დღეს ავსტრია-საქართველოა - ველით ბრძოლას და ასამდე ხმაურიან გულშემატკივარს

დღეს ავსტრია-საქართველოა, მატჩი, რომელიც ქართული კალათბურთის მომავლისთვის ბევრს ნიშნავს.

მისი მოგების შემთხვევაში, ფაქტობრივად, მსოფლიოს ჩემპიონატის მეორე შესარჩევი ეტაპის საგზურს ვინაღდებთ, დარჩება ავსტრიასთან განმეორებითი მატჩი თბილისში, რომელშიც შემადგენლობა გაცილებით ძლიერი უნდა გვყავდეს...

23 თებერვლის მატჩზე, წინასწარი ინფორმაციით, ბევრი ქართველი გულშემატკივარი მოვა. წინასწარ ზუსტი რიცხვის დაწერა შეუძლებელია, მაგრამ "მულტივერსუმ არენაზე" 100-მდე ქართველი უნდა შეიკრიბოს.

გუშინ, ნაკრების ვარჯიშისკენ მიმავალს მეტროში ხმამაღალი ლაპარაკი მომესმა, მართალია, ვენის ვაგონში თბილისურისგან განსხვავებით გრუხუნი სულაც არ ისმის, მაგრამ მაინც გამიჭირდა გარჩევა, სადაურად ლაპარაკობდა ორი საშუალო ხნის კაცი. მესამე გაჩერებაზე უკვე გაშიფრული მყავდა - იმერული კილოთი საუბრობდნენ.

შევახსენე, ავსტრიაში საქართველოს კალათბურთელთა ნაკრები თამაშობს-მეთქი. ყველაფერი სცოდნიათ და აქეთ დამპატიჟეს მატჩზე. უნდა მოვუგოთო.

ნაკრების ვარჯიშის შემყურეს, იმედი ნამდვილად გაგიჩნდებოდათ, ჩვენი გუნდი დიდი მონდომებით ემზადება როგორც დაცვაში, ასევე შეტევაში კომბინაციებისთვის და, რაც მთავარია, სამქულიანებისთვის. სასიამოვნოა ისიც, რომ ჩვენს გუნდში ივარჯიშა მაიკლ დიქსონმა, რომელიც 22 თებერვალს შეუერთდა ნაკრებს.

მთავარი ის არის, მეტოქე როგორ მოგვცემს ჩვენი პლუსების გამოყენების საშუალებას და ჩვენ როგორ შევაჩერებთ ავსტრიელთა შეტევებს.
მატჩის წინ

ტომას შრეინერი (ავსტრიის ნაკრების გამთამაშებელი):
- საქართველოსთან ძალიან რთული მატჩი გველის. საწყისი ორი შეხვედრა ჩვენც წავაგეთ და ავსტრიაში გამარჯვება ძალიან ბევრს ნიშნავს.

ქართველების ნაკრებს კარგად ვიცნობთ, გყავთ კარგი პერიმეტრიდან მტყორცნელები, რომელთა შეჩერებაზე აქტიურად ვმუშაობთ. თუმცა საქართველოს ნაკრებს მოხსნაც შეუძლია და ფარქვეშ კარგი თამაშიც. ვფიქრობ, თანაბარი და საინტერესო თამაში იქნება.


საქართველო

მოთამაშე   პოზიცია   სმ   გუნდი
გიორგი ცინცაძე უკანახაზელი 192 პოლიტექნიკა (რუმინეთი)
მაიკლ დიქსონი უკანახაზელი 186 ბაჰჩეშეჰირი (თურქეთი)
მიხეილ ბერიშვილი ფორვარდი 203 დინამო
გოგა ბითაძე ცენტრი 211 მეგა ბიმაქსი (სერბეთი)
ანატოლი ბოისა უკანახაზელი 194 კაკტუსი
ნიკა ცქიტიშვილი ფორვარდი 213 ბიბლოსი (ლიბანი)
ლევან ფაცაცია უკანახაზელი 198 მარნეული
აკაკი დვალიშვილი ცენტრი 207 ქუთაისი
ნიკა დარბაიძე ფორვარდი 203 ოლიმპი
მერაბ ბოქოლიშვილი უკანახაზელი 194 ოლიმპი
ილია ლონდარიძე ფორვარდი 205 დინამო
რევაზ ჩაჩანიძე უკანახაზელი 190 რუსთავი

ავსტრია

მოთამაშე   პოზიცია   სმ   გუნდი
თომას შრაინერი უკანახაზელი 195 ბურგოსი (ესპანეთი)
დავორ ლამეშიჩი ფორვარდი 205 ველსი (ავსტრია)
ენის მურატი ფორვარდი 194 გმუნდენი (ავსტრია)
მარვინ ოგუნსიპე ფორვარდი 204 ბაიერნი (გერმანია)
იოზო რადოში ცენტრი 208 კაპფენბერგი (ავსტრია)
რაშიდ მაჰალბაშიჩი ცენტრი 210 ოლდენბურგი (გერმანია)
ბენედიქტ დანეკი უკანახაზელი 176 არკადია (ავსტრია)
მორიც ლანეგერი უკანახაზელი 190 ლონდონი (ინგლისი)
სებასტიან კოხი ფორვარდი 202 კორემნდი (უნგრეთი)
თომას კლეპეიში უკანახაზელი 186 ბრაუნშვაიგი (გერმანია)
ფილიპ კრამერი ფორვარდი 202 კაპფენბერგი (ავსტრია)
ბენედიქტ გუეტი უკანახაზელი 190 არკადია (ავსტრია)

ვაჟა სიმონიშვილი
ვენიდან

ყოველდღიური სპორტული გაზეთი "ლელო"
2032
მკითხველის კომენტარები / 0 /
მსგავსი ამბები
რუბრიკის სხვა სიახლეები
;