დიეგო სიმეონე: რატომ არ უნდა მინდოდეს მესის გაწვრთნა?! დადგება დღე, როცა არგენტინის ნაკრებს ჩავიბარებ!..

ბევრი ამბობს, რომ პიროვნული თვალსაზრისით, ლიონელ მესი და დიეგო სიმეონე აბსოლუტურად განსხვავებული ინდივიდები არიან. ფაქტი ისაა, რომ სიმეონეს ძალიან მოსწონს მესის თამაში და, რა თქმა უნდა, ამაში ის ორიგინალური არ არის. თუმცა "ჩოლო" ერთ-ერთი პირველი იყო, ვინც მოუწოდებდა ლეოს, რომ დაბრუნებოდა საერთაშორისო ასპარეზს და ძალიანაც გაიხარა, როცა ეს ასეც მოხდა.

TyC Sports-თან ინტერვიუში მადრიდის "ატლეტიკოს" დამრიგებელმა არ გამორიცხა, რომ ერთ დღეს, შეიძლება, მშობლიური ქვეყნის ნაკრები გაწვრთნას და, რა თქმა უნდა, მას ძალიან ხიბლავს მესისთან მუშაობის პერსპექტივა.

"ფაქტია, არგენტინის საფეხბურთო ასოციაციას ჩემთვის არასოდეს შემოუთავაზებია ეროვნული გუნდის გაწვრთნა. ვერ დავმალავ - ნამდვილად მინდა არგენტინის ნაკრების გაწვრთნა, მაგრამ აქ არის ძალიან ბევრი ნიუანსი, რომელიც აუცილებლად უნდა გავითვალისწინოთ. ამ დროისთვის ჩვენი მიზანი ერთია - უნდა დავწეროთ მადრიდის "ატლეტიკოს" ისტორია და, დარწმუნებული ვარ, ამას აუცილებლად შევძლებთ".

სიმეონემ ღიად განაცხადა, რომ ის არავითარ ყურადღებას არ აქცევს მის გარშემო გავრცელებულ ჭორებს. მაგალითად, ძალიან ბევრი იწერებოდა იმის თაობაზე, რომ არგენტინელი სპეციალისტი მილანის "ინტერში" გადაბარგდებოდა, მაგრამ სიმეონე ამბობს, რომ ის "ატლეტიკოშიც" ძალიან ბედნიერია. ახლა კი ისევ არგენტინის ნაკრებზე:

"მჯერა, დადგება ის მომენტი, როცა შეიძლება ჩავიბარო არგენტინის ეროვნული გუნდი. ეს არის ჩემი ოცნება და ძალიან დიდი იმედი მაქვს, რომ ეს ოცნება ერთ დღესაც ამისრულდება. ჯერჯერობით კი მირჩევნია, საკლუბო სისტემაში ვიმუშაო და ყოველი დღე დატვირთული მქონდეს", - ამბობს სიმეონე.

არგენტინის ნაკრების მწვრთნელობა კი მესის გაწვრთნას ნიშნავს. სიმეონემ ამაზე თქვა: "რა თქმა უნდა, "კოპა ამერიკაზე" ის გუნდის ნამდვილი ლიდერი იყო. მას დიდი ტვირთი ჰქონდა მხრებზე და ამაში ყველა დამეთანხმება. ახლა არ შევუდგები მესის მიერ გაკეთებული განცხადებების კომენტირებას. შეიძლება, ეთანხმებოდე მათ, ან შეიძლება - არა. ფაქტი ისაა, რომ ყველას შეუძლია, თავისებურად იფიქროს. მესი ნამდვილი ლიდერია. ის მსოფლიოს საუკეთესო ფეხბურთელია და არ მესმის, რატომ არ უნდა მინდოდეს მისი გაწვრთნა?", - ამბობს სიმეონე.

ყოველდღიური სპორტული გაზეთი "ლელო"
762
მკითხველის კომენტარები / 0 /
მსგავსი ამბები
რუბრიკის სხვა სიახლეები
;