა შორის დარჩენისთვის იბრძოლოს.

ხუთშაბათი. 21 თებერვალი
აია-ლელო 15:00
ჯიქი-ბათუმი 17:00

პარასკევი. 22 თებერვალი
ვეფხვები-არმაზი 15:00
ლოკომოტივი-ხარები 17:00

კვირა. 24 თებერვალი
არმია-აკადემია 14:30

თ მ ფ წ ბ ქ(ს)
1. ბათუმი 13 11 0 2 +154 50(6)
2. ლოკომოტივი 13 9 0 4 +112 43(7)
3. ხარები 13 9 1 3 +59 42(4)
4. აია 13 7 1 5 +17 32(2)
5. ჯიქი 13 5 1 7 +8 30(8)
6. არმაზი 13 5 1 7 +39 29(7)
7. ლელო 13 6 0 7 -10 28(4)
8. აკადემია 13 5 1 7 -116 24(2)
9. ვეფხვები 13 2 1 10 -126 16(6)
10. არმია 13 3 0 10 -137 16(4)

ყოველდღიური სპორტული გაზეთი "ლელო"
674
მკითხველის კომენტარები / 0 /
მსგავსი ამბები
რუბრიკის სხვა სიახლეები
;