დიქსონის 36 ქულა, ბრძოლა და მარცხი სერბეთთან [VIDEO]

საქართველოს ნაკრებმა მსოფლიოს თასის საკვალიფიკაციო ეტაპის მეორე მატჩში სერბეთში 87:105 დათმო.

ქართველებმა პირველ ტაიმში მეტოქეს ღირსეული წინააღმდეგობა გაუწიეს, თუმცა მესამე რაუნდში მაჩვანისა და რადულიცას დამაჯერებელი თამაშის შემდეგ მასპინძლებმა 10-ქულიანი უპირატესობა მოიპოვეს, რაც მეოთხე რაუნდში განავრცეს და სერბეთის ნაკრები ორი მოგებით ჯგუფში გერმანიასთან ერთად ლიდერობს.

საქართველოს ნაკრებს ფარქვეშიდან ქულების მოგროვება უჭირდა, ჩვენი გუნდის ლიდერობა ამერიკელმა მაიკლ დიქსონმა იკისრა და 36-ქულამდე ავიდა. საქართველოს ნაკრების ვიცე-ბომბარდირი სასტარტო უკანახაზელი მერაბ ბოქოლიშვილი გახდა, რომელსაც კარიერის მატჩი ჰქონდა - 30 წუთში 5-დან 4 სამქულიანი, 1-დან 1 ორიანი გამოიყენა და 14 ქულას მოუყარა თავი.

სერბეთის მხრიდან 28 ქულით ბომბარდირი ზაზა ფაჩულიას ყოფილი თანაგუნდელი მიროსლავ რადულიცა გახდა. მისი ჯარიმის გარეშე შეჩერება ძალიან ჭირდა და ამიტომ მოუწია 18 საჯარიმოს ტყორცნა, საიდანაც 14 გამოიყენა.

საინტერესოა, რომ სერბებმა ფარქვეშიდან 34 ქულა ჩააგდეს, მაშინ, როცა ჩვენმა გუნდმა ამ ადგილიდან მხოლოდ - 14.
თებერვალში საქართველოს ნაკრებს ჯერ ავსტრიაში ელის მატჩი, შემდეგ - თბილისში გერმანიასთან.

1051
მკითხველის კომენტარები / 0 /
მსგავსი ამბები
რუბრიკის სხვა სიახლეები