დინამო (თბ)-ტორპედო 0:1 - ქუთაისი ჩემპიონია! [VIDEO]

დადგა დღე, რომელსაც კარგა ხანია, ველოდით. ისე მოხდა, რომ საქართველოს ჩემპიონი პირველობის უკანასკნელ ტურში უნდა გარკვეულიყო. ერთგვარი "ოქროს მატჩი" იმთავითვე შეირაცხა ძალიან ტკბილ ლუკმად, რადგან ერთმანეთის წინააღმდეგ წარდგნენ "დინამო" და "ტორპედო" - ორი ყველაზე ტრადიციული ქართული კლუბი...

თამაშის დაწყებამდე "დინამო არენაზე" ვიხილეთ ძალიან ლამაზი ნაკეთობა - საჩემპიონო ფარი, რომელიც შეიცავს ძველქართულ იუველირულ ელემენტებს. ფარი ჯერ კიდევ თამაშის დაწყებამდე გამოიტანეს სტადიონზე...

მატჩამდე
თუ "ტორპედომ" ამ შეხვედრისთვის ოპტიმალურ შემადგენლობას მოუყარა თავი, იმავეს ვერ ვიტყვით "დინამოზე". გუნდს დისკვალიფიკაციის გამო დააკლდა საქართველოს ჩემპიონატის ერთ-ერთი საუკეთესო მცველი ლაშა თოთაძე. რა თქმა უნდა, მისი არყოფნა სერიოზული პრობლემა იყო დინამოელთა მთავარი მწვრთნელის, კახა კაჭარავასთვის. მან ეს პრობლემა იმით გადაჭრა, რომ მარცხენა მცველის პოზიციაზე დავით კობოურს მისცა თავის გამოჩენის შანსი, ცენტრალურ მცველად კი გიორგი გადრანი მოგვევლინა.

ასევე არ უნდა დაგვავიწყდეს ძალიან სტაბილურად მოთამაშე ბაქარ ქარდავას ტრავმაც. ანალოგიური მიზეზის გამო არ იყო გიორგი ზარია.

დიდი სიურპრიზები არ ყოფილა ტაქტიკური განლაგების მხრივ. ორივე მწვრთნელმა აირჩია ის სქემა, რომელსაც აქამდე ერთგულობდა.

მატჩის დაწყების წინ შეხვედრის მონაწილეებმა წუთიერი დუმილით პატივი სცეს ბოლო დღეებში განვითარებული ტრაგიკული მოვლენების მსხვერპლთ. თამაშიც დაიწყო...

მატჩი
თავიდან ბოლომდე თანაბარი თამაში იყო, რომლის ბედიც ცალკეული ფეხბურთელების, უფრო ზუსტად კი ფეხბურთელის თამაშმა გადაწყვიტა. ამას დაემატა კახა ჩხეტიანის გონივრული სამწვრთნელო ნაბიჯიც... ყველაფერზე თანამიმდევრობით ვთქვათ.

მაშ, რის ხარჯზე მოიგო "ტორპედომ"? უპირველეს ყოვლისა, მეტი გამოცდილება უნდა ვახსენოთ. ძირითადს რომ თავი დავანებოთ, ქუთათურთა სათადარიგოთა სკამზეც კი ისეთი ფეხბურთელები არიან, რომელთაც კარიერის განმავლობაში ბევრი უნახავთ.

დინამო თბ
0
ტორპედო
1
26. 11. თბილისი. დინამო არენა
გოლი: 0:1 კაპანაძე (74)
გამოუყენებელი პენალტი: კიტეიშვილი (90+6. დინამო)
დინამო (4-4-2): ლიტოვჩენკო - გეგეჭკორი, სალუქვაძე, კობოური, გადრანი - შულაია, კუცია (87. კოვტალიუკი), კიტეიშვილი, ქოჩლაძე (71. დავითაშვილი) - ქავთარაძე, მიქელთაძე
სათადარიგოები: რევიშვილი, კვარაცხელია, ალიუ, ნინუა, ლ. ხარაბაძე
მწვრთნელი: კახა კაჭარავა
ტორპედო (4-5-1): კვასხვაძე - ტაბატაძე, ხურცილავა, გურული, ქიმაძე - დოლიძე (74. კორობკა), გიგაური (63. ტუღუში), ფალავანდიშვილი (85. მამასახლისი), კუხიანიძე, კუტალია - კაპანაძე
სათადარიგოები: ქვილითაია, ჭიჭინაძე, ბაბუნაშვილი, ბერიაშვილი
მწვრთნელი: კახა ჩხეტიანი
გაფრთხილება: გურული (24), ქავთარაძე (27), გიგაური (51), ფალავანდიშვილი (83)
არბიტრი: გ. ვადაჭკორია

ამის მაგალითი როინ კვასხვაძეა. ალბათ, არ შევცდებით, თუ ვიტყვით, რომ მან პირადად მოუპოვა "ტორპედოს" ჩემპიონის ტიტული - შეხვედრის ენდშპილში ჯერ ურთულესი, მიწიდან ასხლეტილი ბურთი მოიგერია აკაკი შულაიას დარტყმის შემდეგ, მერე კი იყო მატჩის კულმინაცია, როცა ოთარ კიტეიშვილს 11-მეტრიანი არ გაატანინა.

რა თქმა უნდა, პენალტი არ იყო იდეალურად შესრულებული და რომ არა ეს, გოლი გარდაუვალი იქნებოდა, მაგრამ ისიც უნდა აღინიშნოს, რომ საქართველოს ნაკრების მეკარემ დიდოსტატურად "დატოვა" ფეხი.

კახა ჩხეტიანმა კი შეცვლა გამოიცნო. მინდორზე შეუშვა თუ არა უკრაინელი ლეგიონერი, ვლადიმირ კორობკა, მან ეგრევე საგოლე შეტევას ჩაუყარა საფუძველი. სწორედ კორობკას გადაცემას მოჰყვა თორნიკე კაპანაძის საგოლე თავური.

ზოგადად, მწვრთნელებმა რამდენჯერმე გადააწყვეს შემადგენლობა. "დინამოზე" აუგს ვერ ვიტყვით - შეიძლება, მასპინძელი ვერ იყო ძალიან მწვავე თავის შეტევებში, მაგრამ არც ის უნდა დავივიწყოთ, რომ შეხვედრის მეტი წილი მათთვის სასურველი სცენარით მიმდინარეობდა...

ბოლოს თბილისელებმა მოუმატეს და კაჭარავამაც გამოიცნო შეცვლა - მიკოლა კოვტალიუკს, მთელი ნახევარი სეზონი რომ ტყუილად იყო "დინამოში", გმირობის შანსი ჰქონდა, მაგრამ მისი მოპოვებული 11-მეტრიანი გოლად ვერ იქცა.

ზოგადად, "დინამოს" ამ შემადგენლობას, ძალიან ახალგაზრდულს და ნიჭიერს, მაგრამ ჯერაც ძალიან გამოუცდელს, ვერავინ მოსთხოვდა უცილობელ ჩემპიონობას. ის კი არა, ბევრი არც იმას ელოდა, კაჭარავას ბიჭები მეორე ადგილს თუ შესწვდებოდნენ.

გავიხსენოთ ისიც, რომ "დინამო" ზაფხულში ერთხელაც დაიცალა ლიდერებისგან. ეს ის შემთხვევაა, როცა მწვრთნელს საყვედური კი არა, საქებარი სიტყვები ეკუთვნის...

"ტორპედოს" კი დუბლის შესრულების შანსი აქვს. თასის ფინალში ქუთათურებს საჩხერის "ჩიხურა" ელით.

დიდი ჯაფა
ღრმა ბავშვობიდან ფეხბურთს ვუყურებ და ასე რთულად სამსაჯო თამაში ძალიან იშვიათად მინახავს.

როცა თამაშში უშუალოდ არ ხარ ჩართული, ძალიან რთულია, იმ ეპიზოდებზე წერა, რომელთა ბედსაც სანტიმეტრები წყვეტენ. ამ შეხვედრაში იყო ორი საკამათო ეპიზოდი და ორივეს ვიდეოგამეორება ვნახე.

ლევან კუტალიას ულამაზესი გოლისას თამაშგარეა, ცოტა უფრო ბუნდოვანია პენალტის შემთხვევა. ფაქტია, რომ არბიტრმა ასეთი გადაწყვეტილება მიიღო. ჩემი პირადი აზრით, იქ უფრო არის 11-მეტრიანი, ვიდრე - არა.

საერთო ჯამში, მსაჯთა ბრიგადამ ღირსეულად გაართვა თავი დაკისრებულ ამოცანას. ფაქტია, მათ მართლაც რომ ურთულესი მატჩის განსჯა მოუხდათ. ჯერ ერთი, ეს იყო საგანგებო მნიშვნელობის შეხვედრა, და მეორეც - თამაშში მოვლენები ისე დრამატულად განვითარდა, ძნელად თუ წარმოვიდგენდით...

მატჩის სტენოგრამა
6' - ქოჩლაძის ჩაწოდებულს სალუქვაძემ მიმართულება შეუცვალა. დარტყმა არაზუსტი აღმოჩნდა.
10' - "ტორპედოს" მრავალსვლიანი, კარგი კომბინაცია. კაპანაძემ კარგად დაუტოვა ბურთი ფალავანდიშვილს, რომლის დარტყმაც ზუსტი ვერ გამოდგა.
12' - დოლიძის დარტყმა-ჩაწოდება. ლიტოვჩენკო ადგილზეა.
21' - დოლიძის ჩაწოდება, კუტალიას ბრწყინვალე "მაკრატელა" და გოლი, მაგრამ არბიტრმა თამაშგარე მდგომარეობა დააფიქსირა.
23' - "დინამოს" კონტრშეტევა. კიტეიშვილის დარტყმა არაზუსტია.
27' - დოლიძის ჩაწოდება. კუტალიას თავურს სიზუსტე აკლია.
38' - ტაბატაძის ჩაწოდება და კაპანაძის თავური. ლიტოვჩენკომ ბურთი ნახტომში მოიხელთა.
39' - ისევ ტაბატაძის ჩაწოდება და ამჯერად კუტალიას თავური. ლიტოვჩენკოს ბურთი ხელებში მიუვიდა.
44' - ქავთარაძემ უკნიდან მიარტყა ფეხი დავით ხურცილავას. მინდორზე სიტუაცია დაიძაბა, მაგრამ მალე განიმუხტა.
49' - გეგეჭკორის ჩაწოდება. კვასხვაძე დამაჯერებელია.
59' - კიტეიშვილის შორეული, მაგრამ არაზუსტი დარტყმა.
66' - შულაიას ჩაწოდების შემდეგ ქავთარაძე ბურთს ვერ მისწვდა.
74' - გოლი! 0:1. კორობკას შესანიშნავი გადაცემის შემდეგ კაპანაძემ თავური დარტყმით აიღო "დინამოს" კარი.
77' - ტუღუშის დარტყმული ბურთი ლიტოვჩენკოს ხელებში მიუვიდა.
78' - კიტეიშვილის დარტყმა და კვასხვაძე კუთხურზე იგერიებს ბურთს.
82' - ქავთარაძეს ხელსაყრელი სიტუაციიდან ვერ გააქვს.
87' - ტაბატაძის დარტყმა მცირე მანძილით სცდება დინამოელთა კარს.
90' - შულაიას დარტყმის შემდეგ "ტორპედო" კვასხვაძემ გადაარჩინა.
90+6' - გურული კოვტალიუკის წინააღმდეგ თამაშობს. ეს უკანასკნელი გაზონზე ეცემა და არბიტრი თერთმეტმეტრიანს ნიშნავს. კიტეიშვილის დარტყმას კვასხვაძე ფეხით იგერიებს. დამთავრდა! 15-წლიანი პაუზის შემდეგ ტორპედო კვლავ საქართველოს ჩემპიონია! მეოთხედ!

ბომბარდირები
ი. სიხარულიძე (ლოკომოტივი) 25
ბ. მიქელთაძე (დინამო თბ) 15
თ. კაპანაძე (ტორპედო) 14
დ. ტატანაშვილი (ჩიხურა) 15
გ. ხარაიშვილი (საბურთალო) 13.

ყოველდღიური სპორტული გაზეთი "ლელო"
2696
მკითხველის კომენტარები / 0 /
მსგავსი ამბები
რუბრიკის სხვა სიახლეები
;