[ანალიზი] ერთა ლიგა და დიდი ომების მოლოდინი 

ცოტაც და, საქართველოს ეროვნული ნაკრები ერთა ლიგაში კიდევ ორ მატჩს ჩაატარებს. იქამდე კი ჩვენი გულშემატკივრისთვის საინტერესო უნდა იყოს, რა ხდება ერთa ლიგის D დივიზიონის ჯგუფებში. ვინ შეიძლება იყოს საქართველოს ნაკრების მეტოქე შესაძლო საპლეიოფო ნახევარფინალში...

I ჯგუფი

ერთი შეხედვით, ამ ჯგუფში ბევრი რამაა გარკვეული. 2 ტურის შემდეგ საქართველოს ნაკრებს 6 ქულა აქვს. მეორე ადგილზე კი 2-ქულიანი ანდორაა. სუსტად თამაშობს ჩვენი მთავარი კონკურენტი ყაზახეთი და ვერც ლატვია წყვეტს ციდან ვარსკვლავებს.

ნეიტრალური თვალითაც კი ცხადად ჩანს, რომ თუ საქართველოს ნაკრებმა თავად არ შეუქმნა პრობლემები საკუთარ თავს, არ უნდა გაუჭირდეს ჯგუფის მოგება. ასეთ შემთხვევაში, უნდა დაველოდოთ, ვინ იქნება ჩვენი მეტოქე სასიცოცხლოდ მნიშვნელოვან ნახევარფინალში. ეს მეტოქე კი სხვა ჯგუფებში უნდა გაირკვეს...

II ჯგუფი

აქ ლუქსემბურგის ნაკრები ლიდერობს 6 ქულით. ბოლო დროს იქაური ფეხბურთის პროგრესი თვალსაჩინოა. აგერ, "დუდელანჟი" ევროპალიგის ჯგუფურ ეტაპზე თამაშობს. პირველობისთვის ასევე იბრძოლებს 4-ქულიანი ბელარუსი. მოლდოვასა და სან მარინოს კი პირველობის შანსი არ უნდა ჰქონდეთ.

თავიდან, ფურცელზე ფავორიტად მაინც ბელარუსი მოჩანდა, მაგრამ ჯერჯერობით მოვლენები სხვა მიმართულებით ვითარდება.

ლუქსემბურგის ნაკრები, განსაკუთრებით საშინაო ასპარეზზე, შემტევ და სანახაობრივ ფეხბურთს თამაშობს. ეს გუნდი ნამდვილად აღარ არის ის, რაც ამ რამდენიმე წლის წინ იყო.

III ჯგუფი

4-ქულიან კოსოვოს 3 ქულის მქონე ფარერები მისდევს, მერე კი 2-ქულიანი აზერბაიჯანი მოდის. მალტელებს ალბათ არც ტურნირის დაწყებამდე ჰქონდათ წარმატების ამბიცია. კოსოვოს ჰყავს დივიზიონის კვალობაზე შესანიშნავი შემადგენლობა. გუნდმა გასვლაზე ფრედ ითამაშა აზერბაიჯანთა და შინ მოუგო ფარერებს. ვივარაუდებთ, რომ ამ ჯგუფიდან ნახევარფინალში სწორედ ეს ბალკანური ნაკრები გავა.

კოსოვოელი ფეხბურთელები წარმატებით იცავენ ისეთი ევროპული კლუბების ღირსებას, როგორებიც არიან "ვერდერი", "გენტი", ზაგრების "დინამო"...

IV ჯგუფი

მაკედონიას 6 ქულა აქვს, სომხეთსა და ლიხტენშტაინს კი - 3-3. რა თქმა უნდა, ფავორიტია მაკედონია. გუნდში გამოჩნდა საინტერესო თაობა. ზოგიერთი მაკედონიელი უკვე თამაშობს კარგ ევროპულ კლუბში.

სომხეთმა ახლახანს გამოცვალა მწვრთნელი. ჩვენს მეზობლებს იტალიელი ჯანი დე ბიაზი გაწვრთნის. ისმის სავსებით ლოგიკური კითხვა: გვიანი ხომ არ არის?

ამ დროისთვის სომხეთს ერთადერთი ვარსკვლავი, ჰენრიხ მხითარიანი ჰყავს. დანარჩენები მასთან ახლოსაც ვერ მიდიან. საინტერესოა, რომ სომხეთს რამდენიმე ისეთი მოთამაშე ჰყავს, რომელსაც ისტორიულ სამშობლოსთან მხოლოდ ფესვები აკავშირებს.

ზოგადად, მაკედონიის ნაკრები, შემადგენლობის მიხედვით, საქართველოსთან ერთად D ლიგის მოგების ერთ-ერთ მთავარ ფავორიტად უნდა მივიჩნიოთ.

1730
მკითხველის კომენტარები / 0 /
მსგავსი ამბები
რუბრიკის სხვა სიახლეები
;