თბილისის დინამო: გეზს არ გადავუხვევთ, სრული ნდობა კახა კაჭარავას!

თბილისის "დინამომ" ეროვნულ ლიგაში მეორე ადგილი დაიკავა. გულშემატკივარს კიდევ დიდხანს ემახსოვრება "ტორპედოსთან" საჩემპიონო დაპირისპირების დეტალები.

- დინამო (თბ)-ტორპედო 0:1 - ქუთაისი ჩემპიონია! [VIDEO]

თამამად შეიძლება ითქვას, რომ ამ უაღრესად ახალგაზრდული გუნდისგან ასეთ შედეგსაც არ ელოდა ბევრი...

მეორე მხრივ, საფეხბურთო თემში ხშირად ისმის კითხვები, თუ რატომ გაახალგაზრდავდა ასე "დინამო" და რატომ მოხდა ისე, რომ თუნდაც ზაფხულში გუნდმა ვერ მოახერხა ლიდერების შენარჩუნება...

"დინამოს" აწმყოსა და მომავალზე "ლელო" კლუბის პრეზიდენტის, რომან ფიფიას მრჩეველ ლევან სალუქვაძეს ელაპარაკა...

- სანამ სეზონის შეფასებაზე გადავალ, მინდა, ქუთაისის "ტორპედოს" თხუთმეტწლიანი პაუზის შემდეგ საქართველოს ჩემპიონის ტიტულის მოგება მივულოცო. ამასთან, ვუსურვებ გუნდს ჩემპიონთა ლიგაზე საქართველოს პრესტიჟის ღირსეულად დაცვას...

რაც შეეხება სეზონის შეფასებას. ალბათ, უპრიანი იქნება, თუ ბოლოდან დავიწყებთ. "ტორპედოსთან" შეხვედრა სულ ცოტა ხნის წინ დასრულდა და ჩვენ ახლა, როგორც იტყვიან, ცხელ გულზე ვსაუბრობთ. ყველამ ნახეთ, რა ლამაზი და დაძაბული შეხვედრა გამოვიდა. თბილისის "დინამოს" ძალიან დიდი შანსი ჰქონდა იმისა, რომ ჩემპიონი გამხდარიყო, მაგრამ... რას ვიზამთ... ამ შემთხვევაში, იღბალი არ იყო ჩვენს მხარეს...

- რა თქმა უნდა, "დინამო" ქართულ საფეხბურთო სივრცეში მუდამ პირველობისთვის იბრძვის, მაგრამ სეზონის დაწყების წინ, ხოლო შემდეგ, ზაფხულში, კიდევ უფრო გაახალგაზრდავებული გუნდისგან ასეთ შედეგსაც არ ელოდა ბევრი...
- სეზონის დასაწყისში "დინამო" გაახალგაზრდავდა ჩვენი კლუბის ახალი სტრატეგიიდან გამომდინარე, რომელიც გულისხმობს აქცენტის გადატანას ჩვენი საკლუბო აკადემიის აღზრდილებზე. ბევრი სპეციალისტი და, მათ შორის, თქვენი კოლეგაც მიიჩნევდა, რომ არათუ ჩემპიონობისთვის ბრძოლა, უფრო მოკრძალებული მიზნების მიღწევაც გაჭირდებოდა.

ალბათ, საქართველოს ჩემპიონატის დაწყებამდე ვინმეს რომ ეთქვა, "დინამოს" ჩემპიონობის ბედი ერთ დარტყმაზე იქნება დამოკიდებულიო, არავინ დაიჯერებდა. კლუბის მთელმა პერსონალმა, სამწვრთნელო შტაბმა ყველაფერი გააკეთა იმისთვის, რომ "დინამოს" ბოლო ტურამდე ჰქონოდა საჩემპიონო შანსი...

კლუბის პრეზიდენტს, ბატონ რომან ფიფიას არც საჯაროდ და არც უშუალო შეხვედრების დროს სამწვრთნელო შტაბისთვის მიზნად არ დაუსახავს ჩემპიონის ტიტულის უპირობოდ მოგება. ეს იმიტომ, რომ მიმდინარეობდა ყველასთვის ცნობილი გაახალგაზრდავების პროცესი. მერე და მერე, როცა მთელი ჩემპიონატის განმავლობაში გუნდი ლიდერობდა, თავისთავად გაჩნდა ამის სურვილი...

ჩვენ უკვე შევაფასეთ განვლილი სეზონი და სრული პასუხისმგებლობით უნდა გითხრათ, რომ კახა კაჭარავას და ფიზმომზადების უკრაინელ მწვრთნელს, ვიტალი შპანიუკს სრული ნდობა კლუბის აქვთ ხელმძღვანელობის მხრიდან

რას ვიზამთ, მოხდა ის, რაც მოხდა. როგორც ჩანს, ჩვენს ახალგაზრდა ფეხბურთელებს სჭირდებათ ასეთი გამოცდილება, რათა კიდევ მეტი ისწავლონ და წარმატებით ითამაშონ როგორც "დინამოში", ისე საქართველოს სხვადასხვა ასაკობრივ თუ ეროვნულ ნაკრებში. ვინ წარმოიდგენდა, რომ გადამწყვეტ შეხვედრაში ტრავმების გამო დაგვაკლდებოდნენ ბაქარ ქარდავა და გიორგი ზარია, გუნდის ერთ-ერთი ლიდერი ლაშა თოთაძე კი დისკვალიფიკაციის გამო გამოტოვებდა "ტორპედოსთან" მატჩს...

- თავად ისაუბრეთ იმ მიზეზთა ნაწილზე, რის გამოც სამწვრთნელო შტაბს, ალბათ, უფრო ქების სიტყვები ეკუთვნის, ვიდრე საყვედური. რამდენად დიდია კახა კაჭარავასა და მისი შტაბის ნდობის ვოტუმი?
- ჩვენ უკვე შევაფასეთ განვლილი სეზონი და სრული პასუხისმგებლობით უნდა გითხრათ, რომ კახა კაჭარავას და ფიზმომზადების უკრაინელ მწვრთნელს, ვიტალი შპანიუკს სრული ნდობა კლუბის აქვთ ხელმძღვანელობის მხრიდან. ასე რომ, კაჭარავა აგრძელებს თავისი მოვალეობის შესრულებას.

- ზაფხულში "დინამო" რამდენიმე წამყვანმა ფეხბურთელმა დატოვა. ფაქტია, მათი შენარჩუნებით ჩემპიონობის შანსი მნიშვნელოვნად გაიზრდებოდა...
- ვამბობ სრული პასუხისმგებლობით: გიორგი პაპუნაშვილის გარდა, კლუბს არ უნდოდა არცერთი იმ ფეხბურთელის გაშვება, რომელიც თქვენ გყავთ მხედველობაში.

ფეხბურთელებს თავად სურდათ კლუბის დატოვება და აქ საქმე არ არის მხოლოდ ფინანსებში. საქმეში ერთვება სხვა არაერთი ფაქტორი. მათ უნდოდათ უცხოეთში თამაში, რადგან არ იზიდავთ საქართველოს ჩემპიონატში დარჩენის პერსპექტივა.

- ცალკე უნდა გკითხოთ გიორგი ჩაკვეტაძეზე. ნუთუ, არ შეიძლებოდა მისი შენარჩუნება თუნდაც მომავალი წლის იანვრამდე?
- რა თქმა უნდა, ეს ბიჭი იყო გასული სეზონის აღმოჩენა, ძალიან დიდი ძალა იყო ჩვენი გუნდისთვის. ჩვენ "გენტთან" გვქონდა წინასწარი მოლაპარაკება. კლუბის პრეზიდენტმა ყველაფერი გააკეთა იმისთვის, რომ ეს ტრანსფერი შემდგარიყო სწორედ იანვარში.

ამავე დროს, თავად ჩაკვეტაძე და მისი ოჯახის წევრები დაჟინებით ითხოვდნენ, რომ "გენტში" ტრანსფერი ზაფხულში შემდგარიყო. ფეხბურთელმა არ შეისმინა არც რომან ფიფიას და არც კახა კაჭარავას შეგონება იმის თაობაზე, რომ იანვრამდე მოეცადა და მერე გადასულიყო "გენტში". ისინი არწმუნებდნენ მას, რომ მისი კარიერისთვის სწორედ ასე იქნებოდა უმჯობესი.

მინდა დაგარწმუნოთ, რომ ჩაკვეტაძის ნაადრევი წასვლით კლუბს არანაირი დამატებითი მოგება არ მიუღია.

...ჩაკვეტაძემ არ შეისმინა არც რომან ფიფიას და არც კახა კაჭარავას შეგონება იმის თაობაზე, რომ იანვრამდე მოეცადა და მერე გადასულიყო "გენტში". ისინი არწმუნებდნენ მას, რომ მისი კარიერისთვის სწორედ ასე იქნებოდა უმჯობესი

- საფეხბურთო საზოგადოებაში არის აზრი, რომ "დინამო" ზედმეტადაა ორიენტირებული კომერციალიზაციაზე, ნაადრევად ხდება ახალგაზრდა, პერსპექტიულ ფეხბურთელებთან შელევა. რას იტყოდით ამაზე?
- სადავო არ არის, რომ თბილისის "დინამოს" აკადემია ზრდის ისეთ ნიჭიერ ფეხბურთელებს, რომლებიც მრავლად არიან საქართველოს სხვადასხვა ასაკობრივ ნაკრებში. თანამედროვე პირობებში, როცა ისინი იღებენ ბევრ შეთავაზებას, მთელი რიგი ფაქტორების გათვალისწინებით, რომელთა შესახებაც ყველამ ვიცით, რთულია დიდი ხნით მათი შენარჩუნება. 2-3 წლით აუცილებლად შევძლებდით ამას, საქართველოს ჩემპიონატში მეტი ძლიერი გუნდი რომ იყოს, გვქონდეს უკეთესი ინფრასტრუქტურა და ასე შემდეგ...

ინფრასტრუქტურას რაც შეეხება, იდგმება პოზიტიური ნაბიჯები და მჯერა, მალე ხელშესახები უკეთესობა გვექნება. აქ ფინანსები ხშირად არ არის წინა პლანზე. "დინამოს" პრეზიდენტი არ აპირებს არჩეული გეზის შეცვლას და ჩვენი აკადემიის აღზრდილებს სამომავლოდაც ექნებათ შანსი, დამკვიდრდნენ ძირითად გუნდში.

რაღაცნაირად რომც მოვახერხოთ ფეხბურთელების შენარჩუნება, აქ უკვე წინა პლანზე გამოდის მოტივაციის პრობლემა. ამ სიტყვების დასტურად გიორგი პაპუნაშვილის მაგალითს მოვიყვან. მას შემდეგ, რაც გაირკვა, რომ ის "სარაგოსაში" გადადიოდა, ბოლო ოთხ-ხუთ შეხვედრაში, უბრალოდ, "დაფრინავდა".

- ამბობენ, რომ შეიძლება, "დინამო" კიდევ რამდენიმე ფეხბურთელს შეელიოს და არც ისაა გამორიცხული, ზოგიერთმა კარიერის დასრულებაზეც იფიქროს...
- ჯერ ახალი დასრულებულია სეზონი და ამ თემების განხილვას მერეც მოვასწრებთ. ახლა მართლა არავისთან გვისაუბრია ამ საკითხზე.

- ფაქტია, "დინამოს" დააკლდა რამდენიმე გამოცდილი ფეხბურთელი. ხომ არ აპირებთ მათ დამატებას?
- ჩვენი გეზი უცვლელი რომ რჩება, ეს უკვე გითხარით. მაქსიმალური ნდობა ექნებათ ჩვენგან ნიჭიერ, ახალგაზრდა ფეხბურთელებს. რა თქმა უნდა, გუნდს სჭირდება გამოცდილი მოთამაშეებიც და ეს ჩვენც კარგად ვიცით. უბრალოდ, არ გვინდა, ძვირადღირებული ლეგიონერები მოვიყვანოთ, გავხდეთ საქართველოს ჩემპიონები და ამით ყველაფერს მოვრჩეთ.

ჩვენი მიზანია, ჩვენივე აღზრდილებზე დაყრდნობით შევქმნათ ისეთი გუნდი, რომელიც თავის სიტყვას იტყვის ევროთასებზე. გარწმუნებთ, ეს ახალგაზრდები გამოცდილებას რომ მიიღებენ და კიდევ უფრო დაღვინდებიან, ყველასთვის ანგარიშგასაწევი ძალა იქნებიან.

- ამასწინათ, კლუბის პრეზიდენტ რომან ფიფიას ვესაუბრეთ. მან თქვა, რომ საევროთასოდ გუნდს წერტილოვნად გააძლიერებს ისეთი ლეგიონერებით, რომლებიც "დინამოს" ევროთასებზე წარმატებით ასპარეზობაში დაეხმარებიან...
- დიახ, ასეა, ოღონდ, ეს საკითხი დღის წესრიგში უფრო ევროთასების წინ დადგება, მანამდე კი ნახევარი სეზონია სათამაშო. ეს დრო გვაჩვენებს, რომელ ფეხბურთელებს შეგვიძლია დავეყრდნოთ ბოლომდე.

- "დინამოს" ფეხბურთელების მიმართ ამ ეტაპზე თუ არის კონკრეტული ინტერესი?
- არის ზოგადი ინტერესები, მაგრამ რაიმეს კონკრეტულად რომ განვიხილავდეთ, ისეთი ახლა არაფერია. ჩვენ უკვე ვიცით, რომ მაქსიმალურად უნდა შევიკავოთ თავი ნაჩქარევი ტრანსფერებისგან. თუ იქნება წინადადება შესაბამისად ამბიციური კლუბისგან, რომელიც მისაღები იქნება ჩვენი ფეხბურთელებისთვის, ამას აუცილებლად განვიხილავთ.

არ გვინდა, ძვირადღირებული ლეგიონერები მოვიყვანოთ, გავხდეთ საქართველოს ჩემპიონები და ამით ყველაფერს მოვრჩეთ

- არსებობს ვარაუდი, რომ "დინამო" რამდენიმე ლეგიონერს შეელევა...
- ამ ეტაპზე შემიძლია მხოლოდ ის გითხრათ, რომ გუნდს დატოვებენ მოჰამედ ალიუ და ბოგდან მიშჩენკო. დანარჩენი ახლო მომავალში გაირკვევა.

- უკვე იცით, სად და როგორ მოემზადება "დინამო" ახალი სეზონისთვის?
- სამწვრთნელო შტაბმა ფეხბურთელებს დაურიგა ინდივიდუალური პროგრამები, რომლის მიხედვითაც ისინი შვებულების დროს მოემზადებიან. 10 იანვარს გუნდი "დინამოს" საწვრთნელ ბაზაზე შეიკრიბება და ფიზიკურ ვარჯიშებს დაიწყებს. ამას მოჰყვება პირველი თურქული შეკრება. დაგეგმილია ასევე მეორე თურქული შეკრება, რის შემდეგაც საქართველოს ჩემპიონატიც დაიწყება.

(იბეჭდება მცირე ცვლილებით)
ყოველდღიური სპორტული გაზეთი "ლელო"
3021
მკითხველის კომენტარები / 4 /
nika
2
ძაან ..... და რომანა კიდე გაგებაში არაა ფეხბურთის ცოდოა დინამო მაგის ხელში ტიპმა 5 წელია გუნდი ვერ დაალაგა. საცოდაობაა რა
ალექსანდრე
1
კარგი რა! ლეგიონერებს ევროთასების წინ მოვიყვანთო! ვერაფრით დავიჯერებ ამდენი რომ არ გესმით დინამოს ხელძღვანელებს. თქვე დალოცვილებო,მესი და ნეიმარი ხომ არ მოგყავთ, ნებისმიერ მოთამაშეს დრო სჭირდება გუნდთან შესათამაშებლად. რა? არა? ჩემი აზრით ამიტომაც გადავედით გაზაფხული-შემოდგომის ჩემპიონატზე, რომ 7-8 თვე გქონდეთ მოსამზადებლად და არ გათახსირდეთ პირველივე წრეში. შენ კი - ევროთასების წინო... ვაი ჩვენს პატრონს. საშველი არ არის......
bebeto
0
გაითვალისწინეთ ქართველი ქომაგის აზრი დინამოს მესვეურებო, ნუ გაყიდით დროზე ადრე პატარა ბავშვებს და ლეგიონერი მოიყვანეთ სეზონის დასაწყისში. თუ გვინდა რომ რამე შედეგი გააკეთოს გუნდმა შეთამაშება უნდა მოასწროს. ეს არის აქსიომა. თორემ ისე გამოვა იგივე, ჩაკეტილ წრეზე ტრიალი
11:40 2017.12.08
მსგავსი ამბები
რუბრიკის სხვა სიახლეები
;