დღეს ლუქსემბურგი - საქართველო: ნუ ვიხუმრებთ მეტოქესთან!

საქართველო

მეკარეები - გიორგი მაკარიძე (რიუ ავე, პორტუგალია), როინ კვასხვაძე (ტორპედო), ზაურ მახარაძე (ზორია, უკრაინა)

მცველები - გურამ კაშია (ვიტესი, ჰოლანდია), ლევან გეგეჭკორი (რუსთავი), დავით ხოჭოლავა (შახტარი, უკრაინა), ლაშა დვალი (პოგონი, პოლონეთი), გიორგი ნავალოვსკი (სკა ენერგია, რუსეთი), ლაშა შერგელაშვილი (რიგას ფს, ლატვია), ლევან ხარაბაძე (დინამო თბ), ოთარ კაკაბაძე (ჟიმნასტიკი, ესპანეთი)

ნახევარმცველები - ჯაბა კანკავა (ტობოლი, ყაზახეთი), გიორგი აბურჯანია (სევილია ატლეტიკო, ესპანეთი), ოთარ კიტეიშვილი (დინამო თბ), ვაკო გვილია (ლუცერნი, შვეიცარია), ბექა ვაჩიბერაძე (რიგას ფს, ლატვია), საბა ლობჟანიძე (რანდერსი, დანია), გიორგი ბერიძე (ტრენჩინი, სლოვაკეთი), ვახტანგ ჭანტურიშვილი (ტრნავა, სლოვაკეთი), გიორგი ხარაიშვილი (გიოტებორგი, შვედეთი), ჯაბა ჯიღაური (ორდაბასი, ყაზახეთი)

თავდამსხმელები - ნიკა კაჭარავა (კორონა, პოლონეთი), ბუდუ ზივზივაძე (დინამო თბ)

საქართველოს ეროვნული გუნდი დღეს მორიგ ამხანაგურ მატჩს გამართავს. მალტასთან მოგების შემდეგ ლუქსემბურგში ადგილობრივ ნაკრებთან მოვსინჯავთ ძალებს. ტრადიციულად, მატჩის დღეს ორივე ნაკრების ბანაკში არსებულ სადღეისო ვითარებას განვიხილავთ...

მეტი ოპტიმიზმის საფუძველი

თამამად შეიძლება ითქვას, რომ დღეს საქართველოს ნაკრების გულშემატკივრებს ოპტიმიზმის საფუძველი აქვთ. ჩვენს ყოველ წერილში დაწვრილებით აღვნიშნავთ და ახლა მხოლოდ ზოგადად ვიტყვით, რომ დანაკლისი მართლაც დიდზე დიდია და ჩვენი გუნდის შემადგენლობას ოპტიმალურს ვერაფრით ვუწოდებთ, მაგრამ მატება მაინც არის და ეს უკვე საქმეა.

საქართველოს ნაკრები ლუქსემბურგშია და მასპინძლებთან სათამაშოდ ადგილზე ემზადება. გუნდს შეუერთდნენ კაპიტანი ჯაბა კანკავა და ერთ-ერთი ლიდერი, ესპანური "ჟიმნასტიკის" მცველი ოთარ კაკაბაძე. ეს სოლიდური შევსება უნდა იყოს ვლადიმირ ვაისის გუნდისთვის, რომელსაც მალტასთან თამაშში ერთი ფეხბურთელიც ძალიან აკლდა და მეორეც.

როგორ გინდა, საქებარი სიტყვები არ დაწერო კაკაბაძეზე - უაღრესად გადატვირთული საკლუბო გრაფიკის მიუხედავად, მან მაინც შეძლო და ეროვნულ გუნდს ეხმარება, რაც უდავოდ მისასალმებელია. სასიხარულოა ისიც, რომ ახალი თაობის ფეხბურთელებმა წარსულს ჩააბარეს ის დრო, როცა ესა თუ ის მოთამაშე, ათასგვარი მიზეზის გამო, პირდაპირ თუ ირიბად, თავს არიდებდა ნაკრებში ჩამოსვლას. აქვე ვთქვათ, რომ ოთარი შესანიშნავ ფორმაშია და ესპანური სეგუნდას ბოლო ტურის სიმბოლურ ნაკრებშიც მოხვდა...

ზოგადად, აქედანვე შეიძლება იმის თქმა და ვარაუდი, რომ საქართველოს ნაკრების შემადგენლობა ლუქსემბურგთან შეხვედრაში უფრო მიახლოვებული იქნება ოპტიმალურთან, ვიდრე მალტასთან იყო. უნდა ვივარაუდოთ ისიც, რომ ეს ჩვენი გუნდის თამაშის ხარისხზეც დადებითად აისახება.

სამწუხაროდ, ნაკრებს ტრავმების გამო გიორგი ჩაკვეტაძე და ნიკა კვეკვესკირი ვერ დაეხმარებიან. ქრონიკული დანაკლისის ფონზე ეს არ არის სასიამოვნო მომენტი, მაგრამ რას ვიზამთ, უნდა შევეგუოთ - საქართველოს ნაკრებისთვის ეს უკვე ჩვეულებრივი ამბავია...

იქნებ, ახლა მაინც ვნახოთ...

ძალიან საინტერესოა, მისცემს თუ არა ვაისი თავის გამოჩენის შანსს იმ ფეხბურთელებს, რომლებიც ვერ ვნახეთ მალტასთან შეხვედრაში. რა თქმა უნდა, კუნძულელებთან მატჩში შესანიშნავად ითამაშა როინ კვასხვაძემ და ამ ლოგიკით მწვრთნელმა მეკარე ნამდვილად არ უნდა შეცვალოს, მაგრამ რა ვუყოთ იმას, რომ საქმეშია სანახავი ზაურ მახარაძეც? ფეხბურთელი, რომელსაც უკრაინის ყველა ასაკობრივ ნაკრებში უთამაშია და რომელმაც ახლახან მიიღო საქართველოს მოქალაქეობა.

გვაინტერესებს ასევე ბექა ვაჩიბერაძის თამაში. უკრაინული საფეხბურთო სკოლის კიდევ ერთი აღზრდილი ამჟამად ლატვიაში ირჯება, თუმცა არცთუ დიდი ხნის წინ უკრაინის ახალგაზრდული ნაკრების ერთ-ერთი ლიდერი გახლდათ...

ნუ დავივიწყებთ...

ნუ დავივიწყებთ ერთ მეტად მნიშვნელოვან მომენტს. ერთა ლიგის გათამაშების დაწყებამდე საქართველოს ნაკრები მეტს აღარ ითამაშებს. ამდენად, თამამად შეგვიძლია, ლუქსემბურგთან შეხვედრა გენერალურ რეპეტიციად მოვნათლოთ. ცხადია, ამ მატჩს სამწვრთნელო შტაბისა და ფეხბურთელების მიმართ შესაბამისი მიდგომა სჭირდება.

შეძლებისდაგვარად უნდა დაიხვეწოს ყველა ის ტაქტიკური მონახაზი, რომლის გამოყენებასაც ერთა ლიგაში ვაპირებთ. გარდა ამისა, მაქსიმალურად ვნახოთ საქმეში ყველა ის ფეხბურთელი, რომელიც ამ დროისთვის ნაკრების სამწვრთნელო შტაბის განკარგულებაშია.

ხუმრობა არ გამოვა

ცოტა ხნის წინ ლუქსემბურგის ნაკრებს ყველა იოლად უგებდა. ახლა ასე აღარ არის. ამასწინათ, ლუკ ჰოლცის გუნდმა ამხანაგური შეხვედრა ჩაატარა სენეგალთან და მსოფლიოს ჩემპიონატის მონაწილეს უგოლოდ დაუზავდა - 0:0. ეს კი არა, ჩვენმა მომავალმა მეტოქემ კარგად დაკომპლექტებულ მოწინააღმდეგეს ტოლი არაფერში დაუდო.

ლუქსემბურგის ნაკრების მწვრთნელი ლუკ ჰოლცი 48 წლისაა. სწორედ ამ სპეციალისტის სახელს უკავშირდება გუნდის ბოლოდროინდელი პროგრესი, რასაც ყველა აღნიშნავს.

ფეხბურთელობისას ჰოლცი ლუქსემბურგულ კლუბებში თამაშობდა. ეროვნულ ნაკრებში მან 55 შეხვედრა ჩაატარა და 1 გოლი შეაგდო. სამწვრთნელო კარიერა კი "ეტცელაში" დაიწყო. ამის შემდეგ ქვეყნის ახალგაზრდული ნაკრები ჩაიბარა, 2010 წლიდან კი ლუქსემბურგის უპირველესი გუნდის დამრიგებელია.

2017 წელს, მსოფლიოს ჩემპიონატის შესარჩევ ციკლში, ლუქსემბურგის ნაკრებმა რამდენიმე დასამახსოვრებელი შეხვედრა ჩაატარა. ჰოლცის ბიჭებმა საშინაო ასპარეზზე დასცეს (1:0) ბელარუსი და ფრედ (1:1) ითამაშეს ბულგარეთის ნაკრებთან, ხოლო ამხანაგური მატჩი მოუგეს (2:1) ალბანეთს.

2017 წლის 3 სექტემბერს კი ყველას თავი სიზმარში გვეგონა, როცა მსოფლიოს ჩემპიონატის შესარჩევი ციკლის საგარეო შეხვედრაში ლუქსემბურგმა საფრანგეთის ნაკრებთან 0:0 ითამაშა. თანამედროვე ფეხბურთში ვის რა უნდა გაუკვირდეს, მაგრამ ეს შედეგი ლამის "საუკუნის სენსაციად" მოინათლა.

2018 წელს ლუქსემბურგმა ორი ამხანაგური შეხვედრა ჩაატარა. გასვლაზე კევინ მალგეტის ერთადერთი გოლით მოუგო ჩვენთვის კარგად ნაცნობ მალტას, მერე კი ავსტრიასთან საშინაო შეხვედრაში 4 უპასუხო გოლი გაუშვა.

გამორჩეულები მეტოქის რიგებში

ლუქსემბურგის ნაკრების შემადგენლობაში არის რამდენიმე აშკარად ანგარიშგასაწევი ფეხბურთელი, რომელთა სათვალავში არმიღება არაფრისდიდებით არ შეიძლება.

მაგალითად, ასეთია ვარშავის "ლეგიას" ფეხბურთელი კრის ფილიპსი. მან "მეცის" შემადგენლობაში საფრანგეთის მთავარ ლიგაშიც მოასწრო თამაში. პოლონურ კლუბში კი ახლახან გადავიდა და სათადარიგოთა სკამს ნამდვილად არ არის მიჯაჭვული.

62 შეხვედრა ჩაატარა ნაკრებში და 4 გოლი შეაგდო შვედური "ნორჩოპინგის" შუახაზელმა ლარს გერსონმა. ის ძირითადად შვედურ და ნორვეგიულ კლუბებში ასპარეზობს. გერსონს მოედნის ცენტრალურ ზონაში დიდი მოცულობის სამუშაოს შესრულება შეუძლია.

ბელგიური "ბევერენის" ძირითადი შემადგენლობის ფეხბურთელია ლორენ იანსი. საინტერესო ფეხბურთელია პორტუგალიელი ჟერსონ როდრიგესიც (საერთოდ, ლუქსემბურგის ნაკრების შემადგენლობაში არაერთი ნატურალიზებული ფეხბურთელია). ის პორტუგალიის დაბალ დივიზიონებში ასპარეზობის შემდეგ ლუქსემბურგში გადავიდა საცხოვრებლად, ცოტა ხნის წინ კი ტირასპოლის (მოლდოვა) "შერიფში" ჩაირიცხა.

ყოველდღიური სპორტული გაზეთი "ლელო"
861
მკითხველის კომენტარები / 0 /
მსგავსი ამბები
რუბრიკის სხვა სიახლეები
;