დინამო თბილისი. ვინ არის ივანისენია?

თბილისის "დინამო" დღეიდან თურქულ შეკრებაზე იქნება. 2018 წლის სეზონისთვის მზადების პირველ ეტაპს დედაქალაქური გრანდი სიდეში გაივლის.

დინამოელები შეკრებაზე 4 ამხანაგურ მატჩსაც ჩაატარებენ.26 იანვარს თბილისელები ლუგანსკის "ზორიას" შეხვდებიან, 29-ში პოლონურ "სანდეციას", 2 თებერვალს პოლტავის (უკრაინა) "ვორსკლას", ხოლო 6 თებერვალს ტულის "არსენალთან" მოსინჯავენ ძალებს.

კახა კაჭარავას გუნდი თბილისში 7 თებერვალს დაბრუნდება და რამდენიმე დღეში მეორე შეკრებაზე გაემგზავრება.

ამასობაში კი, დინამოელებმა დიღმის ბაზაზე გორის "დილასთან" ისპარინგეს. კაჭარავამ ძირითადად ექსპერიმენტული შემადგენლობა ათამაშა და თავის გამოჩენის შანსი უმეტესად სინჯებზე მყოფ და აკადემიის აღზრდილებს მისცა. ამხანაგურ მატჩში ერთადერთი გოლი გავიდა და ის "დილას" ფორვარდმა გიორგი ფანცულაიამ გაიტანა.

დინამოელები თურქულ შეკრებაზე უკრაინელ ნახევარმცველს, დმიტრო ივანისენიასაც იახლებენ. მას დააკვირდებიან და საბოლოო გადაწყვეტილებასაც ამის შემდეგ მიიღებენ. 24 წლის ნახევარმცველი დონეცკის "შახტარის" აღზრდილია, თამაშობდა "ილიჩევეცსა და "მარიუპოლშიც".

გამოდის, რომ სამწვრთნელო შტაბის მოწონება ვერ დაიმსახურეს "დინამოში" სინჯებზე მყოფმა სხვა ფეხბურთელებმა - 25 წლის ფორვარდმა, უკრაინის მოქალაქე ევგენი ბოხაშვილმა, რომელიც "დნიპროს" აღზრდილია, და ბელარუსის მოქალაქემ, 18 წლის ნახევარმცველმა, ნიკა ბასარიამ.

ასევე, 23 წლის ნახევარმცველმა ლაშა მანაგაძემ, რომელიც ბოლნისის "სიონში" გამოდიოდა და 22 წლის შემტევმა ნახევარმცველმა გურამ ლუკავამ. ეს უკანასკნელი ფოთის "კოლხეთსა" და პოლონურ "ლეგიონოვიაში" თამაშობდა.

კიდევ ერთი ამბავი "დინამოსგან". შეგვიძლია ჩავთვალოთ, რომ ირაკლი სიხარულიძის ტრანსფერი გამოირიცხა. ამის თაობაზე თბილისური კლუბის პრეზიდენტის, რომან ფიფიას მრჩეველმა, ლევან სალუქვაძემ გვაცნობა.

"დიდი სურვილი გვქონდა, რომ ირაკლი სიხარულიძე გამხდარიყო ჩვენი გუნდის წევრი. მას შევთავაზეთ კონტრაქტი საქართველოს მასშტაბით საუკეთესო პირობებით.

რამდენიმე დღე ითხოვა მოსაფიქრებლად, მაგრამ ჩანს, მისი აგენტი უცხოურ ვარიანტს სთავაზობს და ურჩევნია, სწორედ ამ ვარიანტს დაელოდოს", - გვითხრა სალუქვაძემ.

ყოველდღიური სპორტული გაზეთი "ლელო"
2190
მკითხველის კომენტარები / 0 /
მსგავსი ამბები
რუბრიკის სხვა სიახლეები
;