დონეცკის 'ოლიმპიკის' პრეზიდენტი თემურ ფარცვანიას გარიგებულ თამაშებში მონაწილეობას აბრალებს

სასიამოვნო არ ეთქმის ინფორმაციას, რომელიც უკრაინულმა გამოცემებმა გაავრცელეს. დონეცკის "ოლიმპიკის" პრეზიდენტი ვლადისლავ გელზინი გუნდის ორ მოთამაშეს გარიგებულ თამაშებში მონაწილეობას აბრალებს.

სამწუხაროდ, ერთ-ერთი მათგანი თემურ ფარცვანიაა - უკრაინული პასპორტის მქონე ქართველი, მეორე კი კონგოელი მცველი ემერსონი.

შედეგად, გელზინმა მწვრთნელს ორივე მათგანის დუბლშემადგენლობაში გადაყვანა უბრძანა. ყველაფერი ტელეარხ "ფუტბოლ 1-ის" საფეხბურთო გადაცემაში გამოთქმული ვარაუდით დაიწყო - ფარცვანია და ემერსონი არ იყვნენ "ოლექსანდრიასთან" გუშინწინდელი მატჩის (0:0) განაცხადში. კლუბის პრეზიდენტმაც ეჭვები სწორედ მაშინ გამოთქვა:

"ხომ ვიცით, ჩვენზე რასაც ლაპარაკობენ, მაგალითად, "ჩერნომორეცთან" ჩატარებული მატჩის შემდეგ. უკრაინის ფეხბურთის ფედერაციის სადისციპლინო კომიტეტს მივმართეთ, რათა ვითარებაში გავერკვეთ და კლუბის სახელს ჩირქი არ მიეცხოს.

ვიღაც ფიქრობს, რომ "ოლიმპიკი" არ არის მართალი, ზოგიც ფეხბურთელებს ადანაშაულებს... კი ბატონო, გამოგვიძახეთ, გველაპარაკეთ, შეგვამოწმეთ... საბოლოოდ, სწორედ მაშინ გავიგებთ, ეს ფეხბურთელები სუფთად თამაშობდნენ, თუ ეს არის მათი დღევანდელი დონე? ეს ბოლო მატჩებში მონაწილე ყველა ფეხბურთელს ეხება, მაგრამ მათ (ემერსონსა და ფარცვანიას) ყველაზე მეტად", - ამბობს გელზინი.

ფარცვანიასთან დაკავშირება ჯერჯერობით ვერ მოვახერხეთ, მაგრამ ვეცდებით, დაველაპარაკოთ და ამ რებუსულ ვითარებაში გარკვევა ვცადოთ. ცალმხრივი ინფორმაციით სიმართლე ვერ დადგინდება.

710
მკითხველის კომენტარები / 0 /
მსგავსი ამბები
რუბრიკის სხვა სიახლეები