[VIDEO] თენგიზ სულაქველიძე: "ვერდერმა" "სპარტაკს" 6:2 მოუგო და ჩვენთან ჩამოვიდა... რა ბედი ეწია "დინამოს"?

ძველი დინამოს ბოლო გაბრწყინება - რეჰაგელის, ნოიბარტის, რიდლეს და სხვათა წინააღმდეგ... 

ვერდერი
2
დინამო
1
25 ნოემბერი, 1987. 1/8 ფინალი. გფრ, ბრემენი, ვეზერშტადიონი. 22000
გოლები: 1:0 ფრანკ ნოიბარტი (3), 2:0 კარლ-ჰაინც რიდლე (18), 2:1 რამაზ შენგელია (20)
ვერდერი: ოლივერ რეკი, ტომას შააფი, გიუნტერ ჰერმანი, რუნე ბრატსეტი, გუნარ საუერი, ული ბოროვკა, ფრანკ ორდენევიცი (მანფრედ ბურგსმიულერი 76), მირკო ვოტავა (კაპ), კარლ-ჰაინც რიდლე, ფრანკ ნოიბარტი, ნორბერტ მაიერი
მწვრთნელი: ოტო რეჰაგელი
დინამო: ოთარ გაბელია, გელა კეტაშვილი, ალექსანდრე ჩივაძე (კაპ), სოსო ჭედია, ახრიკ ცვეიბა, ზაზა რევიშვილი, ზაურ სვანაძე, თენგიზ სულაქველიძე, ოთარ კორღალიძე, გია გურული (თემურ ქეცბაია 67), რამაზ შენგელია
მწვრთნელი: გერმან ზონინი (რუსეთი)
გაფრთხილება: გია გურული, ნორბერტ მაიერი, ალექსანდრე ჩივაძე, თენგიზ სულაქველიძე, ოთარ კორღალიძე, სოსო ჭედია
მსაჯები: ურისარ პიტარტე; ბ.რიბელიესი, პ.იბანიესი (ესპანეთი)

ძველი, საბჭოთა დროის თბილისის "დინამოს" ბოლო დიდი ევრომატჩები ბრემენის "ვერდერთან" იყო. 1987 წელს "დინამოში" უკვე დაწყებული იყო თაობათა ცვლა. გუნდში ახალგაზრდებთან (თემურ ქეცბაია, ზაზა რევიშვილი, ოთარ კორღალიძე და სხვები) გამოცდილი ფეხბურთელებიც თამაშობდნენ - ოთარ გაბელია, ალექსანდრე ჩივაძე, თენგიზ სულაქველიძე, ზაურ სვანაძე და რამაზ შენგელია.

"ვერდერამდე" "დინამომ" ორი ეტაპი გაიარა უეფას თასზე. ჯერ ბულგარული "ლოკომოტივი" დაჯაბნა, მერე კი რუმინული "ვიქტორია". მაშინ "ვერდერს" ოტო რეჰაგელი წვრთნიდა. ცნობილი გერმანელი დამრიგებელი, ვისი ხელმძღვანელობითაც მოგვიანებით საბერძნეთის ნაკრებმა ევროპის ჩემპიონატი მოიგო.

"დინამოს" სათავეში გერმან ზონინი იდგა. ორმატჩიანი დუელის წინ "დინამო" თითქოს უშანსოდ იყო. იმდროინდელი "ვერდერის" ღირსებას ისეთი ფეხბურთელები იცავდნენ, როგორებიც იყვნენ ფრანკ ნოიბარტი, ოლივერ რეკი, ული ბოროვკა, კარლ-ჰაინც რიდლე...

ყველაფერ ამას დაემატა ისიც, რომ "დინამომდე" "ვერდერმა" კუდით ქვა ასროლინა მოსკოვის "სპარტაკს". სტუმრად 1:4 კი წააგო, მაგრამ შინ 6:2 აჯობა.

"ვერდერმა" შინ 2:1 გვაჯობა. გერმანელები ნოიბარტმა და რიდლემ შეაგდეს. "დინამო" არ გარტდა და "იმედის გოლი" გაახერხა - გია გურულმა საჰაერრო ორთაბრძოლაში დაჯაბნა მცველები და სულმნათ რამაზ შენგელიას საგოლე ალღომ არ უმტყუნა.

თბილისური შეხვედრის წინ საქართველოს დედაქალაქში დიდი აჟიოტაჟი იყო. პირველ ტაიმში მეტოქე აშკარად დავჯაბნეთ. თენგიზ სულაქველიძემ საჯარიმოს გარედან შეაგდო. იყო გია გურულის მიერ შეზანზარებული ძელი და თემურ ქეცბაიას მომენტი.

სამწუხაროდ, მეორე ტაიმში საჩვენო ანგარიში ვეღარ შევინარჩუნეთ. ტომას შააფმა, ვინც "ვერდერს" კარგა ხნის განმავლობაში წვრთნიდა, გამთანაბრებელი გოლი შეაგდო. არადა, "დინამოს" მომენტები კიდევ ჰქონდა - გატანა კორღალიძესა და შენგელიას შეეძლოთ.

"ამ შეხვედრისათვის ძალიან სერიოზულად ვემზადებოდით. ფაქტია, უძლიერეს გუნდთან გვიწევდა თამაში - ჩვენამდე "ვერდერმა" შინ 6:2 მოუგო მოსკოვის "სპარტაკს". გერმანიაში რომ ჩავედით, იმას ვფიქრობდით, მინიმალური ანგარიშით მაინც წაგვეგო, რადგან საპასუხო, თბილისური შეხვედრის იმედი გვქონდა. 

დინამო
1
ვერდერი
2
9 დეკემბერი, 1987. 1/8 ფინალი. თბილისი,
ვ.ი.ლენინის სახ. დინამო სტადიონი. 80000
გოლები: 1:0 თენგიზ სულაქველიძე (31), 1:1 ტომას შააფი (61)
დინამო: ოთარ გაბელია, გელა კეტაშვილი, ალექსანდრე ჩივაძე (კაპ), სოსო ჭედია, ახრიკ ცვეიბა, ზაზა რევიშვილი (მამუკა ფანცულაია 67), ზაურ სვანაძე, თენგიზ სულაქველიძე, თემურ ქეცბაია (ოთარ კორღალიძე 62), გია გურული, რამაზ შენგელია
მწვრთნელი: გერმან ზონინი (რუსეთი)
ვერდერი: ოლივერ რეკი, ტომას შააფი, ჯონი ოტენი (მანფრედ ბურგსმიულერი 53), რუნე ბრატსეტი, მიხაელ კუტცოპი, ული ბოროვკა, გიუნტერ ჰერმანი, მირკო ვოტავა (კაპ), კარლ-ჰაინც რიდლე (მატიას რულენდერი 89), ტომას ვოლტერი, ფრანკ ორდენევიცი
მწვრთნელი: ოტო რეჰაგელი
გაფრთხილება: ახრიკ ცვეიბა, ული ბოროვკა
მსაჯები: ბო კარლსონი; ბო ჰელენი, კრისტერ ფალსტრიომი (შვედეთი)

საბოლოოდ 1:1 წავაგეთ.რაც შეეხება თბილისურ შეხვედრას, ვიგებდით, ეს ერთადერთი ბურთი მე გავიტანე. კიდევ იყო მომენტები. 1:0 რომ მოგვეგო, გავდიოდით შემდეგ ეტაპზე. გოლი კი საჯარიმოს გარედან გავიტანე - დაგორებულ ბურთს ძლიერად დავარტყი და რიკოშეტიც იყო. მთავარი ალბათ მაინც ის იყო, რომ ბოლოსკენ ფიზიკურად გვაჯობეს. ძალიან ძლიერი გუნდი იყო." - ასე გაიხსენა "ვერდერთან"ჯახი თენგიზ სულაქველიძემ.

5677
მკითხველის კომენტარები / 0 /
მსგავსი ამბები
რუბრიკის სხვა სიახლეები
;