'დორტმუნდი', 'აინტრახტი' და 'ლევერკუზენი' - ჩაკვეტაძის ბუნდესვარიანტები

"დორტმუნდი", "აინტრახტი" და "ლევერკუზენი" - სწორედ ეს გერმანული კლუბები აკვირდებიან გიორგი ჩაკვეტაძეს.

ინფორმაცია ბუნდესლიგის კლუბების დაინტერესებაზე "ტრანსფერმარკტის" ფორუმზე გავრცელდა, სადაც დაზუსტებულია, რომ ჩაკვეტაძეს სექტემბრიდან აკვირდებიან, როცა ევროპალიგის პლეი ოფში "გენტი" "ბორდოს" შეხვდა.

"ტრანსფერმარკტის" ფორუმი ჩვეულებრივი ინტერნეტგვერდი არ არის, სადაც მკითხველი თავის ვარაუდებს დაწერს. პრინციპი ასეთია - განხილვები მოდერატორების მიერ რეკომენდირებული თემებით იწყება, რომელმაც ამა თუ იმ შესაძლო ტრანსფერის შესახებ გავლენიანი ოფიციალური წყარო უნდა მიუთითოს. მერე კი თემას კარგად ინფორმირებული და რეგისტრირებული პირები განიხილავენ.

"ეს საიტი არასდროს ჭორაობს. რადგან ჩაკვეტაძის შემთხვევაში საქმე წამყვან გერმანულ კლუბებს ეხება, და რადგან ეს გერმანული საიტია, ეს იმას ნიშნავს, რომ ბუნდესლიგური გრანდების მხრიდან ინტერესი რეალურია", - გვეუბნება "ტრანსფერმარკტის" წარმომადგენელი.

"ევროპალიგის პლეი ოფში ერთმანეთს შეხვდნენ "ბორდო" და "გენტი". იქ იყვნენ სკაუტები "დორტმუნდიდან", აინტრახტიდან" და "ლევერკუზენიდან". ჩაკვეტაძე ქართული ფეხბურთის ისტორიაში ერთ-ერთ ყველაზე დიდ ტალანტად ითვლება და ამიტომ ბევრი გუნდი დაინტერესდა. ადრე ის "ბაიერნს" სურდა, ახლა "დორტმუნდის" ყურადღება მიიქცია. ისინი ხშირად ამტკიცებენ, რომ ახალგაზრდა ტალანტების შერჩევაში წარმატებულები არიან. დორტმუნდელი სკაუტები ამ შეხვედრაზე იმყოფებოდნენ. როგორც ვიცით, მათ ძირითადად აინტერესებდათ ჩაკვეტაძე, რომელიც შემტევი ნახევარმცველია", - წერია "ტრანსფერმარკტზე".
ერთ-ერთი მომხმარებელი ამ ტრანსფერს ეჭვით უყურებს: "ის ნიჭიერი ბიჭია, მაგრამ მეეჭვება, ტრანსფერი შედგეს, რადგან "დორტმუნდში" ამ პოზიციაზე საკმაო რაოდენობის მოთამაშეა".

გვერდის ერთ-ერთი მომხმარებელი მას არ ეთანხმება: "სინამდვილეში, ამ პოზიციის მოთამაშე "დორტმუნდში" არ არის. კაგავა უფრო დაცვითი ფუნქციების შესრულებისას არის ძლიერი, გიოტცე კი - შეტევაში, ჩაკვეტაძის მსგავსი შემტევი ნახევარმცველი კი გუნდში არაა. მე ამ ტრანსფერს მაინც არ გამოვრიცხავ".

შეგახსენებთ, რომ "ტრანსფერმარკტის" მონაცემებით, გიორგი ჩაკვეტაძის სატრანსფერო ღირებულება 5 მილიონი ევროა. მაგრამ "ტრანსფერმარკტის" წარმომადგენელი ამბობს, რომ შესაძლოა, დეკემბერში გიორგის ტრანსფერის ღირებულება 8-დან 12 მილიონის ფარგლებში გაიზარდოს. ყველაფერი დამოკიდებული იმაზე, როგორ ითამაშებს ჩაკვეტაძე ნაკრებსა და კლუბში.

ყოველდღიური სპორტული გაზეთი "ლელო"
720
მკითხველის კომენტარები / 0 /
მსგავსი ამბები
რუბრიკის სხვა სიახლეები