დინამო-არისი. ირაკლი ხოშტარია: არისი ახალი შეკრებილი, მაგრამ ძლიერი გუნდია

საკალათბურთო ჩემპიონთა ლიგაზე საქართველოს ჩემპიონი დინამო პირველ მატჩს გამართავს.

ეს იქნება პირველი საკვალიფიკაციო ეტაპი, რომლის ბარიერადაც დინამოს წინ ბერძნული არისია.

საქართველოს ჩემპიონებმა მატჩის წინა დღეს ღია ვარჯიში გამართეს. შემადგენლობაში ბევრი ახალგაზრდა და ბევრიც ლეგიონერია. უფრო ზუსტად - ხუთი უცხოელია, ოთხი ამერიკელი, ერთიც ხორვატი. მათ გვარებს დინამოს განაცხადში გაეცნობით.

აქ კი გეტყვით, რომ მატჩი 20 სექტემბერს 19 საათზე თბილისის სპორტის სასახლეში გაიმართება, იქ, სადაც 16-ში საქართველოს ნაკრებმა საბერძნეთთან დიდი დრამა გაითამაშა.

ამ მატჩის მონაწილეთაგან დინამოში არიან მიხეილ ბერიშვილი, მერაბ ბოქოლიშვილი და მიხეილ ჭოჭუა.

- საოცრად ემოციური მატჩი გამოვიდა, საქართველოს ნაკრები გამარჯვებასთან ახლოს იყო. თუმცა ბოლო წამებზე მოხდა ის, რაც ძალიან იშვიათად ხდება, - გვითხრა ბოქოლიშვილმა და დასძინა:

- გვაქვს თუ არა დინამოსთან ერთად რევანშის შანსი? გვაქვს, მაგრამ არისი ძლიერი გუნდია და მის დასამარცხებლად ძალების მაქსიმალური მობილიზება დაგვჭირდება. ჩვენ ცდას არ დავაკლებთ.

დინამოს მთავარ მწვრთნელს, ირაკლი ხოშტარიას საკუთარი გუნდის მდგომარეობაზეც ვკითხეთ და მეტოქის შესახებაც.

- არისი ძლიერი გუნდია, დაახლოებით ისეთი, როგორიც ჩვენი შარშანდელი საპლეიოფო მეტოქე ხუვენტუდი. შემადგენლობაში გასული სეზონის შემდეგ სერიოზული ცვლილებები განხორციელდა და რთულია მის რეალურ შესაძლებლობებზე ლაპარაკი. დინამოს ლეგიონერები ეტაპობრივად შემოგვიერთდნენ, მოსამზადებლად და შესათამაშებლად ცოტა დრო გვქონდა. ჩვენი მთავარი ამოცანა იყო ახალი სეზონის წინ ფიზიკური კონდიციები გაგვეუმჯობესებინა. ამის მიუხედავად, მატჩს ოპტიმიზმით ვხვდებით. გულშემატკივარს ბოლომდე ბრძოლას ვპირდებით.

ბილეთები: tkt.ge

ყოველდღიური სპორტული გაზეთი "ლელო"
1258
მკითხველის კომენტარები / 0 /
მსგავსი ამბები
რუბრიკის სხვა სიახლეები
;