დიდი ტიმის "ბოლო გასროლა" მილუოლში

38 წლის ტიმ კეჰილი ერთხელაც ესვრის დიდ გამოწვევას ევროპულ საფეხბურთო მინდვრებს. წარმოშობით სამოელი, მოქალაქეობით კი ავსტრალიელი, ვინც "ევერტონის" ლეგენდად ითვლება, "მილუოლში" მივიდა.

ამ კლუბის ღირსებას კეჰილი 1998-2004 წლებში იცავდა. ჩემპიონშიფში მოასპარეზე კლუბთან კეჰილმა კონტრაქტი მიმდინარე სეზონის ბოლომდე გააფორმა. რა ბზიკმა უკბინა ტიმს, რატომ გადაწყვიტა მან ევროპაში დაბრუნება?

მიზეზი მარტივი გამოსაცნობია: ავსტრალიის ნაკრები მსოფლიოს ჩემპიონატზე ითამაშებს, კეჰილს კი გულით უნდა, რომ გედის სიმღერა რუსეთში შეასრულოს და "კენგურუებს" ერთხელაც დაეხმაროს.

უნდა აღინიშნოს, რომ კეჰილი ავსტრალიის ნაკრების ყველა დროის საუკეთესო ბომბარდირია. ეს ის შემთხვევაა, როცა დიდი სპორტსმენის წინაშე ქუდი უნდა მოვიხადოთ. თუ ტიმი ავსტრალიის ნაკრებს რუსეთში გაჰყვა, ეს მისთვის მეოთხე მუნდიალი იქნება.

კეჰილს სხვადასხვა დროს უთამაშია "მელბურნ სიტიში", "ევერტონში", "ნიუ იორკ რედ ბულზში", "შანხაი შენხუასა" და "ჟანჩუ გრანდთაუნში".

"ჩემთვის ეს ოცნების ახდენას ჰგავს. მოვედი იქ, სადაც ჩემი ევროპული კარიერა დაიწყო. მოვედი იმიტომ, რომ გუნდს დავეხმარო. ეს ჩემთვის დიდი გამოწვევაა და, ამასთან ერთად, ასეთივე დონის პასუხისმგებლობა", - აღნიშნა კეჰილმა.

ყოველდღიური სპორტული გაზეთი "ლელო"
195
მკითხველის კომენტარები / 0 /
მსგავსი ამბები
რუბრიკის სხვა სიახლეები