დიდი ათი. I ტურის მიმოხილვა: ფავორიტებმა გამარჯვებით დაიწყეს 

საქართველოს ჩემპიონატის პირველ ტურში ანგარიშში დიდი სხვაობა მხოლოდ ერთ შეხვედრაში დაფიქსირდა. თუმცა, ვერაფრით ვიტყვით, რომ იმ მატჩშიც გამარჯვებულს დიდი უპირატესობა ჰქონდა. ყველა დანარჩენ შეხვედრებში ბრძოლა ბოლო წუთამდე იყო. 

იუნკერები-ბათუმი 12:16
იუნკრები: 4ს - ხარაზიშვილი 
სინბინი: ზაბახიძე
ბათუმი: ლ, გ, 3ს - ნინიძე
სინბინი: ფუტკარაძე, წიკლაური
მსაჯი: შოთა თევზაძე

ჩემპიონისა და უმაღლესი ლიგის დებიუტანტის შეხვედრა დაძაბული გამოდგა. კიკეთის „იუნკერებმა“ დალაგებული, თამამი გადაწყვეტილებებით გაჯერებული თამაში აჩვენეს და სატურნირო ცხრილში პირველი ქულა მიითვალეს. კიკეთელებმა მეტოქეს პირველი ტაიმი 9:6 მოუგეს, თუმცა „ბათუმის“ სათამაშო კლასმა თავისი გაიტანა და დებიუტანტი 12:16 დამარცხდა. ბათუმელებს ყველა ქულა მამუკა ნინიძემ მოუტანა. 

ლელო-აია 13:34
ლელო: ლ - ტაბუცაძე. 2ს, გ - ყიასაშვილი
აია: 4ლ - მ. ბაბუნაშვილი (2), წიკლაური, აბრაიძე. 4გ, 2ს - გ. ბაბუნაშვილი. 
სინბინი: გოგიაშვილი
მსაჯი: ნიკა ამაშუკელი 

„ლელოსა“ და „აიას“ დაპირისპირება ბოლო წლებში ტრადიციულად, საინტერესო ბრძოლაში მიმდინარეობს. მასპინძლები ტერიტორიულ და სათამაშო უპირატესობას ფლობდნენ. თუმცა, ქუთათურების სასახელოდ უნდა ითქვას, რომ თითქმის ყველა შანსი გამოიყენეს და მეტოქეს სოლიდური სხვაობით სძლიეს. ორივე ლელო „აიას“ მეორეხაზელმა მიხეილ ბაბუნაშვილმა გაიტანა. გიორგი ბაბუნაშვილის ანგარიშზე კი ოთხი გარდასახვა და ორი საჯარიმოა. „აიამ“ საპრემიო ქულაც მიიღო. 

აკადემია-არმაზი 14:10
აკადემია: ლ - ახობაძე. 3ს - მიქანძე
სინბინი: კალანდარიშვილი
არმაზი: ლ - კოხია. ს, გ - ნიკოლავა 
სინბინი: კალმახელიძე, ამირანაშვილი
მსაჯი: საბა აბულაშვილი 

საქართველოს ჩემპიონატის ბრინჯაოს პრიზიორი მარნეულის „არმაზი“ სეზონის წინ მორაგბეთა უმრავლესობამ დატოვა. ცხადია, არმაზელები ამან დაასუსტა. თუმცა, „აკადემიას“ მაინც დიდი წინააღმდეგობა გაუწია და მატჩის მოგებაც შეეძლო. საბოლოოდ, აკადემიელებმა პირველი გამარჯვების მოპოვება შეძლეს. „არმაზს“ კი წილად ერთი საპრემიო ქულა ერგო. 

ჯიქი-ლოკომოტივი 17:8
ჯიქი: 2ლ - ივანიშვილი, ყურაშვილი. 2გ, ს - ჯინჭველაშვილი 
სინბინი: კაკაურიძე, წიკლაური, კალანდძე
გაძევება: კალანდაძე
ლოკომოტივი: ლ - ბებიაშვილი. ს - გულიტაშვილი
სინბინი: დარასელია
მსაჯი: თორნიკე გვირჯიშვილი 

სეზონის წინ ქვეყნის მრავალგზის ჩემპიონმა თბილისის „ლოკომოტივმაც“ ბევრი წამყვანი მოთამაშე დაკარგა. „ჯიქებთან“ გასვლით მატჩში რკინიგზელები ძირითადად რიცხობრივ უმრავლესობაში იყვნენ. მატჩის არბიტრმა საწყის 20 წუთში ზედიზედ სამი გორელი გაასინბინა. 58-ე წუთზე კი „ჯიქის“ უკანახაზელი დიმიტრი კალანდაძე წითელი ბარათით გააძევა. „ლოკომოტივმა“ ყოველივე აქედან მხოლოდ რვა ქულა იხეირა. „ჯიქმა“ კი, უმცირესობაში დარჩენილმა, უკეთ ითამაშა და დასკვნით რვა წუთში ორი ლელო და გამარჯვება მიითვალა. 

ყოჩები-ხარები 30:25
ყოჩები: 3ლ - წიკლაური, ხარშილაძე, საჯარიმო. 3ს, 2გ - სოხაძე. 
სინბინი: ხიდეშელი, კორკელია
ხარები: 3ლ - ბასილაია (2), თაბუკაშვილი. 2ს, 2გ - ხუციშვილი. 
სინბინი: მელიქიშვილი, ხაბაშვილი
მსაჯი: სულხან ჩიხლაძე

უმაღლეს ლიგაში დაბრუნებულმა ბოლნისის „ყოჩებმა“ პირველივე ტურში გაიმარჯვა. ბოლნისურმა გუნდმა რამდენიმე თავისი გაზრდილი მორაგბე დაიბრუნდა და საკმაოდ სოლიდური გუნდია. ამჯერად, მეტოქე ვერცხლის მედლების მფლობელი რუსთავის „ხარები“ იყო. ორივე გუნდმა სამ-სამი ლელო მიითვალა. თუმცა, „ყოჩების“ დამრტყმელი თემურ სოხაძე რუსთაველთა ცხრა ნომერზე ვაჟა ხუციშვილზე უკეთ გაისარჯა. „ხარებმა“ ერთი საპრემიო ქულის მოპოვება შეძლეს. 

II ტური

20 სექტემბერი
იუნკერები-აია

21 სექტემბერი
არმაზი-ჯიქი
ბათუმი-ყოჩები

22 სექტემბერი 
ხარები-აკადემია
ლოკომოტივი-ლელო 

ყოველდღიური სპორტული გაზეთი "ლელო"
255
მკითხველის კომენტარები / 0 /
მსგავსი ამბები
რუბრიკის სხვა სიახლეები
;