დღემდე უცნობი დოკუმენტი: როგორ აპირებდა მოურინიო მესის და ბარსელონას შეჩერებას...

როგორ შეიძლება შევაჩეროთ ლიონელ მესი? ეს კითხვა დიდი ხანია მთელი მსოფლიოს მასშტაბით აწუხებთ მწვრთნელებს, მაგრამ უტყუარი პასუხი დღემდე ვერ მოიძებნება. აქ ისტორიიდან უნდა გავიხსენოთ ერთი შემთხვევა - 2006 წელი, ჩემპიონთა ლიგა, "ბარსელონასა" და "ჩელსის" დაპირისპირება...

ცნობილი ხდება ჟოზე მოურინიოსა და მისი შტაბის მიერ ჩაწერილი შენიშვნები, რომელიც ძალიან საინტერესო უნდა იყოს - როგორ აპირებდა "ჩელსი" "ბარსელონას" ლიდერის შეჩერებას:

"ეს ოფიციალური დოკუმენტი არ არის. ეს არის, უბრალოდ, გაწეული სამუშაო. ოფიციალური ანგარიშების წარმოებით სტატისტიკოსები არიან დაკავებულები", - თქვა მოურინიომ "სანთან" საუბარში.

ეს დოკუმენტი არ ეხება მხოლოდ ლიონელ მესის. მასში მთლიანად "ბარსელონაა" "დამუშავებული". იქ ხაზგასმულია, რომ კარლოს პუიოლი აგრესიულია, მაგრამ ყოველთვის კარგად ვერ ირჩევს პოზიციას, რომ პუიოლს ხშირად არ სწყალობენ მსაჯები, ხოლო, რაც შეეხება მის მეწყვილე ოლეგერს, მას, უბრალოდ, არ აქვს სახე... ცუდი მცველია და მასზე მუდმივად უნდა ხორციელდებოდეს ზეწოლა.

რაც შეეხება მესის, მოურინიოს აზრით, უკეთესი იქნებოდა, რომ მისი თამაში ნაწილებად დაიშალოს და ძალიან ხშირად მოექცეს "ყუთში", ანუ წნეხში. აქვე განხილულია ნორვეგიელი არბიტრის, ტერიე ჰაუგეს მსაჯობის მანერა. 

შენიშვნებში აღნიშნულია ისიც, რომ მესის თამაში - ეს არის ხარისხს პლუს სისწრაფე, რომ მას ზედმეტად უყვარს მარცხენა ფეხით თამაში და არავითარ შემთხვევაში არ უნდა მიეცეს რონალდინიოსთან ურთიერთქმედების საშუალება:

"მას სჭირდება ბურთის თავისუფლად მიღება იმისთვის, რომ დაიწყოს შეტევა და მას არავითარ შემთხვევაში არ უნდა მიეცეს ამის საშუალება", - წერია დოკუმენტში.

რაც შეეხება რონალდინიოს, საინტერესოა, რომ მას წინასამატჩო ანალიზში არცთუ დიდი ადგილი აქვს დათმობილი. ნათქვამია, რომ ის ძალიან ძლიერია კრეატიულ ფაზაში, მაგრამ არ უყვარს მინდორზე "შავი" სამუშაოს შესრულება.

"ჩავის გარეშე "ბარსელონას" ჰეგემონობა ბურთთან ერთად გაცილებით ნაკლებ ხანს გრძელდება", - ნათქვამია შენიშვნებში.

"დიდი დიაპაზონის შესანიშნავი ფეხბურთელი. როგორც წესი, სათადარიგოთა სკამიდან შედის მინდორზე და თამაშს ძალიან აძლიერებს", - ვკითხულობთ დოკუმენტში ანდრეს ინიესტას შესახებ.

"ჩვენ საგანგებო ყურადღება უნდა დავუთმოთ სამუელ ეტო'ოს. ის ძალიან საშიშია ბურთთან ერთად და არანაკლებ უნდა ვუფრთხოდეთ მის უბურთოდ მოძრაობას. სულ ეძებს სივრცეს სახიფათო მომენტის შექმნისთვის. მაქსიმალურად იყენებს ნებისმიერ სიცარიელეს", - ნათქვამია ამავე შენიშვნებში.

...ის თამაშები ყველას გვახსოვს. საბოლოო ჯამში "ბარსელონამ" მოახერხა "ჩელსის" დამარცხება და ბოლოს ჩემპიონთა ლიგაც მოიგო, დაამარცხა რა ფინალში "არსენალი" - 2:1. როგორც ჩანს, მოურინიოს გეგმამ ბოლომდე ვერ იმუშავა...

ყოველდღიური სპორტული გაზეთი "ლელო"
1313
მკითხველის კომენტარები / 0 /
მსგავსი ამბები
რუბრიკის სხვა სიახლეები
;