დიდი 10. IX ტურის წინ: წრე ლიდერების გარეშე დასრულდება

ფოტოზე: აკადემიას სოსო მათიაშვილი დააკლდება

ეროვნული ნაკრების თამაშის პარალელურად საქართველოს ჩემპიონატის მე-9 ტურის მატჩები გაიმართება. ამით პირველი წრე სრულდება.

პირველი წრის ბოლო ტურს დღეს თბილისის "ლოკომოტივისა" და "არმიის" დაპირისპირება გახსნის. რკინიგზელები დღესდღეობით, სატურნირო ცხრილში მესამე ადგილზე არიან. თუმცა მათ "ბათუმთან" შინ გასამართი მატჩი თადარიგში აქვთ. "ლოკომოტივი" თავის "ამპლუაშია", პლეი ოფში მოხვედრისთვის იბრძვის. "არმიას" კი უჭირს. მათ მხოლოდ ორი მატჩი მოიგეს და ბოლოსწინა ადგილზე იმყოფებიან.

რკინიგზელებს ეროვნულ ნაკრებში მივლენილი მოთამაშეები ბექა წიკლაური და გიორგი ბეგაძე დააკლდებიან.

ტურის ცენტრალური მატჩი შაბათს, ქუთაისში გაიმართება. ლიდერი ქუთაისის "აია" რუსთავის "ხარებს" უმასპინძლებს. ქუთათურებმა წლევანდელ გათამაშებაში მარცხის სიმწარე არ იციან და ეცდებიან, პირველი წრე ასპროცენტიანი შედეგით დაასრულონ. დანაკლისი ორივე გუნდს აქვს. "აიას" ფულბეკი მირიან მოდებაძე აკლია, "ხარებს" - გიორგი კოშაძე. ორივე ეროვნულ ნაკრებშია გამოძახებული.

შაბათსვე, თბილისის "ლელო" მარნეულის "არმაზს" უმასპინძლებს "ლელო არენაზე". ლელოელები ბოლომდე ბრძოლით და დაუცხრომელი ჟინის წყალობით, რვა თამაშიდან ექვსი მოგებით მეორე ადგილზე არიან. არმაზელებს პლეი ოფში მოხვედრის ამბიცია კი აქვთ, მაგრამ მეექვსე-ადგილოსან "ჯიქს" უკვე შვიდი ქულით ჩამორჩებიან.

"ლელოს" ეროვნულ ნაკრებში გამოძახებული მერაბ კვირიკაშვილი და ალექსანდრე თოდუა დააკლდება. "არმაზს" კი გიორგი კვესელაძე და რეზო ჯინჭველაშვილი არ ეყოლება.

კვირას საინტერესო იქნება "ბათუმისა" და ქვეყნის მოქმედი ჩემპიონის, გორის "ჯიქის" დაპირისპირება. უცნაურია, მაგრამ ჩემპიონი გუნდიდან ეროვნული ნაკრების გაფართოებულ შემადგენლობაშიც ვერავინ მოხვდა. ბათუმელები ლიდერებს, მგეზავ ლაშა ხმალაძეს და მესამეხაზელ გიორგი თხილაიშვილს მოისაკლისებენ.

თბილისის "აკადემია" მეცხრე ტურში შინ მიიღებს აუტსაიდერ ქუთაისის "ბაგრატს" და შანსი ეძლევა, სახიფათო ზონას ოდნავ მოსცილდეს. აკადემიელებმა პირველი გამარჯვება მე-8 ტურში მოიპოვეს. მეორე გამარჯვების მიღწევაში კი მათ გუნდის ლიდერი სოსო მათიაშვილი ვერ დაეხმარება.

დიდი 10. IX ტური
17 ნოემბერი
ლოკომოტივი-არმია

18 ნოემბერი
ლელო-არმაზი
აია-ხარები

19 ნოემბერი
აკადემია-ბაგრატი
ბათუმი-ჯიქი

ა გ თ მ ფ წ ბ ქ(პ)
1. აია 8 8 0 0 +132 33(1)
2. ლელო 8 6 0 2 +44 26(2)
3. ლოკომოტივი 7 5 0 2 +66 24(4)
4. ბათუმი 7 4 1 2 +99 23(5)
5. ხარები 8 5 0 3 -16 21(1)
6. ჯიქი 8 4 0 4 +16 21(5)
7. არმაზი 8 2 1 5 -28 14(4)
8. აკადემია 8 1 0 7 -39 10(6)
9. არმია 8 2 0 6 -103 9(1)
10. ბაგრატი 8 1 0 7 -171 5(1).

ყოველდღიური სპორტული გაზეთი "ლელო"
494
მკითხველის კომენტარები / 0 /
მსგავსი ამბები
რუბრიკის სხვა სიახლეები