დუდუ დადიანის მემორიალი. ფინალში 'დელტას' 'ტიტები' შეუწყვილდა

დუდუ დადიანის მემორიალის მეორე ფინალისტი ცნობილია. ჯგუფური ეტაპის ბოლო ტურში სუპერლიგის დებიუტანტმა "შსს აკადემია-ტიტებმა" "ქუთაისი" დაამარცხა და ფინალში თბილისის "დელტას" შეუწყვილდა.

თსუ/ჰიუნდაი-ბათუმი 78:74

ამ მატჩს სატურნირო თვალსაზრისით მნიშვნელობა არ ჰქონდა, თუმცა ორივე გუნდისთვის საკმაოდ ღირებული გახლდათ: ერთი, რომ ტურნირის ბოლო მატჩის შედეგიანად დასრულება სურდათ, მეორეც - სუპერლიგის სეზონის წინ შესათამაშებლად და ლეგიონერების შესაფასებლად მშვენიერი შესაძლებლობა გახლდათ.

შედეგს რაც შეეხება, ამ მხრივ კმაყოფილი "თსუ-ჰიუნდაი" დარჩა, რომელმაც შეხვედრა დაძაბულ ბრძოლაში, 4 ქულის სხვაობით მოიგო. სუპერლიგის დებიუტანტი მხოლოდ ქებას იმსახურებს: ნიკო ჩერქეზიშვილის გაწვრთნილმა გუნდმა გუნდმა "ა" ჯგუფში 4-დან 3 მატჩი მოიგო, ისევე როგორც ფინალში გასულმა "დელტამ", თუმცა ჯგუფში პირველობა ურთიერთშეხვედრაში მარცხის გამო არ ერგო.

ოლიმპი-მგზავრები 85:84

ამ მატჩის შედეგმა ფინალისტის გამოვლენაზე დიდი გავლენა იქონია. ფინალში გასვლის პრეტენდენტ "მგზავრებს" გამარჯვება სჭირდებოდა, რათა მომდევნო შეხვედრაში "ტიტებს" რომ "ქუთაისისთვის" მოეგო (როგორც მოხდა კიდეც), ფინალში გასვლის კარგი შანსი ჰქონდა. ცხადად რომ ვთქვათ, "მგზავრების" მოგების შემთხვევაში, "ტიტებს" ფინალში გასასვლელად "ქუთაისის" 16 ქულით დამარცხება სჭირდებოდა, ხოლო "ტიტების" 4-დან 15 ქულამდე სხვაობით მოგებას სატიტულო მატჩში "მგზავრები" გაჰყავდა.

ამიტომაც იყო, ბუბა ბერიშვილის გაწვრთნილმა "მგზავრებმა" მეტოქეს არაფერი რომ არ დაუთმო. შეხვედრის დასრულებამდე 5 წუთზე ნაკლები რჩებოდა, 10 ქულით რომ აგებდნენ, თუმცა ძირითადი დროის დარჩენილ წუთებში მგზავრებმა გათანაბრება მოახერხეს და შეხვედრა ოვერტაიმში გადაიყვანეს.

ექსტრახუთწუთეულმაც ვერ გამოავლინა გამარჯვებული და მეორე ოვერტაიმის ბოლოს "მგზავრებმა" გამარჯვება ფაქტობრივად გაინაღდეს - დასრულებამდე 1 წამით ადრე ადრიან ბოუიმ ზუსტი ორქულიანით თავისი გუნდი 84:82 დააწინაურა.

აქ კი მოხდა მცირე სასწაული. "ოლიმპის" მწვრთნელმა, დიმიტრი ჯაკობოვმა წუთშესვენება აიღო, მოთამაშეებს დავალება მისცა და… გვერდითი ხაზიდან შემოტანილი ბურთი ოლიმპელთა კაპიტანმა რეზო როგავამ პერიმეტრიდან გვარიანად მოშორებით მიიღო და 1 წამში მისი სროლა მოასწრო.

შორეული სამქულიანი "მგზავრების" კალათში ჩაეშვა, საფინალო სირენა კი მაშინ გაისმა, როცა ბურთი როგავას ხელებს მოსწყდა. "ოლიმპის" კაპიტანს, რომელსაც მანამდე 28 ქულა ჰქონდა მითვლილი, გადამწყვეტი სროლის შემდეგ 31 ქულა მოუგროვდა და ის მატჩის დამსახურებული გმირი გახდა.

შსს აკადემია/ტიტები-ქუთაისი 85:75

სუპერლიგის დებიუტანტმა "შსს ასკადემია-ტიტებმა" ფინალში გასვლით მცირე სენსაცია მოახდინა. ამ ტურნირის სატიტულო მატჩში აქამდე ყოველთვის მოწინავე გუნდები გადიოდნენ და პირველად მოხდა, რომ თასისთვის გასულ სეზონში "ა" ლიგაში მოთამაშე გუნდი იბრძოლებს.

დავით უსტიაშვილის გაწვრთნილმა გუნდმა კარგად შეირგო ის შანსი, რომელიც მას "მგზავრების" "ოლიმპთან" დამარცხებით მიეცა. "შსს აკადემია-ტიტები" ბოლო წლების ერთ-ერთ მოწინავე გუნდთან მატჩს კარგად მომზადებული შეხვდა. პირველი პერიოდის 17:19 წაგების შემდეგ, დავით უსტიაშვილის გუნდმა თამაშში გარდატეხა შეიტანა და მწყობრი დაცვისა და სწრაფი კონტრშეტევების ხარჯზე ჯერ ლიდერობა მოიპოვა, შემდეგ კი უპირატესობა გაიმყარა. დიდი შესვენებიდან "შსს აკადემია-ტიტები" 7-ქულიანი ლიდერობით დაბრუნდა და უპირატესობა მალევე 15 ქულამდე გაზარდა...

"შსს აკადემია-ტიტები" დუდუ დადიანის ფინალში "დელტას" 22 ოქტომბერს, ოლიმპიურ სასახლეში, 18:00 საათზე დაუპირისპირდება.

დინამო-რუსთავი 104:77
დინამოელებმა თავიდანვე მოიპოვეს ხელჩასაჭიდი უპირატესობა, რომელსაც თამაშის ბოლომდე წარმატებით ინარჩუნებდნენ და საბოლოოდ 27 ქულის სხვაობით იმარჯვეს.

თბილისელებს ამერიკელმა ლეგიონერმა ჯორდან სვოპშირმა 18 ქულით ულიდერა, მთლიანობაში კი შვიდმა დინამოელმა უწია 10-ქულიან ზღვარს. "რუსთავში" 21 ქულითა და 11 მოხსნით საუკეთესო იყო რუდოლფ ჯოლი, ისააკ ბენქსმა კი თავი 14 ქულას მოუყარა.

"ა" ჯგუფი

გუნდი თ მ წ ქ
1. დელტა 4 3 1 7
2. თსუ-ჰიუნდაი 4 3 1 7
3. დინამო 4 2 2 6
4. რუსთავი 4 1 3 5
5. ბათუმი 4 1 3 5

"ბ" ჯგუფი

გუნდი თ მ წ ქ
1. ტიტ 4 3 1 7
2. ქუთ 4 3 1 7
3. ოლიმპი 4 2 2 6
4. მგზავრები 4 2 2 6
5. კაკტუსი 4 0 4 4

ყოველდღიური სპორტული გაზეთი "ლელო"
793
მკითხველის კომენტარები / 0 /
მსგავსი ამბები
რუბრიკის სხვა სიახლეები
;