დიდი მატჩები: როგორ აფეთქდა ქართულ დინამიტზე მოსკოვის ცსკა

ამასწინათ, ინტერნეტში აღმოვაჩნე ამონაჭერი რუსული გაზეთიდან (კონკრეტულად რა გამოცემაა, ვერსად ამოვიკითხე), რომელშიც 50-იანი წლების დასასრულის ცსკა-"დინამოს" მატჩია მიმოხილული. სათაურად აწერია: "ხაზარაძე კვანძს ჭრის".

შესავალში ვკითხულობთ, რომ პირველი ტაიმი მოსკოველ არმიელებს მოუგიათ (36:34), თუმცა საბოლოო გამარჯვება რუსეთიდან ქართველებს წამოუღიათ - 78:74. აი, რას მოგვითხრობს პუბლიკაციის ავტორი ვიქტორ ვასილევი:

"ამბობენ, ხელოვნებაში ყველა ჟანრი კარგია, გარდა მოსაწყენისა. ამ გამოთქმით თუ ვიხელმძღვანელებთ, შეიძლება ითქვას, რომ თბილისის საკალათბურთო გუნდი "დინამო" ამ სფეროში "ა" კლასია, ერთ-ერთი ყველაზე საინტერესო ჟანრი. ყოველ შემთხვევაში, თბილისელთა მატჩებზე პუბლიკა არასოდეს იწყენს.

სტაროსტინის თქმით ტემპერამენტი ფეხბურთის დენთია, კიდევ უფრო დინამოურ თამაშში, კალათბურთში ტემპერამენტი ნამდვილი დინამიტია. იმდენად, რამდენადაც თითოეული დინამოელი ასეთი "დინამიტით" ბუნებისგან უხვადაა დაჯილდოებული, მათი მონაწილეობით გამართული მატჩები თავბრუსდამხვევ ტემპში იმართება.

არც "დინამო"-ცსკა იყო გამონაკლისი. თუმცა სტუმრებმა თავიდანვე ვერ ჩართეს მეოთხე სიჩქარე. შესაძლოა, სასტარტო მღელვარების გამო, მინაშვილის, ხაზარაძისა და აბაშიძის შეტევები ზუსტი ტყორცნებით ვერ გვირგვინდებოდა. ამით ისარგებლეს არმიელებმა და კარპოვის, ბოჩკარიოვისა და სემიონოვის საშუალო ტყორცნების წყალობით 5-ქულიანი უპირატესობა მოიპოვეს.

გურამ მინაშვილი უცნობ დეტალებს იხსენებს... როგორ სძლია \'დინამომ\' \'რეალს\' ჩემპიონთა თასის ფინალში

ანგარიშზე 18:13 ცსკა-ს მწვრთნელმა ალექსეევმა სამი წამყვანი კალათბურთელი შეცვალა, მათი მეორე ტაიმისთვის გამოზიგვა განიზრახა. ეს შეცდომა აღმოჩნდა - ათამაშებულმა დინამოელებმა ჯერ ანგარიში გაათანაბრეს, შემდეგ დაწინაურდნენ კიდეც. ეს უმთავრესად მინაშვილის, ინწკირველისა და ხაზარაძის დამსახურება იყო. გურამი და ლევანი მეტოქის ნახევარზე კომბინაციებს ისე ათამაშებდნენ, ფინტებითა და მოულოდნელი გადაცემებით გაოგნებულმა არმიელებმა არ იცოდნენ რა ეღონათ. ამასობაში ბურთი ტანმაღალ ხაზარაძემდე მიდიოდა, რომელიც ერთი დარტყმით კვეთდა ახვლანჯულ კვანძს.

ლევან ინწკირველი, მოხერეხბული ქართველი ოდისევსი, მსუბუქი, კატისებრი მოძრაობებით იოლად შედიოდა არმიელთა საჯარიმოში. მისი წვრილი, შავი თვალები წამის მეასედებში ხან ერთ მხარეს დარბოდნენ, ხან მეორეს - თავისუფალ პარტნიორს ეძებდნენ. ერთი მოსკოველი ინწკირველისკენ გაიჭრა... ორთაბრძოლა! უცებ ცრუმოძრაობა მარცხნივ, მოტყუებული მეტოქე წამიერად ჩამორჩა ლევანს და გზა კალათისკენ ხსნილია. ახტა და... ბურთი მინაშვილს გადააწოდა. გურამმა ხაზარაძეს დაუთმო და ტაბლოზე ახალი ციფრები აციმციმდა.

დინამოელთაგან მხოლოდ ხაზარაძე როდი აგდებდა. მან 22 ქულა მიითვალა, მინაშვილმა და ინწკირველმა - 17-17.
გადამწყვეტი მეორე ტაიმის მე-11 წუთი აღმოჩნდა, როცა ხუთფოლიანი ბოჩკარიოვის ნაცვლად მოედანზე შესული ხარიტონოვი საჯარიმოს ხაზზე დადგა. იგი მღელვარებას ვერ გაუმკლავდა და ორივე ტყორცნა ააცილა. ამან მოსკოველებზე დამთრგუნველად იმოქმედა, სამაგიეროდ ფრთები შეასხა თბილისელებს. ისინი 6 ქულით წინ გაიჭრნენ.

ცსკა-ს მოგების შანსი მაინც შერჩა. ამის მიზეზი ქართველთა ჯარიმები იყო. მოედანი ჯერ აბაშიძემ დატოვა, შემდეგ - შესანიშნავად მოთამაშე ხაზარაძემ. თუმცა არმიელთა სამწუხაროდ, დინამოელებს ძირითადზე არანაკლები რეზერვი აღმოაჩნდათ. ხაზარაძის გასვლით განცდილი სიხარული ცსკა-ს კალათბურთელებს მალევე ჩაუხშო უგრეხელიძემ, რომელსაც გუნდში "პტიცას" ეძახიან ერთი თვისების გამო - ჰაერში ძალიან მსუბუქად და სწრაფად შეუძლია აფრენა.

4-4 ჯარიმიანი ინწკირველისა და მინაშვილის წინააღმდეგ არმიელები დიდი მონდომებით თამაშობდნენ, ფარქვეშ შეჭრას ცდილობდნენ, მაგრამ ვერც ამ ორი კალათბურთელს მიაღებინეს მეხუთე ფოლი და ვერც თამაში გადაარჩინეს. "დინამომ" ცსკა 78:74 დაამარცხა."

3911
მკითხველის კომენტარები / 0 /
მსგავსი ამბები
რუბრიკის სხვა სიახლეები