დინამო კუხიანიძის შესანიშნავი გოლით გადარჩა...

სვანაძის გუნდმა თურქეთში კიდევ ერთი ფრე ითამაშა

თბილისის „დინამომ“ თურქულ შეკრებაზე მეორე ამხანაგური მატჩი გამართა და კვლავ ფრედ ითამაშა. ამჯერად, ქართული საკლუბო ფეხბურთის ფლაგმანს მეტოქეობა სერბულმა „სპარტაკ სუბოტიცამ“ გაუწია.

გადაუღებელმა წვიმებმა კვალი მოედანსაც დაამჩნია. ლუკა ქაფიანიძემ და ანტონიო როხანომ მცირე ტრავმების გამო ვერ ითამაშეს. თავად მატჩს რაც შეეხება, ის სერბების უპირატესობით დაიწყო და პირველ 15 წუთში 3 სახიფათო მომენტი შექმნეს „დინამოს“ კართან - პირველ შემთხვევაში დმიტრო ივანისენიამ განმუხტა სიტუაცია, ორჯერ კი თბილისელები აშკარა ხიფათისგან ესპანელმა გოლკიპერმა ხოსე პერალესმა იხსნა.

ამის შემდეგ თამაში გათანაბრდა და დინამოელებმაც მწვავედ შეუტიეს. აღსანიშნავია გუჯა რუხაიას შორეული დარტყმა და ლევან შენგელიას „სტანდარტი“, რომლის დროსაც „სუბოტიცა“ მეკარემ გადაარჩინა. ტაიმის ბოლომდე გუნდებმა თითო, მეტ-ნაკლებად სახიფათო მომენტი გაცვალეს.

მეორე ტაიმის დებიუტი კი უკვე თბილისელებისა იყო. პირველ 10 წუთში ფრან კარბიას და შენგელიას შეეძლოთ თავის გამოჩენა. ესპანელმა შემტევმა მახვილი კუთხიდან დაარტყა, მაგრამ არაზუსტად, დამატებაზე კი შენგელია თამაშობდა ტექნიკურად, რასაც ბოლო წამს მასზე უხეშობა მოჰყვა, თუმცა მსაჯმა პენალტი არ დანიშნა.

ცოტა ხანში კარბიას თავური ოდნავ ასცდა ბალკანელთა კარს. 56-ე წუთზე კი ანგარიშიც გაიხსნა - მეტოქემ „დინამოს“ დაცვაში დაშვებული შეცდომით ისარგებლა და ჯენიჩმა შანსი გამოიყენა.

დარჩენილ დროში „დინამო“ ბევრს უტევდა, მეტოქე კი კონტრშეტევებზე ცდილობდა თამაშს, თუმცა ბოლო წუთამდე არაფერი შეცვლილა. მატჩის მიწურულს კი გიორგი კუხიანიძის ტექნიკურ დარტყმას ანგარიშის გათანაბრება მოჰყვა - 1:1.

საბოლოოდ თამაში ასეც მორჩა. მომდევნო შეხვედრას თბილისელები ბოსნიურ „შიროკი ბრიეგთან“ 5 თებერვალს გამართავენ.

დინამო (თბ)-სუბოტიცა 1:1
0:1 ჯენიჩი (56), 1:1 კუხიანიძე (90)
„დინამო“: პერალესი (46. სიკაჩი), რუხაია (75. გაბიტაშვილი), კობოური (54. მეჯუბი), მონხილი (56. ძოწენიძე), იაშვილი, ივანისენია (60. ქარდავა), პაპავა (46. კუხიანიძე), შენგელია (69. ნინუა), შულაია (65. ერგემლიძე), კუტალია (46. ზარია), კარბია.

ყოველდღიური სპორტული გაზეთი "ლელო"
822
მკითხველის კომენტარები / 0 /
მსგავსი ამბები
რუბრიკის სხვა სიახლეები
;