დინამო (ბთ)-დილა 1:0 - გრიგალაშვილის სამქულიანით...

ბათუმის "რაგბი არენაზე" გამართულ ამ შეხვედრას ცხრილის ფსკერზე მყოფი გუნდებისთვის დიდი მნიშვნელობა ჰქონდა, რადგან მერვეადგილოსანი ბათუმის "დინამო" კონკურენტს, ერთი ადგილით წინ მდგომ "დილას" მასპინძლობდა, რომელსაც 5 ქულით ჩამორჩებოდა.

ბოლო პერიოდში "დილამ" ხუთიდან 4 შეხვედრა მოიგო და მხოლოდ ერთში დამარცხდა. აჭარლებმა უკანასკნელი 5 მატჩიდან ერთი მოიგეს, მდგომარეობა საგრძნობლად გაირთულეს და პლეი აუტის ზონაში მოხვდნენ. ამდენად, ორივე გუნდს გამარჯვება ჰაერივით ესაჭიროებოდა.


მთელი თამაში გარდამავალი უპირატესობით მიმდინარეობდა და გატანა ორივე გუნდს შეეძლო. ბათუმელებმა ეს ელგუჯა გრიგალაშვილის გოლით მოახერხეს.

ის მხოლოდ ამის გამო არ არის გამოსარჩევი - ეროვნულ ნაკრებში ნათამაშები 27 წლის ფეხბურთელი ფორმაში შედის და ამ შეხვედრაში საუკეთესოც იყო. არაორდინარული გადაწყვეტილებებითა და სასარგებლო თამაშით გრიგალაშვილი ბათუმელებისთვის შეუცვლელ მოთამაშედ იქცა და თუ საუკეთესო ფიზიკურ კონდიციებს მიაღწევს, შეიძლება, ნაკრებშიც დაბრუნდეს.

დინამო ბთ
1
დილა
0

გოლი: 1:0 გრიგალაშვილი (57)

დინამო (4-2-3-1): ტიმოფეევი - ფარტენაძე, მგელაძე, ქორიძე, სუხიაშვილი - ვარშანიძე, შონია - ტვილდიანი, ე. გრიგალაშვილი, კვასოვი (66. არზიანი/86. გ. ქავთარაძე) - მარცვალაძე (74. ფლამარიონი).
სათადარიგოები: შოვნაძე, ვ. თევდორაძე, ჩოგაძე, კვანტალიანი
მწვრთნელი: კონსტანტინ ფროლოვი
დილა (4-2-3-1): მუჯრიშვილი - მაჩაიძე, აბუბაკარი, კვახაძე, მორასი - რაზმაძე (64. ფლავიო), პედრინიო (46. პაპავა) - ნონიკაშვილი (74. გოგატიშვილი), წიქარიძე, კირკიტაძე - ფანცულაია.
სათადარიგოები: ბეგაშვილი, კუსიანი, ჰეიფორდი, აშორტია
მწვრთნელი: გიორგი დარასელია
გაფრთხილება: მგელაძე (35), ვარშანიძე (70), მაჩაიძე (73), მორასი (86)
გაძევება: მაჩაიძე (89. დილა)
არბიტრი: ბ. ნინუა

ძალიან კარგი მატჩი ჩაატარა ბათუმელთა მეკარე ანატოლი ტიმოფეევმაც, რომელმაც რამდენიმე ეპიზოდში გუნდი აშკარა გოლისგან იხსნა.

მისი მთავარი შემწუხებელი თენგიზ წიქარიძე იყო, რომელიც გორელებისგან უდავოდ გამოსარჩევია. ამ 21 წლის ნახევარმცველის დაბრუნება გუნდს აშკარად დაეტყო. წიქარიძე კარგად ხედავს მოედანს, შეუძლია არაორდინარული გადაწყვეტილებების მიღება და შეტევებსაც ამწვავებს. ის "დილას" ერთ-ერთი ლიდერია და ცუდი არ იქნება, თუ მისით ახალგაზრდულ ნაკრებში დაინტერესდებიან. მას არც პრაქტიკა აკლია და არც პერსპექტივა.


სამწუხარო ამბავი მოუვიდა ზურაბ არზიანს: 66-ე წუთზე შესულმა ტრავმა მიიღო და 20 წუთში დატოვა მოედანი.

მატჩის სტენოგრამა

20" - მეკარე ტიმოფეევმა ბათუმელები გადაარჩინა! წიქარიძე საჯარიმოში მარცხენა ფლანგიდან შეიჭრა და მშვენიერი გადაცემით პენალტის ნიშნულთან პედრინიო მოძებნა, ვის მიერ ძლიერად დარტყმულზე კიპერმა დროული რეაქცია გამოავლინა და ბურთი კუთხურზე მოიგერია.
27" - მარცვალაძის საჯარიმო დარტყმა. მუჯრიშვილი ბურთს ხელში ვერ იმაგრებს, მაგრამ ახლოს არავინ იყო და ადვილად ეუფლება მას.
39" - გრიგალაშვილი მშვენიერ პასს აწვდის საჯარიმოში გახსნილ კვასოვს, რომელიც მახვილი კუთხიდან კარს აცილებს.
48" - ორ მცველს შორის მოქცეული პაპავა კარში ურტყამს და ტიმოფეევი ბურთს კუთხურზე იგერიებს.
54" - წიქარიძე ორ მცველს ეფექტურად გასცდა და მეკარესთან, ფაქტობრივად, მარტო დარჩენილი მახვილი კუთხიდან ურტყამს - ტიმოფეევი ისევ საიმედოა.
58" - გოლი! გრიგალაშვილი საჯარიმოს სიახლოვეს იღებს ბურთს და თავისუფლად ურტყამს კარში - 1:0.
60" - გრიგალაშვილი ისევ შორიდან ცდილობს კარის აღებას. მუჯრიშვილი ბურთს კუთხურზე იგერიებს.
80" - გორელთა სწრაფ კონტრშეტევას კირკიტაძე ზუსტად ვერ აგვირგვინებს.
81" - მცველის მიერ ცუდად მოგერიებულ ბურთს წიქარიძე დაუხანებლად გზავნის კარში - ტიმოფეევი ურთულეს დარტყმას იგერიებს.
87" - ქავთარაძის დარტყმული მცირე მანძილით სცდება კარს.
89" - მაჩაიძე ჯერ ფლამარიონს აჩერებს წესების დარღვევით, შემდეგ - ქავთარაძეს. მეორე ყვითელი ბარათი და გაძევება!

ყოველდღიური სპორტული გაზეთი ლელო

1201
მკითხველის კომენტარები / 0 /
მსგავსი ამბები
რუბრიკის სხვა სიახლეები