დიდი 10. ხარის წელი - რუსთავის მორიგი სენსაცია

საქართველოს ჩემპიონატში დაუმარცხებელი აღარავინაა. რუსთავის „ხარებმა“ კიდევ ერთი სენსაცია გამოაცხო და საკუთარ მოედანზე ქვეყნის ჩემპიონი „ლოკომოტივი“ დაამარცხა. პირველი გამარჯვება მოიპოვა თბილისის „აკადემიამ“. საგულისხმოა, რომ მე-5 ტურში ყველა მატჩში მასპინძელმა მოიგო...

ხარები-ლოკომოტივი 13:7
ხარები: ლ - გოგოლაძე. გ - თაბუკაშვილი. 2ს - თაბუკაშვილი, ბუჯიაშვილი
სინბინი: გოგოლაძე
ლოკომოტივი: ლ - ხელაია. გ - წიკლაური
სინბინი: ძნელაძე
მსაჯი: სულხან ჩიხლაძე

საქართველოს ჩემპიონი „ბეჭზე დადეს“. რუსთავის „ხარებმა“ კიდევ ერთი ფავორიტი დაამარცხა და საბოლოოდ დაამტკიცა, რომ წლეულს არათუ პლეი ოფში, არამედ ჩემპიონობისთვის ბრძოლის უნარიც შესწევს. თამაში, როგორც მოსალოდნელი იყო, დაძაბული და მცირექულიანი გამოდგა. გუნდებმა თითო ლელო მიითვალეს. „ხარებმა“ კი, მონაგარს ორი საჯარიმოც მიაყოლა და მრისხანე მეტოქეზე გამარჯვება ღირსეულად იზეიმა.

ლელო-აია 23:13
ლელო: 2ლ - კვირიკაშვილი, ტაბუცაძე. 3ს, 2გ - კვირიკაშვილი.
სინბინი: კვაჭაძე
აია: ლ - მანაგაძე. 2ს, გ - აბჟანდაძე.
სინბინი: დანგაძე, გობეჯიშვილი
მსაჯი: შოთა თევზაძე

საინტერესო და სანახაობრივად ლამაზი გამოდგა „ლელო არენაზე“ თბილისის „ლელოსა“ და ქუთაისის „აიას“ დაპირისპირება. პირველმა ტაიმმა თანაბარ ბრძოლაში ჩაიარა. თუმცა, სამქულიანი უპირატესობა შესვენების წინ მაინც „აიამ“ მოიპოვა - 13:10. მატჩის მეორე ნახევარში კი, უკვე მასპინძლები დომინირებდნენ. შედეგმაც არ დააყოვნა. მათ მონაგარს 13 ქულა მიუმატეს, რაზეც „აიამ“ ვერაფრით უპასუხა - 23:13. „ლელოს“ შემადგენლობაში შედეგიანობით ისევ ვეტერანი მერაბ კვირიკაშვილი გამოირჩა, რომელმაც გუნდს 18 ქულა მოუტანა (ერთი ლელო, სამი საჯარიმო და ორი გარდასახვა).

არმაზი-ვეფხვები 55:15
არმაზი: 8ლ - სპანდერაშვილი 2, მარჯანიშვილი 2, ხუროშვილი, დვალიშვილი, მინაშვილი, იაშაღაშვილი. 6გ, ს - ჯინჭველაშვილი.
ვეფხვები: 2ლ - ბებიაშვილი, შალიკაშვილი. ს, გ - ბროძელი.
სინბინი: ქაცანაშვილი
მსაჯი: ნიკა ამაშუკელი

უმაღლესი ლიგის დებიუტანტმა, პატარძეულის „ვეფხვებმა“ ძალიან კარგ ფორმაში მყოფი მარნეულის „არმაზის“ მძლავრ ზეწოლას ვერ გაუძლო და დიდი ანგარიშით დამარცხდა. არმაზელებმა შესანიშნავი ბურთაობა გვიჩვენეს და მეტოქეს რვა ლელო გაუტანეს. აქედან ორ-ორი მესამეხაზელი ილია სპანდერაშვილისა და გარემარბი კოტე მარჯანიშვილის ანგარიშზეა. რეზო ჯინჭველაშვილმა „არმაზის“ შემადგენლობაში ფულბეკის პოზიციაზე პირველად ითამაშა და გუნდს 21 ქულა შესძინა (ექვსი გარდასახვა და ერთი საჯარიმო).

ბათუმი-ჯიქი 24:20
ბათუმი: 3ლ - სიჭინავა (2), ჯაბნიძე. 3გ, ს - ნინიძე
სინბინი: სიჭინავა
ჯიქი: ხუციშვილი ხელია. 2გ - ფურცხვანიძე. 2ს - სვანიძე, ფურცხვანიძე
სინბინი: სუთიძე, ხუციშვილი
მსაჯი: საბა აბულაშვილი
„ბათუმმა“, თამამად შეიძლება ითქვას, რომ შინ დაგეგმილი გამარჯვება მოიპოვა და გალიდერდა. ანგარიში, ვფიქრობთ, სრულად არ ასახავს ძალთა თანაფარდობას. ბათუმელებმა მეტოქეს სამი ლელო გაუტანეს და მე-60 წუთამდე 24:3 იგებდნენ. ძნელი წარმოსადგენი იყო, რომ „ჯიქი“ დასკვნით 20 წუთში სამი ლელოს გატანას და მატჩის გადარჩენას შეძლებდა. მასპინძლებმა თამაშს აშკარად უკლეს, რითაც გორელებმა ისარგებლეს და ორი ლელოს გატანა შეძლეს. თუმცა, საბოლოოდ გამარჯვების მოსაპოვებლად აღარც დრო ეყოთ და აღარც ძალა შესწევდათ.

აკადემია-არმია 28:12
აკადემია: 2ლ - ახობაძე, მექერიშვილი, ლუარსაბიშვილი. 3ს, 2გ - მოძღვრიშვილი
სინბინი: მაზმიშვილი
არმია: 4ს - კობახიძე
სინბინი: კობახიძე
მსაჯი: თორნიკე გვირჯიშვილი

თბილისის „აკადემიამ“ მიმდინარე გათამაშებაში პირველად მოიგო. აკადემიელები უშუალო კონკურენტს, თბილისის „არმიას“ დაუპირისპირდნენ, სამი ლელო გაუტანეს და საპრემიო ქულაც მიითვალეს. აღსანიშნავია, რომ ამ მარცხის შემდეგ არმიელებმა ბოლო ადგილზე გადაინაცვლეს და უმძიმეს მდგომარეობაში არიან.

  ქ(ს)
1. ბათუმი 5 4 0 1 +74 19(3)
2. ლოკომოტივი 5 4 0 1 +69 19(3) 
3. ხარები 5 4 0 1 +41 18(2) 
4. არმაზი 5 3 0 2 +78 16(4) 
5. ლელო 5 4 0 1 +5 16(0)
6. აია 5 3 0 2 +35 14(2) 
7. ჯიქი 5 1 0 4 -38 7(3) 
8. აკადემია 5 1 0 4 -78 6(2)
9. ვეფხვები 5 1 0 4 -89 5(1)
10. არმია 5 0 0 5 -97 1(1) 


VI ტური
5 ოქტომბერი
ჯიქი-ვეფხვები 17:00
6 ოქტომბერი
ლელო-ლოკომოტივი 14:00
აია-ბათუმი 16:00
7 ოქტომბერი
ხარები-არმია 15:00
არმაზი-აკადემია 17:15

324
მკითხველის კომენტარები / 0 /
მსგავსი ამბები
რუბრიკის სხვა სიახლეები