დიდი 10: 'ლოკომოტივის' მეათე ტიტული [ანალიზი]

აია-ლოკომოტივი 10:29
აია: (15-9) ძნელაძე (წივწივაძე 74), ლოსაბერიძე, სიმსივე, ირემაძე, აბრამიძე (მანაგაძე 54), გობეჯიშვილი, როხვაძე (თუთბერიძე 41); (1-8) სალდაძე (ჯინჭარაძე 50), ტორაძე (ერემეიშვილი 57), ხარებავა (რატიაშვილი 41), ბაბუნაშვილი, შალამბერიძე (გორგასლიძე 50), ხანთაძე, დანგაძე, არეშიძე (მღებრიშვილი 6).
ლ: წივწივაძე. გ: გობეჯიშვილი. ს: ლოსაბერიძე
სინბინი: ძნელაძე
ლოკომოტივი: (15-9) გოგოლაშვილი (ჩიღვინიძე 70), ხარაზიშვილი, გაგოშვილი, კავთიძე, შკინინი (გულიტაშვილი 78), წიკლაური, ბეგაძე (გედეხაური 78); (1-8) ქვათაძე (ცუცქირიძე 53), მამუკაშვილი (ხიდეშელი 57), კაკაურიძე (ქართველიშვილი 53), კოპაძე, გეგია (დარასელია 48), ფოფხაძე (მაისურაძე 68), გასვიანი, ამირანაშვილი
ლ: შკინინი, საჯარიმო. 4ს, გ, ა: წიკლაური
მსაჯი: ჯორჯ ქლენზი (ირლანდია)

* გიორგი შკინინმა სეზონში 23-ე ლელო გაიტანა.
* "ლოკომოტივმა" შესარჩევ ფინალში მარცხისთვის შური იძია.
* ავჭალის სარაგბო სტადიონზე სრული ანშლაგი იყო

დიდი ფინალი თბილისის "ლოკომოტივმა" მოიგო და საქართველოს ჩემპიონის ტიტული მეათედ მოიპოვა. რკინიგზელებმა ქუთაისის "აიას" თითქმის ყველა კომპონენტში აჯობეს და დამაჯერებლად სძლიეს 29:10.

თამაში ცოტა დუნედ, ნელა დაიწყო. აშკარად ეტყობოდა, გუნდები ფრთხილობდნენ. თუმცა, "ლოკომოტივის" მგეზავმა ბექა წიკლაურმა, რომელიც მატჩში საუკეთესო იყო და გუნდს შესანიშნავად წარუძღვა, ორჯერ ზედიზედ არეკნით სცადა კარის დალაშქვრა, მაგრამ არ გამოუვიდა.

უცნაური იყო, მაგრამ შერკინებაში უპირატესობა "აიას" ჰქონდა. არადა, აქამდე ამ კომპონენტში რკინიგზელები მეტოქესაც სჯობდნენ და მიმდინარე ჩემპიონატშიც საუკეთესოები იყვნენ. მე-7 წუთზე "ლოკომოტივი" სწორედ შერკინებაში დაჯარიმდა და "აიას" გარემარბ დავით ლოსაბერიძეს ანგარიშის გახსნის შანსი მიეცა. თუმცა, 40 მეტრიდან დარტყმული კარს ასცდა.

"აია" კიდევ უფრო გააქტიურდა და მე-14 წუთზე მეტოქის ლელოს მიუახლოვდა. რკინიგზელებმა შეტევის შეჩერება მხოლოდ წესის დარღვევით შეძლეს. ლოსაბერიძემ ამჯერად ხელსაყრელი პოზიციიდან დაარტყა და გაიტანა - 3:0.

ამის შემდეგ სათამაშო უპირატესობა მთლიანად "ლოკომოტივმა" იგდო ხელთ. მორკინალების მიძალებები და წარმოქმნილ რაკში სუფთად თამაში ქუთათურებს ბევრ პრობლემას უქმნიდა. "აიამ" წესის დარღვევას უმატა. წიკლაურმა ორი საჯარიმო კარგად გამოიყენა და 25-ე წუთისთვის თბილისური გუნდი 6:3 დააწინაურა.

სამ წუთში "აიას" ერთ-ერთმა ლიდერმა ზურაბ ძნელაძემ, როგორც შემდგომში გაირკვა, საბედისწერო შეცდომა დაუშვა. მან მეტოქე შუბურად შებოჭა. არბიტრმა ის სინბინში გაუშვა. წიკლაურმა, მეტოქისთვის მოულოდნელად, ბურთი სწრაფად გაათამაშა და მარცხნივ, გრძელ ფრთაზე ჩაათამაშა, სადაც რიცხობრივი უპირატესობა ჰქონდათ. იქ კი უშეცდომოდ გაისარჯა გარემარბი გიორგი შკინინი, რომელმაც სეზონში თავისი 23-ე ლელო გაიტანა. წიკლაურმა გარდასახა - 13:3. ასე დასრულდა პირველი ტაიმი.

შესვენების შემდეგ "ლოკომოტივმა" ზეწოლა კიდევ უფრო გაზარდა. წიკლაურმა დასაწყისში ისევ ორჯერ სცადა არეკნით კარის დალაშქვრა. ერთხელ ძელს გაარტყა, მეორედ ააცილა. მის სიჯიუტეს "საზღვარი" არ ჰქონდა და 73-ე წუთზე კიდევ ერთხელ, ამჯერად 50 მეტრიდან დაარტყა და გაიტანა. იქამდე, რკინიგზელები უკვე 19:3 იგებდნენ, რადგან იმავე წიკლაურმა ორი საჯარიმოს გატანა მოახერხა. არეკნის შემდეგ კი გუნდი 19 ქულის სხვაობით დააწინაურა - 22:3.

"აიამ" ვერაფრით შეძლო თამაშის დალაგება. რკინიგზელებმა სწორი ტაქტიკის წყალობით მეტოქე მოედნის საკუთარ ნახევარზე გამოკეტა და იერიშის წამოწყების საშუალებას არ აძლევდა. ამას თან დაერთო ისიც, რომ "ლოკომოტივი" სრულიად დომინირებდა დერეფანში თამაშში.

მატჩის დასკვნით ხუთ წუთში "ავჭალის" პირთამდე სავსე სტადიონმა კიდევ ორი ლელო იხილა. 75-ე წუთზე "ლოკომოტივმა" მეტოქის ლელოდან ხუთ მეტრში შერკინების უფლება მოიპოვა. რკინიგზელებმა, როგორც სჩვევიათ, მძლავრი მიწოლით ქუთათურები საგრძნობლად შეავიწროვეს, უკან დაახევინეს და წესის დარღვევა აიძულეს. არბიტრმა საჯარიმო ლელო დააფიქსირა - 29:3.

მიუხედავად იმისა, რომ მატჩის ბედი გადაწყვეტილი იყო, "აია" დანებებას მაინც არ აპირებდა და თამაშის დასრულებამდე ერთი წუთით ადრე შეცვლაზე შესულმა ნიკა წივწივაძემ პრესტიჟის ლელო მიითვალა. ქუთაისელთა 17 წლის მგეზავმა დავით გობეჯიშვილმა გარდასხვა ზუსტად დაარტყა - 10:29.

დარჩენილ ერთ წუთში "ლოკომოტივმა" ისევ მიიტანა იერიში მეტოქის ლელოზე, მაგრამ "აიამ" ამჯერად საკუთარი ჩათვლის მოედნის დაცვა მოახერხა და მატჩიც დასრულდა, რომელშიც "ლოკომოტივის" გამარჯვება სრულიად ლოგიკური იყო.

გელა შალამბერიძე, "აიას" კაპიტანი:

"ძნელი სათქმელია, რატომ არ გამოგვივიდა თამაში. თუმცა, ფაქტია, რომ რაც შეგვეძლო ვერ გავაკეთეთ, ვერ დავალაგეთ თამაში. ამის მიზეზებზე ლაპარაკი ახლა შეუძლებელია. მთელი სეზონი თანაბრად კარგად ჩავატარეთ და საწყენია გადამწყვეტ მატჩში რომ დავმარცხდით. თუმცა, მეორე ადგილის დაკავებაც არ არის ცუდი და ვულოცავ ჩემს გუნდს ვერცხლის მედლებს".

ვახტანგ კავთიძე, "ლოკომოტივის" კაპიტანი:

"შესარჩევ ფინალში "აიასთან" ცუდად ვითამაშეთ. მერე ამ შეხვედრის ვიდეოანალიზზე დიდხანს ვიმუშავეთ. "აიას" თითოეული მოთამაშე, მათი თამაშის დეტალები შევისწავლეთ. კარგად მოვემზადეთ, მოვინდომეთ, ბოლო თამაშზე მაქსიმალურად კონცენტრირება მოვახერხეთ და გავიმარჯვეთ".

ყოველდღიური სპორტული გაზეთი "ლელო"
307
მკითხველის კომენტარები / 0 /
მსგავსი ამბები
რუბრიკის სხვა სიახლეები