დოპინგი: მინუს 2 ოქრო - რუსეთი სოჭის ოლიმპიადის გამარჯვებული აღარ არის

საერთაშორისო ოლიმპიურმა კომიტეტმა ორ რუს ბობსლეისტზე - ალექსანდრ ზუბკოვსა და ოლგა სტულნევაზე, აგრეთვე ორ მოციგურავეზე - ოლგა ფატკულინასა და ალექსანდრ რუმიანცევზე მიიღო გადაწყვეტილება. სადისციპლინო კომისიამ, დენის ოსვალდის ხელმძღვანელობით, ეს სპორტსმენები ანტისადოპინგო წესების დარღვევაში დაადანაშაულა და გააუქმა მათი შედეგები 2014 წლის სოჭის ოლიმპიადაზე.

ასე რომ, რუსეთმა დაკარგა ორი ოქროს მედალი, რომელიც ზუბკოვს ჰქონდა მოგებული და ერთი ვერცხლი, რომელიც ფატკულინამ მოიპოვა ციგურებით რბენაშე 500 მეტრ დისტანციაზე.

ამ ოთხეულს სამუდამოდ აეკრძალა ოლიმპიადებში მონაწილეობა, მათ შორის, პიონჩანგის თამაშებში, რომელიც 2018 წლის თებერვალში გაიმართება.

შესაბამისად, რუსეთს დარჩა 10 ოქრო, 7 ვერცხლი და 7 ბრინჯაო და მესამე ადგილზე ჩამოქვეითდა სოჭის ოლიმპიადის მედლების სიაში. პირველ ადგილზე გადავიდა ნორვეგია (11 ოქრო, 6 ვერცხლი, 12 ბრინჯაო), მეორეზე - კანადა (10-10-5).

ზუბკოვმა სპორტული კარიერა 2014 წელს დაასრულა და დღეს ის რუსეთის ბობსლეის ფედერაციის პრეზიდენტია.

შეგახსენებთ, რომ უფრო ადრე, საერთაშორისო ოლიმპიურმა კომიტეტმა ანალოგიური სასჯელი გამოუტანა ექვს რუს მოთხილამურეს - ალექსანდრ ლეგკოვს, ევგენია ბელოვას, მაქსიმ ვილეგჟანინს, ალექსეი პეტუხოვს, ევგენი შაპოვალოვსა და იულია ივანოვას, აგრეთვე ოთხ სკელეტონისტს - ალექსანდრ ტრეტიაკოვს, ელენა ნიკიტინას, მარია ორლოვასა და ოლგა პოტილიცინას.

ჩამოთვლილი სპორტსმენებიდან ლეგკოვმა დაკარგა სოჭის თამაშების ოქრო და ვერცხლი, ვილეგჟანინმა - სამი ვერცხლი, ტრეტიაკოვმა - ოქრო და ნიკიტინამ - ბრინჯაო.

ყოველდღიური სპორტული გაზეთი "ლელო"
1247
მკითხველის კომენტარები / 0 /
მსგავსი ამბები
რუბრიკის სხვა სიახლეები
;