დიდი 10. X ტურის წინათქმა: მეორე წრე ფავორიტების ჯახით გაიხსნება

* დღეს თბილისსა და ბათუმში საქართველოს ჩემპიონატის II წრე დაიწყება.
* კლუბებს ეროვნული ნაკრების მორაგბეები უბრუნდებიან.
* სამაგიეროდ, მათ დააკლდებათ შვიდკაცა რაგბის ნაკრების წევრები.
* ტურის ცენტრალურ მატჩში "ლოკომოტივი" ქუთაისის "აიას" მასპინძლობს.

ნოემბრის ტესტები დასრულდა და დღეს საქართველოს ჩემპიონატი მეორე წრის პირველი ტურის მატჩებით განახლდება.

კლუბებს ეროვნული ნაკრების მოთამაშეები დაუბრუნდნენ. თუმცა, სრულყოფილი შემადგენლობები მაინც არ იქნება, რადგან შვიდკაცა რაგბის ნაკრები, რომელიც მთლიანად საქართველოს ჩემპიონატში მონაწილე მორაგბეებითაა დაკომპლექტებული, საერთაშორისო ტურნირზე საასპარეზოდ დუბაიში გაემგზავრა.

* * *
მე-10 ტურის პირველი მატჩი ბათუმში გაიმართება, სადაც ადგილობრივი გუნდი მარნეულის "არმაზს" დაუპირისპირდება. მასპინძლებს მგეზავი ლაშა ხმალაძე დააკლდებათ, რომელიც ეროვნულ ნაკრებში უელსთან გასვლით მატჩში დაშავდა. მის ადგილს ფულბეკი ბახვა კობახიძე დაიკავებს. სხვა დანაკლისი "ბათუმს" არ აქვს.

საბრძოლო შემადგენლობით იასპარეზებს "არმაზი". გუნდს ნაკრების წევრები, რეზო ჯინჭველაშვილი და გიორგი კვესელაძე დაუბრუნდნენ. აშშ-ისთან მატჩის წინ გაფართოებულ შემადგენლობაში იყო მიწვეული შუამარბი ბადრი ლიპარტელიანი. ორივე გუნდის უკანა ხაზი სოლიდურად გამოიყურება და, წესით, საინტერესო, სანახაობრივი მატჩი უნდა გამოდგეს.

"ბათუმის" მიზანი საპლეიოფო ექვსეულში პოზიციის გამყარება და მომავალ უქმეებზე, 9 დეკემბერს სტუმრად იტალიურ "ვიადანასთან" მატჩისთვის სათანადოდ მომზადებაა. "არმაზს" კი, პლეი ოფში მოხვედრისთვის დიდი ბრძოლის გადატანა მოუწევს. თუმცა, საუკეთესო ექვსეულში შესვლის შანსს ჯერ კიდევ ინარჩუნებს.

პირველ წრეში ამ გუნდების მატჩი თბილისში ფრედ დასრულდა - 13:13.

* * *
ტურის ცენტრალური მატჩი თბილისში, დღეს, "ავჭალის სარაგბო სტადიონზე" გაიმართება, სადაც თბილისის "ლოკომოტივი" მიმდინარე ჩემპიონატში ჯერაც დაუმარცხებელ ქუთაისის "აიას" უმასპინძლებს.

"ლოკომოტივს" ამ მატჩში შვიდკაცა რაგბის ნაკრებში მიწვეული უკანახაზელი ლევან გოგოლაშვილი დააკლდება. სამაგიეროდ, ტრავმა მოიშუშა და ძირითად შემადგენლობაში ითამაშებს გარემარბი გიორგი აფციაური. ეროვნული ნაკრებიდან გუნდს დაუბრუნდა რკინიგზელთა ლიდერი, ფულბეკი ბექა წიკლაური.

დანაკლისი "აიასაც" აქვს. ირლანდიაში მგეზავ თედო აბჟანდაძის გადაბარგების შესახებ უკვე ვწერდით. შვიდკაცა რაგბის ნაკრებშია მიწვეული ქუთათურთა მთავარი მელელოვე გარემარბი გიორგი აბრამიძე და ახალგაზრდა უკანახაზელი ოთარ ძაგნიძე. სანაცვლოდ, ეროვნული ნაკრებიდან დაბრუნდა ფულბეკი მირიან მოდებაძე.

"ლოკომოტივი", მართალია, მესამე ადგილზეა და "აიას" რვა ქულით ჩამორჩება, მაგრამ ერთი თამაში თადარიგში აქვს. რკინიგზელებმა შინ "ბათუმს" უნდა უმასპინძლონ. ცხადია, ორივე, "აიაც" და "ლოკომოტივიც" გათამაშების ფავორიტები არიან და ნებისმიერი სხვა ადგილი პირველის გარდა წარუმატებლად შეიძლება ჩაითვალოს. ამდენად, დღევანდელი მატჩის მნიშვნელობა განუზომლად დიდია.

პირველ წრეში ეს გუნდები ქუთაისში შეხვდნენ ერთმანეთს და "აიამ" მძიმე ბრძოლაში 20:17 მოიგო.

* * *
შაბათს ორი მატჩია. თბილისის "ლელო" საკუთარ "ლელო არენაზე" აუტსაიდერს, ქუთაისის "ბაგრატს" უმასპინძლებს. ქვეყნის ჩემპიონი გორის "ჯიქი" კი, ასევე საშინაო არენაზე მიიღებს რუსთავის "ხარებს".

"ლელოს" ნაკრების წევრები მერაბ კვირიკაშვილი და ალექსანდრე თოდუა დაუბრუნდებიან. სამაგიეროდ, შვიდკაცა რაგბის ნაკრებშია მიწვეული ასევე ორი ლელოელი, გარემარბი აკაკი ტაბუცაძე და მესამეხაზელი ბექა საღინაძე. სხვა მხრივ, "ლელოს" შემადგენლობა ისედაც თითქმის მთლიანად ახალგაზრდულია. მიუხედავად ერთგვარი საკადრო პრობლემებისა, გუნდმა ცხრიდან შვიდი მატჩი მოიგო.

"ბაგრატის" სატურნირო მდგომარეობიდანაც კარგად ჩანს, რომ გუნდს სერიოზული პრობლემები აქვს. სტუმრად, "ლელოსთან", ცხადია, ფავორიტი ის ვერ იქნება. თუმცა, ქუთაისურ გუნდს დასაკარგიც არაფერი აქვს და, სავარაუდოდ, მეტოქეს სერიოზულ ბრძოლას გაუმართავს. პირველ წრეში, "ლელომ" ქუთაისში "ბაგრატს" 31:16 მოუგო.

* * *
ყველაზე მეტად შვიდკაცა რაგბის ნაკრებმა ქვეყნის ჩემპიონი, გორის "ჯიქი" დააზარალა. დუბაიში გორელთა ლიდერები ნიკა ბიწაძე, ირაკლი სვანიძე და გიორგი მჭედლიშვილი გაემგზავრენენ. რამდენად შეძლებს გორელთა გუნდი ამ დანაკლისის შევსებას ძნელი სათქმელია. მით უფრო, რომ "ხარები" წლეულს შესანიშნავად გამოიყურებიან და ნებისმიერ მეტოქეს უქმნიან პრობლემებს.

რუსთაველებს ასევე შვიდკაცა რაგბის ნაკრებში გამოძახებული გურამ ქანდაურაშვილი დააკლდება. სამაგიეროდ გუნდს დაუბრუნდა ეროვნული ნაკრებიდან უკანახაზელი გიორგი კოშაძე. მწყობრშია ცხრა ნომერი ვაჟა ხუციშვილი, რომლის სწორი და გააზრებული თამაში, მნიშვნელოვანწილად განსაზღვრავს რუსთაველთა წარმატებას.

ამ გუნდებს შორის პირველი წრის მატჩში, რუსთავში, "ხარებმა" ჩემპიონს 27:21 მოუგო.

* * *
მე-10 ტურს კვირას, თბილისური გუნდების, "აკადემიასა" და "არმიას" შორის დაპირისპირება დაასრულებს. ორივე გუნდიდან შვიდკაცა რაგბის ნაკრებში თითო მოთამაშეა მიწვეული: ნიკო აფციაური (არმია) და საბა შუბითიძე (აკადემია). აკადემიელებს ეროვნული ნაკრებიდან გუნდის ლიდერი სოსო მათიაშვილი დაუბრუნდა, რომელიც ნოემბრის ტესტებზე "ბორჯღალოსნებს" შორის ერთ-ერთი გამორჩეული იყო.

"აკადემია" საპლეიოფო ექვსეულთან სხვებზე მეტად არის ახლოს. ამიტომ, "არმიასთან" მატჩის მოგება მათ პლეი ოფის ზონას კიდევ უფრო დააახლოებს. "არმიას" კი, საქმე ისე წაუვიდა, თავი აქვს გადასარჩენი. წინ ჯერ კიდევ ცხრა ტურია და, შესაბამისად, შანსიც დიდია, რომ სახიფათო ზონას თავი დააღწიოს.

დიდი 10. X ტური
1 დეკემბერი
ლოკომოტივი-აია
ბათუმი-არმაზი

2 დეკემბერი
ლელო-ბაგრატი
ჯიქი-ხარები

3 დეკემბერი
აკადემია-არმია.

500
მკითხველის კომენტარები / 0 /
მსგავსი ამბები
რუბრიკის სხვა სიახლეები