დიდი ათი. IV ტურის წინ: ორი წაუგებელი და ორი მოუგებელი

საქართველოს ჩემპიონატის მე-4 ტურის წინ დაუმარცხებელი ორი გუნდი დარჩა. ესენია: ქუთაისის "აია" და თბილისის "ლოკომოტივი".

მოგებათა გრაფაში ისევ ნულები უწერიათ თბილისურ გუნდებს "არმიას" და "აკადემიას". შესაძლებელია თუ არა ამ მოცემულობის დარღვევა, მეოთხე ტურის ბატალიები გვიჩვენებს.

მე-4 ტური "ბათუმისა" და პატარძეულის "ვეფხვების" მატჩით გაიხსნება. ეს შეხვედრა პატარძეულში უნდა გამართულიყო, მაგრამ სტადიონის მოწესრიგება ვერ მოესწრო და პირველ წრეში მასპინძელი "ბათუმი" იქნება.

ზღვისპირელებმა დაამტკიცეს, რომ რუსთაველებთან "ჩავარდნა" შემთხვევითობა იყო. თუმცა, არც "ვეფხვებია" ის გუნდი, მასპინძლებს რაიმე დაუთმოს. არადა, ბათუმს გაცილებით მეტი პოტენციალი გააჩნია, ვიდრე ამას დღემდე ავლენს.

ტურის ცენტრალური მატჩი ქუთაისში გაიმართება, სადაც გათამაშების ლიდერი "აია" მესამეადგილოსან რუსთავის "ხარებს" უმასპინძლებს. ქუთათურებმა რიხით დაიწყეს, მაგრამ მეორე და მესამე ტურებში გამარჯვებას მხოლოდ დაძაბული ბრძოლების შედეგად მიაღწიეს. აღსანიშნავია, რომ ორივე შეხვედრაში "აია" მარცხდებოდა, მაგრამ მაინც გაიმარჯვა. საინტერესოა, შეძლებს თუ არა ლიდერთა მარაქაში გარეული რუსთავის "ხარები" კიდევ ერთი სენსაციის შემოთავაზებას. რუსთაველების ბათუმში გამარჯვებაც არავის სჯეროდა.

გორის "ჯიქმა" სამი თამაშიდან მხოლოდ ერთი მოიგო და ისიც თავის მოედანზე. ამჯერად გორელები "ლელოს" მასპინძლობენ, რომელიც მათთვის ყოველთვის უხერხულ მეტოქედ ითვლებიდა. "ჯიქის" რეალურ ძალაზე ლაპარაკი ცოტა ძნელია. "ლელოსთან" მატჩი გამოაჩენს, ექნებათ თუ არა გორელებს ისეთივე ამბიციები, როგორიც უახლოეს გასულ წლებში.

"ლელო" ზედიზედ ორჯერ იშვიათად აგებს.

მარნეულის "არმაზი" სტუმრად თამაშობს ბოლო ადგილზე მყოფ "არმიასთან". არმაზელები სეზონის დასაწყისში საკმაოდ სოლიდურად გამოიყურებიან. მათ რეალურად შესწევთ ძალა, მოწინავე ექვსეულში მოხვედრისა და პლეი ოფში თამაშისთვის იბრძოლონ. "არმიამ" სამი თამაშიდან სამივე წააგო.

საქართველოს ჩემპიონი "ლოკომოტივი", რომელიც ჯერაც დაუმარცხებელია, თბილისის "აკადემიას" შეხვდება. აკადემიელებმა "არმიას" მსგავსად, ყველა თამაში წააგეს და, როგორც ჩანს, ერთ-ერთი იმ გუნდთაგანი იქნება, რომელიც უმაღლეს ლიგაში დასარჩენად იბრძოლებს. "ლოკომოტივი" ამ დაპირისპირებაში უდავო ფავორიტია.

21 სექტემბერი
ბათუმი- ვეფხვები

22 სექტემბერი
ჯიქი-ლელო
აია-ხარები

23 სექტემბერი
არმია-არმაზი
ლოკომოტივი-აკადემია

თ მ ფ წ ბ ქ(ს)
1. აია 3 3 0 0 +52 13(1)
2. ლოკომოტივი 3 3 0 0 +40 13(1)
3. ხარები 3 2 0 1 +28 10(1)
4. ბათუმი 3 2 0 1 +45 10(2)
5. ლელო 3 2 0 1 -7 8(0)
6. არმაზი 3 1 0 2 +17 6(2)
7. ვეფხვები 3 1 0 2 -24 5(1)
8. ჯიქი 3 1 0 2 -32 5(1)
9. აკადემია 3 0 0 3 -59 1(1)
10. არმია 3 0 0 3 -60 1(1)

ყოველდღიური სპორტული გაზეთი "ლელო"
222
მკითხველის კომენტარები / 0 /
მსგავსი ამბები
რუბრიკის სხვა სიახლეები