დღეს 'კარტოზია-ბალავაძე' იწყება,- გენო პეტრიაშვილი გრან პრიზე იჭიდავებს

დღეს თბილისში, სპორტის ოლიმპიურ სასახლეში ქართული საჭიდაო სეზონის უმნიშვნელოვანესი შეჯიბრება - "კარტოზია-ბალავაძის სახელობის დიდი პრიზის ტურნირი" იწყება.

ის ვაჟთა ორივე საჭიდაო სახეობაში ტარდება და თავისუფალ ჭიდაობაში მსოფლიოს ორგზის ჩემპიონ ვახტანგ ბალავაძის სახელობისაა, ბერძნულ-რომაულში კი მსოფლიოს სამგზის ჩემპიონ გივი კარტოზიას ხსოვნას ეძღვნება.

ორივე სახეობაში ეს ჩვენებისთვის უმნიშვნელოვანესი შეჯიბრებაა, რადგან მსოფლიოს ჩემპიონატისთვის მთავარი შესარჩევი ტურნირია. ამასთან, თავისუფალ ჭიდაობაში სარეიტინგოა ანუ საერთაშორისო რეიტინგისთვის ქულებს იძლევა, რის საფუძველზეც მსოფლიოს პირველობაზე ყოველ წონაში მოხდება ოთხი საუკეთესო ათლეტის განთესვა. ეს ფრიად მნიშვნელოვანია, რადგან წონის ლიდერები ერთმანეთს ადრეულ ეტაპზე, ნახევარფინალამდე არ შეხვდებიან, რითაც სპორტული პრინციპი მეტ-ნაკლებად დაცულია.

თუმცა რადგან სალიცენზიოა, მასში მონაწილეობა კვოტირებულია - ქვეყანას წონაში მხოლოდ სამი მონაწილის გამოყვანა შეუძლია. როგორც ჩვენი ნაკრების მთავარი მწვრთნელი გიორგი იანტბელიძე თავდაპირველად აცხადებდა, ბალავაძის ტურნირზე იჭიდავებდნენ მხოლოდ საქართველოს პირველობის მედალოსნები.

ამათგან ფინალისტებს განაღდებული აქვთ ჭიდაობა, ბრინჯაოს პრიზიორებს კი ერთმანეთს დააჭიდებდნენ საუკეთესოს გამოსავლენად და გამარჯვებული გახდებოდა მესამე მონაწილე. თუმცა მოგვანებით გადაწყვეტილება მანაც შეცვალა და შანსი ბრინჯაოს მედალოსანთა გარდა, სხვებსაც მისცა.

ეს ეგრეთ წოდებული "დასაყვანი შეხვედრები" შეჯიბრების დღეს, დილით, ძირითადი ტურნირის დაწყებამდე გაიმართება და მოგებული პირდაპირ ჩაებმება "დიდი პრიზის" გათამაშებაში. იანტბელიძის თქმით, ეს ჭიდაობაში მიღებული პრაქტიკა ყოფილა და თურმე სხვა ანალოგიურ შეჯიბრებებშიც მასპინძლები ასე ავლენენ მესამე ფალავანს და ამ მხრივ მსოფლიოს ფედერაციისგან პრობლემები არ შეგვექმნება.

ამ მხრივ გაცილებით თავისუფალია ბერძენ-რომაელთა ნაკრების მთავარი მწვრთნელი ბექა როყვა - რაკი მათთან მონაწილეობა შეზღუდული არაა, ის შანსს ყველა მეტ-ნაკლებად რეალურ კანდიდატს აძლევს და კარტოზიას ტურნირზე 44 ფალავანს გამოიყვანს, თუმცა 55 კილოგრამში მონაწილე არ გვეყოლება.

ამ შეჯიბრებაზე ერთი მნიშვნელოვანი სიახლეცაა: პირველადაა დაწესებული ბალავაძის და კარტოზიას სახელობითი პრიზები - მათი ქანდაკებები, რომლებიც ორივე სტილში საუკეთესო ათლეტებს გადაეცემათ. ეს იდეა ჩვენს კოლეგას - თამარ ბალავაძეს ეკუთვნის, პრიზები კი ცნობილმა ხელოვანმა ლევან ვარდოსანიძემ შექმნა ჩვეული რუდუნებით და ოსტატობით.

სტატუსებიდან და მნიშვნელობიდან გამომდინარე, წესით, ამ ტურნირში ჩვენი გუნდები უძლიერესი შემადგენლობებით უნდა გამოვიდნენ, მაგრამ ბერძნულ-რომაულში როყვა ლიდერთა უმეტესობას ასვენებს. მან თავიდან განაცხადა, რომ მხოლოდ ბერძნულ-რომაულში ევროპის წლევანდელ ჩემპიონ რობერტ კობლიაშვილს (87) დაასვენებდა, ვისაც გარანტირებუილი აქვს მსოფლიოს პირველობაზე წასვლა, სხვებს კი მოუწევთ კონკურენციაში ჩართვა, მაგრამ წარმოდგენილ შემადგენლობაში არც სხვა ლიდერები არ არიან.

სამაგიეროდ, თავისუფალ ჭიდაობაში უკლებლივ ყველა ლიდერი იასპარეზებს. გამონაკლისი მხოლოდ ოლიმპიური და მსოფლიოს ჩემპიონი, ევროპის სამგზის გამარჯვებული ვლადიმერ ხინჩეგაშვილია (65), სხვები კი გამოვლენ: ევროპის ორგზის ჩემპიონი, მსოფლიოსა და ოლიმპიური პრიზიორი დავით მარსაგიშვილი (92), ევროპისა და მსოფლიოს ჩემპიონი, ოლიმპიური მედალოსანი გენო პეტრიაშვილი (125), მსოფლიოს ჩემპიონი ზურაბ იაკობიშვილი (70), ევროპის ფინალისტები - ბექა ლომთაძე (61), ელიზბარ ოდიკაძე (97) და სხვები.
22 გუნდი

საკმაოდ ძლიერი იქნება უცხოელთა წარმომადგენლობაც - 22 გუნდი მიიღებს მონაწილეობას. მათ შორის - ირანი, თურქეთი, უკრაინა, სომხეთი, უზბეკეთი, ყაზახეთი, კორეა, რუსეთი (საკმაოდ სოლიდური დელეგაციით - 32 კაცით), მონღოლეთი, უნგრეთი და სხვები. არიან შორეული ქვეყნებიც სამხრეთ ამერიკიდან - გვატემალა და კოლუმბია, რომლებიც თავისუფალ ჭიდაობაში 2 კაცით გამოდიან და რამდენიმე დღით ადრეც გვესტუმრნენ ერთობლივ შეკრებაზე, როგორც კორეა.

აზერბაიჯანიდან მხოლოდ ერთი სპორტსმენია დარეგისტრირებული - ჩვენი თანამემამულე, თავისუფალ ჭიდაობაში ევროპის სამგზის ჩემპიონი გიორგი ედიშერაშვილი (57), რომელიც ასევე ადრე ჩამოვიდა სავარჯიშოდ. უცხოელთაგან ყველაზე ძლიერი დელეგაციით უნგრელები გვესტუმრნენ, რომლებსაც ევროპისა და მსოფლიოს ტრიუმფატორები, ოლიმპიური პრიზიორიც ჰყავთ გუნდში.

გუნდები

ბერძნულ-რომაული ჭიდაობა

60 კგ
1. ბექა ბალანჩივაძე
2. ნოდარ ოქრომჭედლიშვილი
3. რამაზ სურმანიძე
4. ირაკლი შავაძე

63 კგ
1. ლევან ქავჟარაძე
2. ლაშა მარიამიძე
3. გიორგი შოთაძე
4. ფირუზ წულუკიძე
5. თორნიკე ჭელიძე
6. ამირან შავაძე

67 კგ
1. გიორგი კურტანიძე
2. თორნიკე ჯანგავაძე
3. ედნარ შავაძე
4. გიორგი დავითაია
5. ლაშა ებილაშვილი
6. ქერიმ მაჩალიკაშვილი

72 კგ
1. გოგა გოგიბერაშვილი
2. რამაზ ზოიძე
3. გიორგი ხუჭუა
4. საჩინო დავითაია
5. მურად მიქელაძე
6. გოგა აფრიამაშვილი
7. ნიკოლოზ საბანაშვილი

77 კგ
1. მინდია წულუკიძე
2. ბაკურ გოგოლი
3. ბექა მამუკაშვილი
3. ლაშა გობაძე
4. ლაშა ლოლაშვილი
5. დემურ ქავთარაძე

82 კგ
1. გელა ბოლქვაძე

87 კგ
1. ვარლამ კვარაცხელია
2. შალვა ხაჩიძე
3. ვახტანგ ხალვაში

97 კგ
1. კუკური კირცხალია
2. რევაზ ნადარეიშვილი
3. ირაკლი ქაჯაია
4. გიორგი მელია
5. ალექსი ლოდია
6. ვალერიან მურვანიძე
7. მათე სოფაძე
8. საბა ბუხრიკიძე

130 კგ
1. ბექა კანდელაკი
2. ზვიად პატარიძე
3. ლევან არაბული
4. ვასილ იმერლიშვილი

თავისუფალი ჭიდაობა

57 კგ
1. ოთარ გოგავა
2. რობერტ დინგაშვილი
3. გიორგი ღონიაშვილი და ლაშა ტალახაძე (შესარჩევი)

61 კგ
1. ბექა ლომთაძე
2. ლაშა ლომთაძე
3. გიორგი რევაზიშვილი და ლევან მურცხვალაძე (შესარჩევი)

65 კგ
1. მაგომედ საიდოვი
2. ედემი ბოლქვაძე
3. შოთა ფარტენაძე და ცოტნე აბალაკი (შესარჩევი)

70 კგ
1. ზურაბ იაკობიშვილი
2. ლევან ქელეხსაშვილი და კოტე ხაბალაშვილი (შესარჩევი)
3. გიორგი სულავა და რამაზან მალაკოევი (შესარჩევი)

74 კგ
1. ავთანდილ კენჭაძე
2. გიორგი სანოძე
3. ალექსანდრე ჯაჭვაძე

79 კგ
1. იაკობ მაქარაშვილი
2. ჯაბა ყველაშვილი და ტარიელ გაფრინაშვილი (შესარჩევი)
3. ნიკა კენჭაძე და ტარზან მაისურაძე (შესარჩევი)

86 კგ
1. სანდრო ამინაშვილი
2. დავით ხუციშვილი და ზაურ ბერაძე (შესარჩევი)
3. ქვათაძე გიორგი/დათო ფირუზაშვილი და საბა ჩიხრაძე (შესარჩევი)

92 კგ
1. ირაკლი მწითური
2. დავით მარსაგიშვილი
3. მუხრან ნარსავიძე და იუზა ცერცვაძე (შესარჩევი)

97 კგ
1. ელიზბარ ოდიკაძე
2. ზვიად მეტრეველი და ზურაბ ახობაძე (შესარჩევი)
3. გივი მაჭარაშვილი და მამუკა კორძაია (შესარჩევი)

125 კგ
1. გენო პეტრიაშვილი
2. ომარ გუსოშვილი
3. ლაშა ჯელაძე და როლანდ ანდრიაძე (შესარჩევი)

3 ივლისი

8:00-8:30 აწონა (+2 კგ)
10:00-14:00 - საკვალიფიკაციო ეტაპის შეხვედრები

თავისუფალი ჭიდაობა 61, 70, 79, 92 და 125 კგ, ბერძნულ-რომაული - 55, 63, 72, 82 და 97 კგ.
16:00 - გახსნის ცერემონია
16:30 - ნახევარფინალური შეხვედრები

ირაკლი თავაძე

ყოველდღიური სპორტული გაზეთი "ლელო"
429
მკითხველის კომენტარები / 0 /
მსგავსი ამბები
რუბრიკის სხვა სიახლეები