[დინამო ბთ vs საბურთალო] წინასამატჩო. ჯიღაური რთული მატჩის მოლოდინშია, გაბედავას ანგისას ატმოსფერო მოსწონს

დღეს ეროვნული ლიგის XXVIII ტურის ცენტრალური მატჩი ბათუმში გაიმართება, რომელიც სატურნირო თვალსაზრისით, შესაძლოა, მთელი სეზონის ერთ-ერთი უმნიშვნელოვანესი დაპირისპირებაც გამოდგეს - ანგისაში ბათუმის "დინამოს" "საბურთალოს" უმასპინძლებს.

მიმდინარე გათამაშების ლიდერი მოქმედი ჩემპიონის წინააღმდეგ, ხოლო მასწავლებელი (გია გეგუჩაძე) შეგირდის (გიორგი ჭიაბრიშვილი) წინააღმდეგ, რომელიც დიდი ხანია მოსწავლის ჩრდილიდან გამოვიდა და დამოუკიდებლადაც მოიპოვა ტიტულები.

ბათუმის "დინამომ" (55 ქულა) ზედიზედ მე-5 მატჩი მოიგო და ერთპიროვნული ლიდერია, ხოლო "საბურთალო" (51 ქულა) მესამეზეა. მასპინძლებს ლიდერობის განმტკიცება და მოქმედი ტრიუმფატორის საჩემპიონო რბოლიდან ჩამოშორება უნდათ, ხოლო თბილისელებს - ჩამორჩენის მინიმალურამდე შემცირება.

მოკლედ, დღეს ანგისას ბაზაზე კარგი თამაშისა და ანშლაგის მოლოდინში ვართ. "ლელო" ორივე გუნდის მოთამაშეებს გაესაუბრა...

ჯაბა ჯიღაური
მჯერა, ბათუმელებს იმედებს გავუმართლებთ

ჯაბა ჯიღაური ბათუმის "დინამოში" წლეულს გადავიდა და გუნდის საკვანძო მოთამაშე გახდა. საქართველოს ნაკრების ნახევარმცველის გამოცდილება ეროვნულ ჩემპიონატში უცებ გამოჩნდა და გუნდს ძალიან წაადგა:

- პარასკევის მატჩთან დაკავშირებით ვილაპარაკოთ. როგორი განწყობით ხვდებით თამაშს?

- მატჩს ჩვენც და მთელი ბათუმიც ელოდება. იმედი გვაქვს, მოვიგებთ და საჩემპიონო ბრძოლაში უპირატესობას კიდევ უფრო გავზრდით. ყველაფერს გავაკეთებთ იმისთვის, რომ 3 ქულა ბათუმის "დინამოს" დარჩეს.

- ეს მატჩი საჩემპიონო ბრძოლაში გადამწყვეტი შეიძლება გამოდგეს?

- ჩვენ თუ მოვიგებთ, "საბურთალოსთან" სხვაობას გავზრდით და ეს მნიშვნელოვანია. მაგრამ ჩვენი უშუალო კონკურენტია თბილისის "დინამო", რომელსაც ერთი ქულით ვუსწრებთ. ჩემპიონატი კი ისეთი არაპროგნოზირებადია, კონკურენტთან მოგების შემდეგაც კი გამიჭირდება იმის თქმა, რომ ჩემპიონობას ძალიან მივუახლოვდით. ამის შემდეგ კიდევ 8 მატჩი გვექნება ჩასატარებელი, წინასწარ კი 3 ქულა გარანტირებული არც ერთ მეტოქესთან  არ გვაქვს. ყველა იბრძვის. წელს რამდენი შემთხვევა იყო, ლიდერებს აუტსაიდერებმა ქულები რომ წაართვეს. ბოლომდე მობილიზებული თუ არ ვიქნებით, მოგება ნებისმიერ გუნდთან გაჭირდება.

- "საბურთალოზე" რას იტყვით?

- მის თამაშებს ვუყურე და ძლიერი გუნდია, კვალიფიციური მწვრთნელი ჰყავს... "საბურთალო" კომბინაციურ ფეხბურთს აჩვენებს. შემადგენლობის კარგი სინთეზიცაა - ყველა რგოლში დაბალანსებულია და გამოცდილ ბიჭებთან ერთად ნიჭიერი ახალგაზრდებიც ჰყავთ.

- "საბურთალოში" ვის გამაორჩევდით და ვისგანაა ყველაზე მეტი ხიფათი მოსალოდნელი?

- ბევრი საინტერესო მოთამაშე ჰყავთ - რეხვიაშვილი, გაბედავა... ფლანგებზეც ძალიან კარგი ახალგაზრდები თამაშობენ - მალიც ძალიან მომწონს და ლაკვეხელიანიც... ნახევარდაცვაც კარგია, საინტერესო ფეხბურთელები არიან თავდასხმაშიც... მოკლედ, ძალიან რთული თამაშის მოლოდინში ვართ, მაგრამ მჯერა, ბათუმელი გულშემატკივრებს იმედებს გავამართლებთ, მოვიგებთ და ლიდერობას შევინარჩუნებთ.

- საფრანგეთის შემდეგ საქართველოში თამაში ძალიან გაგიადვილდათ?

- თამაში ადვილი არსად არ არის. მაგრამ საფრანგეთში მართლა მაღალი დონეა.

- პირობები?

- ვერ ვიტყვი, რომ "გრენობლს" საუკეთესო პირობები და ბაზა ჰქონდა, რადგან დაბალი ლიგიდან დაწინაურდა და პრეზიდენტიც დიდად ფულს არც ხარჯავდა. სულ ორი მოედანი გვქონდა - ბუნებრივი და ხელოვნური, მაგრამ მთავარია, ორივეზე ძალიან კარგი საფარი იყო - ბალახის მოედანზე არაფერს ვამბობ, ხალიჩაც მაღალი ხარისხის იყო. მაგრამ საფრანგეთი ისეთი დიდი სახელის მქონე საფეხბურთო ქვეყანაა, მოთამაშეების ჩაყვანა არ უჭირთ.

- ფიზიკაში დიდი სხვაობა იქნება და კარგადაც ამზადებენ...

- რა თქმა უნდა, ძალიან კარგად ამზადებენ. სხვათა შორის, აფრიკიდან მინიმალური ანაზღაურებით ისეთი ფეხბურთელები ჩაჰყავთ, 90 წუთი დარბიან და არ იღლებიან. აფრიკელებს ძალიან მაგარი ორგანიზმი აქვთ. მინახავს ფეხბურთელები, თამაშიდან თამაშამდე მაქსიმუმ 2 დღეს ვარჯიშობდნენ, მაგრამ მოედანზე გადიოდნენ და მაინც მაგრად დარბოდნენ. ერთხელ, ტრენაჟორების დარბაზში შესვლამდე აფრიკელ თანაგუნდელს  გავეხუმრე - შემოდი, შენც ივარჯიშე, ფიზიკურად მოღონიერდი-მეთქი. მითხრა, ჩვენ ამის საჭიროება არ გვაქვს, ძალა და ღონე ბუნებრივად გვაქვსო. ასეც არის.

გიორგი გაბედავა
ჩემპიონატს სწორედ ასეთი გულშემატკივრობა აკლია

"საბურთალოს" თავდამსხმელი გიორგი გაბედავა თავისი ყოფილის გუნდის წინააღმდეგ ითამაშებს. გასული სეზონის საუკეთესო ბომბარდირი და ფეხბურთელი მეტოქის მიმართ პატივისცემას გამოხატავს, თუმცა ამბობს, რომ საჩემპიონო ბრძოლაში შანსებს გასაზრდელად , "საბურთალოს" მხოლოდ მოგება აწყობს:

- ბათუმში თამაში ყველა გუნდს უჭრს. ახლა კიდვე უფრო რთული თამაში იქნება, რადგან თვენი მეტოქე ჩემპიონობის მოსაპოვებლად იბრძვის და თანაც, გვერდში ძალიან მაგარი მაყურებელი  უდგას.

- რა თქმა უნდა, ძალიან რთული შეხვედრა იქნება. ჩვენ დასაკარგი არაფერი გვაქვს, რადგან საჩემპიონო ბრძოლაში ისედაც ბევრი საჭირო ქულა დავკარგეთ და მეტის დაკარგვის უფლება აღარ გვაქვს. სხვაგვარად, ძალიან გაგვიჭრდება.

- ქუთაისის "ტორპედოსთან" მოპოვებული ქულა და იმედგაცრუება განწყობაზე არ აისახება?

- 3 ქულა გვჭირდებოდა, მაგრამ მოგება ვერ შევძელით და  ეს ძალიან არასასიამოვნო იყო. რა თქმა უნდა, გულდაწყვეტილები ვართ. მაგრამ ჯერ არ გვაქვს იმის დრო და უფლება, რომ დაკარგულ ქულებზე ვიფიქროთ - ეს არაფერს გვარგებს და რტაც მთავარია, ამით საქმეს არაფერი ეშველება. "საბურთალო" ჩემპიონობისთვის ბრძოლას ვაგრძელებთ და სანამ ამის თეორიული შანსი იქნება, იმედს არ ვკარგავთ.

- ბათუმის "დინამოზე" რას იტყვით?

- წელს გია გეგუჩაძემ ძალიან კარგი შემადგენლობა შეკრიბა და ძალიან ძლიერი გუნდიც ჩამოაყალიბა. რომელ პოზიციასაც არ უნდა გადახედო, ყველგან ძალიან კარგი მოთამაშეები ჰყავთ, მათ შორის, საქართველოს ნაკრებში ნათამაშები ფეხბურთელებიც. ეს ბევრს ნიშნავს და შემთხვევითი არ არის, რომ პირველობის პრეტენზია აქვთ და ჩემპიონობისთვის რომ იბრძვიან, დამსახურებულადაც ლიდერობენ.

- ანგისაში თამაში რთულია ბათუმელთა გუშემატკივრის გამოც. რეალურად, ეს "დინამოს" მე-12 მოთამაშეა, რომლის ზეწოლასაც ჯერ ვერავინ გაუძლო.

- რა თქმა უნდა, ასეთი ქომაგის წინაშე თამაში რთულია, მაგრამ სირთულეზე მეტად სასიამოვნოა. საქართველოს ჩემპოიონატს ასეთი გარემო და მაყურებელი ძალიან აკლია და სავსე ტრიბუნების წინაშე თამაში ძალიან სასიამოვნოა. რაც ბათუმის "დინამო" ანგისაში გადავიდა, მას შემდეგ მე იქ არ მითამაშია. წელს სეზონი პოლონეთში დავიწყე და ამის გამო პირველი ნახევარი არ ჩამიტარებია. ამიტომ იმის ინტერესიც მაქვს, როგორი გარემოა.

- ასეთ მეტოქესთან ასეთი გულშემატკივრის ფონზე "საბურთალოს" მოგების რა შანსი აქვს?

- თუ არ იბრძოლე, შანსი არავისთან გექნება. "საბურთალო" კი ბოლო წლებში ძლიერ გუნდად ჩამოყალიბდა, რომელიც უშანსოდ არც ერთ გუნდთან არ არის. ამიტომ ბათუმის "დინამოს" მიმართ გულწრფელი პატივისცემის მიუხედავად, ანგისაშიც 3 ქულისთვის ვიბრძოლებთ. მიმაჩნია, რომ ჩვენს გუნდლს აქვს იმის პოტენციალი, ეს ამოცანა წარმატებით გადაჭრას.

658
მკითხველის კომენტარები / 0 /
მსგავსი ამბები
რუბრიკის სხვა სიახლეები
;