დიდი ათი. VII ტურის წინ. შეიცვლება ლიდერი? - ცენტრალური მატჩი ბათუმში

საქართველოს ჩემპიონატის მე-7 ტურის გამართვა უმაღლეს ლიგაში 26-27 ოქტომბერს იყო დაგეგმილი, რადგან, წესით, ამ უქმეებზე თბილისის "ლოკომოტივს" კონტინენტის ფარზე უნდა ეთამაშა.

თუმცა, რადგან ამ შეჯიბრებაში მონაწილე გუნდების რაოდენობა შემცირდა, რამაც მატჩების რაოდენობის შემცირებაც გამოიწვია, კალენდარში ცარიელი ფანჯარა გაჩნდა და საქართველოს რაგბის კავშირის საშეჯიბრო კომიტეტმა მე-7 ტურის ოთხი მატჩის გამართვა ამ უქმეებზე გადაწყვიტა.

ტურის ცენტრალური მატჩი ბათუმში გაიმართება, სადაც გათამაშების ლიდერი "ბათუმი" უახლოეს მდევარ თბილისის "ლოკომოტივს" უმასპინძლებს. ორივე გუნდმა განვლილ ექვს ტურში ხუთი თამაში მოიგო და მხოლოდ ერთში დამარცხდა. ბათუმელები რკინიგზელებს ერთი ქულით იმიტომ უსწრებენ, რომ ერთით მეტის საპრემიო ქულა აქვთ აღებული.

"ლოკომოტივს" გასულ უქმეებზე საკმაოდ მძიმე მატჩი ჰქონდა "კონტინენტის ფარზე", რომელშიც იტალიურ "კალვიზანოსთან" დამარცხდა. გუნდს საკადრო პრობლემები აქვს. დაშავებულია რამდენიმე წამყვანი მოთამაშე და, ფაქტობრივად, ნომინალური მგეზავის გარეშე უწევს თამაში. რასაც ნამდვილად ვერ ვიტყვით "ბათუმზე", რომელსაც ტრავმირებული გიორგი თხილაიშვილი და სანდრო ქოიავა უკვე დაუბრუნდნენ. ზღვისპირელები თამაშიდან თამაშამდე უმატებენ და თუ "ლოკომოტივს" შინ გაწბილებულს გაისტუმრებენ, ნამდვილად არ იქნება გასაკვირი. ერთი სიტყვით, შესაძლოა, ლიდერი უცვლელი დარჩეს ან პირიქით.

არანაკლებ დაძაბული და საინტერესო ბრძოლა გაიმართება რუსთავში, სადაც მეოთხე ადგილზე მყოფი "ხარები" მესამეადგილოსან მარნეულის "არმაზს" უმასპინძლებენ. რუსთაველებმა მეექვსე ტურში საკუთარ მოედანზე მოულოდნელად, წააგეს აუტსაიდერთან, თბილისის "არმიასთან". გადაჭრით იმის თქმა, რომ "ხარებმა" აქამდე მაქსიმუმი გააკეთა და ახლა კრიზისი დაეწყო, ძნელია. თუმცა, გამორიცხული არაფერია და ეს "არმაზთან" დაპირისპირებამ უნდა გაარკვიოს.
"არმაზი" კი, ნამდვილად წლევანდელი სეზონის აღმოჩენაა. გუნდში მრავლად არიან საქართველოს სხვადასხვა ასაკობრივი ნაკრებების მოთამაშეები, რამაც გუნდის თამაში უფრო თანამედროვე და ეფექტური გახადა. არ უნდა დავივიწყოთ "არმაზის" მწვრთნელების ნაყოფიერი გარჯაც.

მეშვიდე ტურმა სატურნირო ცხრილის კიდევ ორი მეზეობელი დააწყვილა. გორის "ჯიქი", რომელიც ამჯერად მე-7 ადგილზეა, მეექვსეადგილოსან ქუთაისის "აიას" უმასპინძლებს, რომელსაც სამი ქულით ჩამორჩება. ცხადია, გამარჯვების შემთხვევაში გორელები მეტოქეს გაუსწრებენ და საპლეიოფო ექვსეულში შეაღწევენ. ცნობილია, რომ "ჯიქს" მწვრთნელთა ახალი შტაბი ჰყავს, რომელმაც ჯერ კიდევ ვერ შეძლო გუნდში სხვა სათამაშო ტაქტიკის სრულყოფილად დანერგვა, რამაც გორელთა გუნდს ჩემპიონატის სტარტზე პრობლემები შეუქმნა.

"აიას" ბოლოდროინდელი ჩავარდნა კი, მართლაც რომ საოცარია. ქუთათურებმა ზედიზედ სამ მოგებას, ზედიზედ სამი წაგება მოუნაცვლეს. ძნელი სათქმელია, რა დაემართა ახალგაზრდა, ნიჭიერი მორაგბეებით დაკომპლექტებულ "აიას".

თბილისის "ლელო", რომელიც წინა ტურში მოქმედ ჩემპიონ "ლოკომოტივთან" მინიმალური სხვაობით დამარცხდა, ამჯერად გათამაშების აუტსაიდერ "არმიას" უმასპინძლებს. არმიელებმა პირველი გამარჯვება მიმდინარე სეზონში გასულ ტურში რუსთავში მოიპოვეს. უნდა ვივარაუდოთ, რომ გუნდმა კრიზისი დასძლია და "ლელოს" სერიოზულ პრობლემებს შეუქმნის. "არმიას" შემადგენლობას თვალს თუ გადავავლებთ, ამის პოტენციალი ნამდვილად გააჩნია. თუმცა, ისიც გასათვალისწინებელია, რომ "ლელო" ზედიზედ ორჯერ იშვიათად აგებს.

კიდევ ერთი შეხვედრა თბილისის "აკადემიასა" და პატარძეულის "ვეფხვებს" შორის 27 ოქტომბერს, გორში გაიმართება.

VII ტური

21 ოქტომბერი
ლელო-არმია 14:00
ხარები-არმაზი 16:00

22 ოქტომბერი
ბათუმი-ლოკომოტივი 15:00
ჯიქი-აია 17:30

27 ოქტომბერი
აკადემია-ვეფხვები 15:30

თ მ ფ წ ბ ქ(ს)
1. ბათუმი 6 5 0 1 +98 24(4)
2. ლოკომოტივი 6 5 0 1 +70 23(3)
3. არმაზი 6 4 0 2 +102 21(5)
4. ხარები 6 4 0 2 +39 19(3)
5. ლელო 6 4 0 2 +4 17(1)
6. აია 6 3 0 3 +11 14(2)
7. ჯიქი 6 2 0 4 -37 11(3)
8. ვეფხვები 6 1 0 5 -90 6(2)
9. აკადემია 6 1 0 5 -102 6(2)
10. არმია 6 1 0 5 -95 5(1)

ყოველდღიური სპორტული გაზეთი "ლელო"
751
მკითხველის კომენტარები / 0 /
მსგავსი ამბები
რუბრიკის სხვა სიახლეები
;