დინამო (თბ)-ლოკომოტივი 3:1 - შეწყვეტილი სერია

დედაქალაქური დაპირისპირების დაწყებამდე ფეხბურთელებმა და სტადიონზე შეკრებილმა გულშემატკივარმა შოთა მამინაშვილის ხსოვნას წუთიერი დუმილით პატივი მიაგეს. მატჩი დაძაბული იყო, იყო ბევრი ორთაბრძოლა ტემპსაც ძალიან დაბალი არ ეთქმოდა. მაგრამ ისეთი ხარისხი და სანახაობა არ გამოდგა, როგორც ამ გუნდების პირველი სამი მატჩი. თუმცა, დრამატიზმი და ემოციები ნამდვილად არ აკლდა.

კარგი თამაში ჩაატარა ოთარ კიტეიშვილმა, რომელიც ტრავმის შემდეგ ფორმაში სწრაფად შედის - რამდენიმე ლიდერის უცხოეთში წასვლის შემდეგ "დინამოს" მისი დაბრუნება აშკარად დაეტყო. არაორდინალური ნახევარმცველი ისეთ ვითარებაში პოულობდა გამოსავალს და ამწვავებდა თამაშს, ერთი შეხედვით, გამოსავალი რომ არ ჩანდა. ორი აზრი არაა - ეს ბიჭი ახლა "დინამოს" საჭირო დროს მოევლინა.

ლაშა თოთაძემ თავი ისევ საჯარიმოებით დაგვამახსოვრა. რამდენჯერმე სცადა ბედი და ერთხელ თავიც გამოიჩინა.

დინამო თბ
3
ლოკომოტივი
1
გოლები: 1:0 თოთაძე (5), 1:1 რეხვიაშვილი (44), 2:1 მიქელთაძე (45), 3:1 ქოჩლაძე (90+4).
 
დინამო (4-3-3): ლიტოვჩენკო - გეგეჭკორი, სალუქვაძე, თოთაძე, კობოური - ქარდავა, კიტეიშვილი, ზარია (79. ქოჩლაძე) - შულაია (88. კუცია), მიქელთაძე, ბ. ქავთარაძე (90+2. დავითაშვილი).
სათადარიგოები: რევიშვილი, მიშენკო, კვარაცხელია, ალიუ
მწვრთნელი: კახა კაჭარავა
ლოკომოტივი (4-3-3): რ. თევდორაძე - ღონღაძე (38. ჩიტეიშვილი), კობახიძე, რეხვიაშვილი, უბილავა - ნ. ქავთარაძე, გვალია (87. ლ. ქურდაძე), სამურკასოვი - არველაძე (53. გოროზია), სიხარულიძე, დიასამიძე
სათადარიგოები: ბ. ქურდაძე, ჭანტურია, ხიდეშელი, გაბაძე
მწვრთნელი: გიორგი დევდარიანი
გაფრთხილება: გვალია (38), სამურკასოვი (48), ნ. ქავთარაძე (70), დიასამიძე (85) გეგეჭკორი (86), მიქელთაძე (87), რეხვიაშვილი (90)
არბიტრი: გ. ვადაჭკორია

ბაქარ ქარდავაზეც უნდა ვთქვათ, რომელმაც პირველ ტაიმში ეროვნული ლიგის რეკორდი დაამყარა - "პოლარისის" სისტემით, მან 45 წუთში 6,44 კილომეტრი ირბინა. საბოლოო მონაცემი დღეს გახდება ცნობილი, მაგრამ ერთ ტაიმში ეს ძალიან მაგარი მაჩვენებელია. საერთოდ, ეს ბიჭი იმდენს მოძრაობს და ისეთი ფუტკარივით ფეხბურთელია, ზრდა თუ გააგრძელა, ეროვნულ ნაკრებში ვიხილავთ.

... იყო ასეთი ფეხბურთელი კიევის "დინამოში" - ვადიმ ევტუშენკო, ის რომ შეცვლაზე წარმატებით შედიოდა, მსგავსი იშვიათი იყო. ალბათ, მეორე ასეთი "მანჩესტერის" ოლე გუნარ სულსკიაერი იყო. ასეთი ფეხბურთელი თბილისის "დინამოშიც" გამოჩნდა - ლაშა ქოჩლაძე, რომელმაც პირველ ორ შეხვედრაში 2 გოლი გაიტანა. 22 წლის ახალგაზრდამ გადამწყვეტი გოლი ახლაც გაიტანა და უმნიშვნელოვანეს შეხვედრას წერტილი დაუსვა.

საინტერესოა, რომ "დინამოს" ამ გამარჯვებაში მონაწილეობდნენ 19 წლის ბექა მიქელთაძე და დავით კობოური, 18 წლის ბექა ქავთარაძემ, რომელმაც კარგი თამაში ჩაატარა და 16 წლის ზურაბ დავითაშვილი. პესიმიზმით გაჯერებულ ამ დროში მომავლის იმედს ასეთი ფაქტები მაინც გვაძლევს.

"ლოკომოტივისგან" მეტს ველოდით. არადა, შეხვედრა, რომელშიც გუნდს მნიშვნელოვანი მოგების იმედი ჰქონდა, რეალურად, ჩააგდეს. მათ შემტევ თამაშს დინამოელებმა გასაქანი არ მისცეს და სივრცეშეზღუდულებს შეტევების ორგანიზება გაუჭირდათ. გიორგი დევდარიანის სიტყვებია, რომ წლეულს "დინამოსთან" ყველაზე ცუდი შეხვედრა ჩაატარეს.

თბილისის "დინამომ" საქართველოს ჩემპიონატში 4-მატჩიანი მოუგებელი სერია შეწყვიტა, 62 ქულა დააგროვა, კონკურენტ ქუთაისის "ტორპედოსთან" სხვაობა ისევ ოთხი ქულამდე გაზარდა და ლიდერობა განიმტკიცა. "ლოკომოტივმა" ქულათა მარაგი (48 ქულა) ვერ გაზარდა და ისევ მე-4 ადგილზეა, მაგრამ ფოთის "კოლხეთთან" დღევანდელი მოგების შემდეგ, "საბურთალოს" ორქულიან დისტანციაზე მიახლოების საშუალება მისცა.

მატჩის სტენოგრამა

5" - გოლი! თოთაძემ საჯარიმო ზუსტად შეასრულა და უძლიერესი დარტყმის შემდეგ თევდორაძეს შანსი არ დაუტოვა - 1:0.

20" - არველაძე კარისგან ზურგით იდგა, უცებ შემოტრიალდა და მოულოდნელად კარში დაარტყა, მაგრამ მეკარემ ბურთი იოლად აიღო.

23" - კიტეიშვილის მშვენიერი გადაცემის შემდეგ მიქელთაძე საჯარიმოში შეიჭრა და ღონღაძესთან ორთაბრძოლაში წაიქცა. თბილისელები პენალტს ითხოვდნენ და უკმაყოფილონი დარჩნენ, არბიტრმა თამაში რომ გააგრძელა.

24" - მიქელთაძემ ურეალურესი მომენტი გააფუჭა: შულაიას ჩაწოდებული ბურთი კობახიძემ მოიგერია და ბურთმა კუთხურის ხაზი გადაკვეთა, მაგრამ ქარდავამ ბურთი მოედანზე დააბრუნა და კარის წინ მიქელთაძეს უპასა, რომელმაც ახლოდან მიზანს ააცილა.

25" - ლიტოვჩენკომ ცუდად შემოიტანა ბურთი, რომელიც სამურკასოვმა ჩაჭრა, მერე ნოდარ ქავთარაძე მოძებნა, რომელმაც მეკარესთან პირისპირ სიხარულიძე დატოვა - ლიგის ბომბარდირმა ბოლო მომენტში დიასამიძეს უპასა და ბურთი კარში აღმოჩნდა. მაგრამ ლაინსმენმა თამაშგარე დააფიქსირა. პასის დროს თამაშგარეში არც სიხარულიძე არ ყოფილა, ხოლო მისი გადაცემისას, არც - დიასამიძე. ოღონდ, ეს უკანასკნელი პირველი პასის დროს პასიურ ოფსაიდში იყო. 

29" - მცველების გარემოცვაში კიტეიშვილმა მოახერხა და კართან დასარტყმელ პოზიციაზე ქარდავა დატოვა, რომელმაც ზუსტად ვერ დაარტყა.

33" - საჯარიმოდან თოთაძის მორიგი უძლიერესი დარტყმა თევდორაძემ მუშტებით მოიგერია.

44" - გოლი! არველაძე საჯარიმოში შევარდა და კუთხური მოიპოვა, რომელიც დიასამიძეს ჩააწოდა. რეხვიაშვილი მცველებს გაექცა და თავურით წონასწორობა აღადგინა - 1:1.

45" - გოლი! ქავთარაძე "ლოკომოტივის" საჯარიმოში რეხვიაშვილს გასცდა და კარის წინ ბურთი მიქელთაძეს გადააწოდა, რომელმაც ეროვნულ ლიგაში მე-12 გოლი გაიტანა - 2:1.

47" - თოთაძემ საჯარიმო ამჯერად დაახლოებით 35 მეტრიდან დაარტყა და ისევ ისე ძლიერად, რომ მეკარეს პრობლემა შეუქმნა - თევდორაძემ ბურთი ნახტომში მოიგერია.

62" - ნოდარ ქავთარაძის დარტყმა ლიტოვჩენკომ მოიგერია.

75" - თოთაძის მორიგი საჯარიმო და ისევ შორიდან - ამჯერად, თევდორაძემ ბურთი იოლად აიღო.

81" - დიასამიძემ თამაში გაამწვავა, საჯარიმოში შეიჭრა და ფინტებით ორი მცველი ჩამოიტოვა, მაგრამ ბურთი ლიტოვჩენკომ დაამიწა.

82" - დიასამიძემ საჯარიმოში ბურთი ნოდარ ქავთარაძეს გააყოლა, რომელმაც დაუხანებლად დაარტყა და მიზანს ოდნავ ააცილა.

90+4" - გოლი! ქოჩლაძემ მცველს ბურთი აართვა, დავითაშვილი მოძებნა, რომელმაც შეტევა მიქელთაძეს გაუგრძელა, მან კი საჯარიმოში ბურთი ისევ ქოჩლაძეს გააყოლა და 3:1.

ყოველდღიური სპორტული გაზეთი "ლელო"



1307
მკითხველის კომენტარები / 0 /
მსგავსი ამბები
რუბრიკის სხვა სიახლეები