დიდი ათი. VIII ტურის წინ: დიდი რაგბი კახეთში

საქართველოს სარაგბო ჩემპიონატი ხვალ მერვე ტურის მატჩებით განახლდება. ვინაიდან, საქართველოს ნაკრები ამჟამად საფრანგეთში საწვრთნელ შეკრებაზე იმყოფება, ქართულ კლუბებს "ბორჯღალოსნების" რიგებში მივლენილი მორაგბეების გარეშე მოუწევთ თამაში.

ტურის ცენტრალური მატჩი "შევარდენის სანაკრებო ბაზაზე" გაიმართება, სადაც მარნეულის "არმაზი" თბილისის "ლელოს" უმასპინძლებს. ეს გუნდები სატურნირო ცხრილში მეზობლები არიან. საგულისხმოა, რომ ლელოელებმა მეტოქეზე ერთი თამაშით მეტი მოიგეს, მაგრამ საპრემიო ქულების წყალობით არმაზელებმა მათ მსგავსად 22 ქულა დააგროვეს.

ცხადია, ბევრად უკეთესი იქნებოდა გუნდებს ოპტიმალური შემადგენლობით ეთამაშათ. თუმცა, ამ მატჩისთვის დანაკლისი "ლელოს" უფრო საგრძნობი აქვს. ეროვნულ ნაკრებში არიან მივლენილნი სოსო მათიაშვილი და გრიგორ ქერდიყოშვილი, ტრავმირებულია მერაბ კვირიკაშვილი. არმაზელების დანაკლისი კი "ბორჯღალოსნების" შუამარბი გიორგი კვესელაძეა.

სერიოზული დანაკლისი აქვს გათამაშების ლიდერ "ბათუმსაც". თუმცა, "ლელოსგან" განსხვავებით, ზღვისპირელები სტუმრად აუტსაიდერ "არმიას" ეთამაშებიან. "ბათუმმა" ეროვნულ გუნდში ოთხი მორაგბე მიავლინა. ესენია: ლაშა ხმალაძე, ალექსანდრე თოდუა, საბა შუბითიძე და ანზორ სიჭინავა. ტრავმის შემდეგ ჯერ კიდევ საბოლოოდ ვერ მოშუშდა "ბორჯღალოსანი" გიორგი თხილაიშვილი.

"არმიას" უკან დასახევი ყველა გზა მოჭრილი აქვს. გუნდს ხუთი ქულა აქვს და ბოლო ადგილზეა. არმიელებმა ერთადერთი გამარჯვება სტუმრად, ლიდერთა ჯგუფის წარმომადგენელთან, რუსთავის "ხარებთან" მატჩში მოიპოვეს. ამდენად, ამ გუნდს შესწევს ძალა შემადგენლობაშეთხელებულ "ბათუმსაც" სერიოზული პრობლემები შეუქმნას.

"ბათუმს" კვალში საქართველოს ჩემპიონი თბილისის "ლოკომოტივი" უდგას, რომელიც სტუმრად ეთამაშება გორის "ჯიქს". ცნობილია, რომ რკინიგზელები ორ ფრონტზე იბრძვიან. "კონტინენტის ფარზე" მათი დებიუტი წარუმატებელი იყო. ახლა, რამდენიმე მორაგბე ეროვნულ ნაკრებშია - გიორგი ბეგაძე, გიორგი აფციაური და ზურაბ ძნელაძე. ტრავმირებულია გუნდის მთავარი მელელოვე გიორგი შკინინი.

"ჯიქის" დანაკარგი მინიმალურია. გუნდის ლიდერი გურამ შენგელია დიდი ხანია ტრავმირებულია. გორელებმა აქამდე მხოლოდ ორი მატჩი მოიგეს და ისევ სახიფათო ზონაში არიან. ყოველივე ზემოთ თქმულიდან გამომდინარე, გორელებს კარგი შანსი აქვთ, მესამე გამარჯვება მოიპოვონ და მესამე მარცხი მიაყენონ მეტოქეს.

საინტერესო ბრძოლაა მოსალოდნელი გორში, სადაც თბილისის "აკადემია" მესამეადგილოსან რუსთავის "ხარებს" უმასპინძლებს. სტუმრებს ტრავმამოშუშებული უკანახაზელი გიორგი კოშაძე დააკლდებათ, რომელიც ეროვნულ გუნდში იხმეს. თუმცა, ამის მიუხედავადაც, რუსთავული გუნდი საკმაოდ ორგანიზებულად და მრისხანედ გამოიყურება.

"აკადემია" სატურნირო ცხრილში ბოლოსწინა ადგილზეა და ყველაფერი უნდა იღონოს, რათა სახიფათო ზონას თავი დააღწიოს. აკადემიელთა ახალგაზრდულ გუნდს "ხარებთან" მატჩში სერიოზული გამოცდა ელის. თუმცა, ისიც აღსანიშნავია, რომ თბილისურ გუნდს დასაკარგავი აღარაფერი აქვს.

პატარძეულის "ვეფხვები" მიმდინარე გათამაშებაში პირველად ითამაშებს საკუთარ სტადიონზე. კახელები მერვე ტურში ქუთაისის "აიას" უმასპინძლებენ, რომელსაც ეროვნულ ნაკრებში ერთი მორაგბე, მგეზავი თედო აბჟანდაძე ჰყავს მივლენილი. ტრავმის გამო ისევ ვერ ითამაშებენ მირიან მოდებაძე და გიორგი ბაბუნაშვილი.

ცხადია, მშობლიურ გარემოში ასპარეზობა ზოგადად დიდი უპირატესობაა. თავდადებით მოთამაშე "ვეფხვებს" კი, ადგილობრივების გამხნევება კიდევ უფრო მეტ ენერგიას და ძალას შემატებს. ერთი სიტყვით, "აიას", რომელმაც სამმატჩიანი წაგებების სერია წინა ტურში შეწყვიტა, პატარძეულში მძიმე ბრძოლის გადატანა მოუწევს.

თ მ ფ წ ბ ქ(ს)
1. ბათუმი 7 6 0 1 +101 28(4)
2. ლოკომოტივი 7 5 0 2 +67 24(4)
3. ხარები 7 5 0 2 +46 23(3)
4. არმაზი 7 4 0 3 +95 22(5)
5. ლელო 7 5 0 2 +32 22(2)
6. აია 7 4 0 3 +13 18(2)
7. ჯიქი 7 2 0 5 -39 12(4)
8. ვეფხვები 7 1 1 5 -90 8(2)
9. აკადემია 7 1 1 5 -102 8(2)
10. არმია 7 1 0 6 -123 5(1)

ყოველდღიური სპორტული გაზეთი "ლელო"
240
მკითხველის კომენტარები / 0 /
რუბრიკის სხვა სიახლეები