დინამო-კლუჟი 73:87 - ტრანსფორმაცია ტრანსილვანიელებთან

საქართველოს საკალათბურთო ჩემპიონმა "დინამომ" ფიბას თასზე მეორე მატჩი გამართა. მისი მეტოქე რუმინული "კლუჟი" იყო, რომელიც სპეციალისტებმა წინასწარ შერაცხეს ჯგუფის ფავორიტად.

ტრანსილვანიელებმა პირველივე ტაიმში გაამართლეს სტატუსი და დიდ შესვენებაზე 29-ქულიანი უპირატესობით გავიდნენ. მეორე ნახევარში დინამოელებმა ტრანსფორმაცია განიცადეს, თამაში გამოასწორეს, ჩამორჩენა 14 ქულამდეც დაიყვანეს, მაგრამ მარცხს თავი ვერ დააღწიეს.

რატომ დავმარცხდით? - ასეთი შეკითხვის დასმა მარტივია. ხშირად პასუხებია რთულად გასაცემი.

ამ შემთხვევაში მიზეზი რამდენიმეა. დავიწყოთ იქიდან, რომ "კლუჟი" ევროპული სტანდარტების საშუალო გუნდია, რომელიც ყოველწლიურად ევროტურნირებზე თამაშობს, იცის, რა არის საჭირო სტუმრად გასამარჯვებლად, რა არის საჭირო ჯგუფიდან გასასვლელად და ფიბას თასის მოსაგებად.

დინამო
73
კლუჟი
87

11:32, 15:23, 25:20, 22:12

25 ოქტომბერი, თბილისი, ოლიმპიური სასახლე

დინამო: შარაბიძე (15 წთ, 6ქ, 4მ), ცრნიჩი (25 წთ, 6ქ, 5მ), ბოიდი (26 წთ, 12ქ, 2პ), ლონდარიძე (21 წთ, 6ქ, 5მ), ტურპინი (27 წთ, 18ქ, 9მ, 2ჩ), ფაცაცია (34 წთ, 9ქ, 5პ, 4მ), ბერიშვილი (29 წთ, 10ქ, 5მ, 5პ), გოგოძე (22 წთ, 6ქ).
კლუჟი: გრეი (3ქ), საკიჩი (13ქ, 6მ, 3პ), უოტსონი (14ქ, 4პ), მურეშანი, ბარო (8ქ, 8მ), კარინაუსკასი (13ქ), კალინიჩენკო (6ქ, 5მ), ტოროკი (10ქ, 5მ), კრომაჰი (9ქ, 4პ), ოლაჰი (6ქ, 9მ), ბარკულესკუ (2ქ), კუტი (3ქ).
მსაჯები: ს. მიჰაილოვი (რუსეთი), მ. კარაბილეჩენი (თურქეთი), ბ. ატარდი (იტალია).

რუმინეთის ჩემპიონს ბიუჯეტიც ზურგს უმაგრებს და შემადგენლობა მშვენივრადაა შერჩეული: საშუალო-ევროპული დონის 10 კალათბურთელი ჰყავს, რომლებიც ერთმანეთს ისე ცვლიან, გუნდის თამაშის ხარისხი "გრამითაც" არ ეცემა. თბილისში კლუჟელმა სათადარიგოებმა 40 ქულა ჩააგდეს.

და მესამე მიზეზი - მთავარ მწვრთნელ მიჰაი სილვასანს კარგად მოეხსენება, რამდენად ძლიერიც უნდა იყოს შემადგენლობა, მაღალი მიზნებისთვის ბრძოლისთვის აუცილებელია, კონდიციებში მოიყვანო და შეათამაშო.

საინტერესოა, რომ მე-14 წუთისთვის "კლუჟის" ერთბაშად 10 კალათბურთელს ჰქონდა მინიმუმ 2 ქულა ჩაგდებული. ეს ჩვენი მეტოქის გუნდურობაზე მეტყველებს.

"დინამო" საქართველოს ჩემპიონატშიც კარგად აწყობილი გუნდის შთაბეჭდილებას ტოვებს და ფიბას თასის ბულგარულ მატჩშიც ასეთი იყო, მაგრამ "კლუჟის" მწყობრმა დაცვამ ჩვენი გუნდი იმდენად შეზღუდა, რომ პირველ ტაიმში ქულებს ამა თუ იმ კალათბურთელის ინდივიდუალური ოსტატობის ხარჯზე ვაგდებდით.

წაგების მიზეზებში ძირითადად მეტოქეზე დავწერეთ. რეალურად სწორედ "კლუჟის" კლასი აღმოჩნდა გადამწყვეტი და დაგვანახა, საით უნდა წავიდეთ. 

"დინამოს" პრეზიდენტმა ვახტანგ ნაცვლიშვილმა მატჩის შემდეგ სწორედ მისი გუნდის გზაზე ილაპარაკა:

"დიდი ხნის შესვენების შემდეგ ევროტურნირებზე ქართულ გუნდთაგან "დინამო" გავიდა. ვიცით, რომ ფიბას თასს ვერ მოვიგებთ, მაგრამ მთავარი იყო ნაბიჯის გადადგმა ევროპისკენ. წლევანდელი შეჯიბრება გვიჩვენებს გზას, საითაც უნდა ვიაროთ".

თუ "დინამოს" ამოცანა ფიბას თასის ჯგუფურ ეტაპზე ღირსეული თამაშია, "კლუჟის" ამოცანა - ჯგუფიდან გასვლა და ჩემპიონობისთვის ბრძოლაა. ისევე როგორც ქართველებს აქვთ საიმისო რესურსი, რომ ღირსეულად ითამაშონ, რუმინელებსაც ჰყავთ შესაბამისი შემადგენლობა მაღალი მიზნებისთვის საბრძოლველად.

ნამატჩევს
"კლუჟთან" მატჩის შემდეგ დინამოელთა დამრიგებელმა ირაკლი ხოშტარიამ ზოგადი კომენტარი გააკეთა:

- ფიბას თასზე გამოსვლით ვცდილობთ ქართული კალათბურთი წინ წავწიოთ. ბევრს ვშრომობთ, ვცდილობთ, ყოველ მატჩში ღირსეულად გამოვიდეთ. კალათბურთელებმა არც რუმინელებთან დააკლეს მონდომება, მაგრამ ძლიერი მეტოქე გვყავდა და იყო შეცდომები. გამოჩნდა რომ სადღეისოდ მზად არ ვართ ასეთ გუნდებთან... სათამაშოდ კი არა - მოსაგებად.

კაელ ტურპინი ("დინამოს" წინახაზელი):
- დღესაც დავინახეთ, რომ ყველასთან შეგვიძლია თამაში. უშანსოდ არავისთან ვართ. დიდი დანაკლისი იყო ნიკოლა გაჩეშას არყოფნა, რომელსაც ფეხის ტრავმა აქვს. "კლუჟი" მაღალი კლასის გუნდია და ჩვენი შეცდომები კარგად გამოიყენა. მეოთხე პერიოდში შეცდომები მინიმუმამდე დავიყვანეთ და კარგი კალათბურთიც ვითამაშეთ.

მიჰაი სილვასანი ("კლუჟის" მწვრთნელი):
- მატჩმა ჩვენი მოლოდინი გაამართლა: ველოდით, რომ გავიმარჯვებდით და გავიმარჯვეთ. ველოდით, რომ დინამოელები ბოლომდე იბრძოლებდნენ და ბოლომდე იბრძოლეს. ველოდით, რომ მეორე ტაიმში კონცენტრაციის შენარჩუნება გაგვიჭირდებოდა და მართლაც გაგვიჭირდა, რითაც "დინამომ" კარგად ისარგებლა. თბილისში ჩვენი დასახული ამოცანა შევასრულეთ, ახლა რუმინეთის ჩემპიონატის სერიოზული მატჩისთვის მოვემზადებით, შემდეგ ბულგარული "აკადემიკი" გველის. ისიც უნდა დავამარცხოთ, რომ ჩვენს პირველ მიზანს მივუახლოვდეთ.

"კლუჟის" მწვრთნელმა "პირველ მიზნად" ჯგუფიდან გასვლა დაასახელა.

E ჯგუფი
დინამო-კლუჟი 73:87
ისტანბული (თურ.)-აკადემიკი (ბულ.) 81:69

ა გ გუნდი თ მ წ ქ
1. კლუჟი 2 2 0 4
2. აკადემიკი 2 1 1 3
2. ისტანბული 2 1 1 3
4. დინამო 2 0 2 2

1 ნოემბერი
ისტანბული-დინამო
აკადემიკი-კლუჟი

ყოველდღიური სპორტული გაზეთი "ლელო"
1289
მკითხველის კომენტარები / 0 /
მსგავსი ამბები
რუბრიკის სხვა სიახლეები
;