დიდი არეულობა იკარდის თავს: ყველაფერში დამნაშავე ვანდაა... გაფიცული მაურო გულისწორს ვერ თმობს

ცოტა ხნის წინ მაურო იკარდის განთქმულმა ცოლმა ვანდა ნარამ ერთხელაც გააღიზიანა “ინტერის” ქომაგები. ნარამ “ინსტაგრამზე” გამოაქვეყნა ვიდეო, სადაც ჩანს, რომ მაურო, რომელიც 26-ე დაბადების დღეს აღნიშნავს, ძალიან ბედნიერად გამოიყურება.

ის რესტორანში ზის მეგობრებთან და ოჯახის წევრებთან ერთად. არგენტინელი ფორვარდი საჩუქარს საჩუქარზე ხსნის. ეს იყო ტყავის ჩექმები, ძალიან ლამაზად მოჭედილი დანა, ძვირფასი შამპანური... და ბოლოს დიდი თეთრი ყუთი, რომელშიც იჯდა მაუროს საყვარელი დიდი თეთრი ლეკვი...

მოკლედ, სიყვარულის საღამო იყო, მაგრამ მაურო იკარდის ასევე ტკბილად როდი მიუდის საქმე “ინტერში”, თავის კლუბში, სადაც ის პრაქტიკულად გაფიცულია. ბევრი მიიჩნევს, რომ იკარდის კარიერის დასრულება “ინტერში” დროის საქმეა და მეტი არაფერი.

ბოლო 3 წელია ის “ნერაძურისთვის” ყველაზე მნიშვნელოვანი ფეხბურთელი და ლიდერია. ამ დროის განმავლობაში არასოდეს ჩამოსცილებია სეზონში 20-გოლიან ზღვარს. ეს კი, რა თქმა უნდა, დასაფასებელია.

მთავარი პრობლემა კი მთელ ამ ამბავში არის... ვანდა ნარა - იკარდის ცოლი და ერთგვარად საბედისწერო ქალი მის ცხოვრებაში. ის რეგულარულად სტუმრობს იტალიურ ტელეშოუებს და საუბრობს მეუღლის შესახებ. თვლის, რომ გუნდში საკმარისი რაოდენობის თანამოაზრეები ჰყავს...

“თუ “ინტერი” იპოვის ისეთ ფეხბურთელს, რომელიც ყველა შეხვედრაში გაიტანს ხუთ გოლს, რა თქმა უნდა, მაშინ უკეთესი იქნება, მასთან გაფორმდეს კონტრაქტი და არა იკარდისთან”, - განაცხადა ნარამ.

ცნობილია, რომ იკარდის ჩამოერთვა “ინტერის” კაპიტნობა. ლუჩანო სპალეტის განცხადებით, ეს იყო ძალიან რთული გადაწყვეტილება: “რა თქმა უნდა, ეს არ მომხდარა იოლად, ძალიან რთული გადაწყვეტილება იყო, რადგან ჩვენ შესანიშნავად ვიცით იმ ღირსების შესახებ, რომელიც აქვს ყოფილ კაპიტანს. უბრალოდ, მისი საქციელი იწვევს გუნდში არეულობას და ამის უარყოფა არ შეიძლება”.

“ინტერის” აღმასრულებელმა დირექტორმა ბეპე მაროტამ კი განაცხადა, რომ იკარდის საქციელი არანაირად არ უწყობს ხელს გუნდის წარმატებას. ცნობილია, რომ მაროტა “ინტერის” კაპიტნად სლოვენიელ მეკარე სამირ ჰანდანოვიჩის ლობირებდა და დღეს სწორედ ჰანდანოვიჩია კაპიტანი, დროებითი, მაგრამ მაინც...
იკარდი არ აჰყვა არავის და “ინსტაგრამზე” შემდეგი დაწერა: “ხანდახან ჯობია, მაგრად მოკუმო ტუჩები და არაფერი თქვა, თუნდაც სულელი ეგონო ვიღაცას, ვიდრე პირი გააღო და ყველაფერი თქვა”.

“სამპდორიასთან” შეხვედრაში იკარდი ისევ არ იყო განაცხადში. ამას მორიგი სკანდალი მოჰყვა. მან ისევ ვანდასთან ერთად უყურა თამაშს, ნახა “ინტერის” “ულტრასების” მიერ გამოფენილი ბანერი, რომლის შინაარსიც ასეთი იყო: “ჩვენ აქ ვაჭრები არ გვჭირდება”. შინაარსის მიხვედრა იოლი უნდა იყოს. იკარდის უნდა ახალი მილიონები.

გულშემატკივრებმა მას 2016 წელს დაწერილი ავტობიოგრაფია გაუხსენეს. ამ წიგნში ის ერთ ადგილას არგენტინიდან 100 კრიმინალის ჩამოყვანით ემუქრება იმათ, ვინც მასზე მორალურ შეტევას განახორციელებენ.

“კორიერე დელა სერას” ცნობით, იკარდი აღარ ითამაშებს “ინტერის” შემადგენლობაში, თუ კაპიტნის სამკლავურს არ დაუბრუნებენ. სამკლავურის მთავარი პრეტენდენტი კი ალბათ მაინც ჰანდანოვიჩია და ამის თაობაზე სოციალურ ქსელში მარსელო ბროზოვიჩმაც დაწერა.

გამოცდილმა ლუჩანო სპალეტიმ კი, ვინც ამჟამად 59 წლისაა, განაცხადა, რომ ასეთ უხერხულ სიტუაციაში ადრე არასოდეს ყოფილა. ეს სიტყვები რომ გვესმის, რა თქმა უნდა, გვახსენდება “რომა” და გაბრაზებული ფრანჩესკო ტოტი. ამ გუნდის დამრიგებელი მაშინ სწორედ სპალეტი გახლდათ...

ფეხბურთელისა და კლუბის შერიგების გზა ჯერ არ ჩანს. მისი გაყიდვა თითქმის გარდაუვალია. იკარდი უნდა “იუვენტუსს” და ტურინული გრანდი ალბათ ფავორიტიცაა ამ ბრძოლაში, მაგრამ “ინტერის” ხელმძღვანელობამ განაცხადა, რომ იკარდის არასოდეს მიჰყიდის ტურინელ მტერს.
არის მეორე ვარიანტიც. 120 მილიონ ევროდ იკარდი გადავიდეს რომელიმე არაიტალიურ გუნდში.

“ეს არ არის კარგი ფეხბურთელებისთვის, ეს არ არის კარგი გუნდისთვის და არ არის კარგი იკარდისთვის”, - თქვა ლუიშ ფიგუმ, ვინც თავის დროზე “ინტერის” ერთ-ერთი ლიდერი გახლდათ.

ყველაფერში დამნაშავე კი, ალბათ, მაინც ვანდაა. ფეხბურთელის დამ, ივანამ, მოუწოდა ძმას, ვინმე უფრო ღირსეული იპოვოს აგენტად. ივანას (ალბათ, მის ძმასაც) ახსოვს, რომ ვანდა ადრე იკარდის მეგობრის, მაქსი ლოპესის ცოლი გახლდათ...

“ის ჩემს ინტერესებს დაიცავს მანამ, სანამ ფეხბურთს ვითამაშებ”, - თქვა იკარდიმ ცოლზე.

ყოველდღიური სპორტული გაზეთი "ლელო"
1815
მკითხველის კომენტარები / 0 /
მსგავსი ამბები
რუბრიკის სხვა სიახლეები
;