დინო ჰამზიჩი: ვნახოთ, რას მეტყვის ჩიხურა...

დინო ჰამზიჩს საჩხერის "ჩიხურასთან" კონტრაქტი დაუსრულდა, მაგრამ ჯერ არ იცის, საქართველოში დარჩება თუ კარიერას სხვა ქვეყანაში გააგრძელებს. თუმცა ის არ მალავს, რომ ამჯერად, წინადადებები არ აქვს.

"ვითამაშებ თუ არა ისევ "ჩიხურაში"? ეს ჯერ არ ვიცი. ახლა თავისუფალი აგენტი ვარ, მაგრამ სხვა კლუბისგან წინადადებები არ მიმიღია", - ამბობს ჰამზიჩი.

შესთავაზეს თუ არა საჩხერელებმა ახალი კონტრაქტი? ბოსნიელი მეკარე ამაზე საინტერესო კომენტარს აკეთებს: "ჯერ შემოთავაზება არ მიმიღია. ახლა არც ვიცი, როგორ ვითარება იქნება. მაგრამ იმედი მაქვს, თანამშრომლობა გაგრძელდება. "ჩიხურაში" დიდი ხანია ვთამაშობ და ამ კლუბს, თანაგუნდელებს და გარემოს ძალიან შევეჩვიე. "ჩიხურას" პასუხს  15 იანვრამდე ველოდები. ვნახოთ, რას მეტყვიან"...

როგორ აფასებს გასულ წელს და შეეძლო თუ არა "ჩიხურას" სეზონის უკეთ ჩატარება? ჰამზიჩი ამის შესახებაც გველაპარაკა: "მთლიანობაში, ცუდი წელი ნამდვილად არ იყო, რადგან ევროპალიგაზე ვითამაშეთ. მაგრამ სეზონი არ იყო ისეთი, როგორიც გვინდოდა, რომ ყოფილიყო. მნიშვნელოვანია, რომ "ჩიხურა" ეროვნულ ლიგაში დარჩა".

31 წლის ბოსნიელი მეკარე საქართველოში, კერძოდ, საჩხერის "ჩიხურაში" 2016 წლიდან (83 მატჩი) თამაშობს. იმერულ გუნდში ის თავისუფალი აგენტის სტატუსით მივიდა. 2007-08 წლებში ბოსნიის 21-წლამდელთა ნაკრების წევრი გახლდათ. უთამაშია ადგილობრივ "სარაევოში", "ოლიმპიკსა" და ლოძის (პოლონეთი) "ვიძევში".

2017 წლის 2 დეკემბერს "ჩიხურამ" საქართველოს თასის ფინალში ქუთაისის "ტორპედო" დაამარცხა. ეს ჰამზიჩისთვის კარიერაში მეორე ტიტული იყო. მანამდე, ის ბოსნიის თასის გამარჯვებული (2015) გახლდათ. აღსანიშნავია, რომ ორივე მატჩის ბედი პენალტების სერიაში გადაწყდა და ორივეში გადამწყვეტი როლი სწორედ ჰამზიჩმა ითამაშა.

2017 წლის 3 დეკემბერს "ჩიხურამ" მეოთხე ცდაზე შეძლო ფინალში გამარჯვება. სოსო ფრუიძის გუნდმა გორის "თენგიზ ბურჯანაძეზე" საქართველოს მაშინდელ ჩემპიონ ქუთაისის "ტორპედო" რომ პენალტებით რომ სძლია (4:3), ბოსნიელმა საფეხბურთო "ლატარიაში" ორი 11-მეტრიანი მოიგერია და მატჩის საუკეთესო ფეხბურთელის პრიზითაც დააჯილდოვეს. აღსანიშნავია, რომ "ჩიხურამ" მაშინ თასი ისე მოიგო, გოლიც არ გაუშვია.

1104
მკითხველის კომენტარები / 0 /
მსგავსი ამბები
რუბრიკის სხვა სიახლეები
;