ებრაელებს 4:3-ს ვუგებთ... გავზარდოთ სხვაობა!

"დიდი ხანია კალათბურთში ვარ და არ შემრცხვება, თუ ვიტყვი, რომ ეს იყო ერთ-ერთი ყველაზე დიდი შეხვედრა მათ შორის, რაც მინახავს.

ორივე გუნდმა მაღალი კლასი უჩვენა, სანახაობრივი მხარეც ძალიან მაღალი იყო და დარწმუნებული ვარ, ზოგადად თამაშის ხილვით გულშემატკივარმაც ისიამოვნა, რასაც ვერ ვიტყვით შედეგზე. შედეგი გამაწბილებელია", - ასეთი იყო ისრაელის ნაკრების მთავარი მწვრთნელის, ერეზ ედელშტაინის კომენტარი ისრაელი-საქართველოს მატჩის შემდეგ.

ეს იყო შარშან, ევრობასკეტი 2017-ის ჯგუფურ ეტაპზე. გუნდი, რომელიც წააგებდა, მომდევნო ეტაპზე ვეღარ გავიდოდა. სწორედ ამიტომ, შეხვედრა თავიდან ბოლომდე დაძაბული, სანახაობრივი გამოდგა და ფინალიც ისრაელი-საქართველოს 2017 წლის მატჩი ჩვენი ნაკრების საუკეთესო შეხვედრათა ტოპ-10-ში შევიყვანოთ.

სხვათა შორის, ისრაელის ნაკრები თავის მსაჯებიანად დავამარცხეთ:

ძირითად დროში უკანასკნელი შეტევისას ზაზა ფაჩულიას ორი მასპინძელი აუხტა, ჯერ ხელში ჩაარტყა, შემდეგ ზედ დაახტა, მაგრამ მსაჯებმა სასტვენი "გადაყლაპეს". ალბათ, ეიმედებოდათ, რომ ოვერტაიმში ისრაელი გაგვტეხდა. კოვზი ნაცარში ჩაუვარდათ - მაიკლ დიქსონმა ძირითადი დროის ბოლოს, 12 წამით ადრე უმნიშვნელოვანესი სამიანით 2 ქულით დაგვაწინაურა - 89:87. დარჩენილ დროში ომრი კასპიმ ორქულიანით გაათანაბრა და... სწორედ ამის შემდეგ იყო ზაზა ფაჩულიას შეტევა, მეტოქის მთელი გუნდი ზედ რომ დაეცა…

ოვერტაიმში მეტოქემ 2 ქულაზე მეტი ვერ ჩააგდო... საოცარი ემოცია იყო ისრაელის დროშის ფერებში შეღებილ დარბაზში გამარჯვება. ქართველებიც ბევრნი ვიყავით და უნდა გენახათ, როგორ გაიხარეს ჩვენმა თანამემამულეებმა.

მანამდე ისრაელის ნაკრებთან მხოლოდ ორი ოფიციალური შეხვედრა გვქონდა გამართული. ორივე 90-იან წლებში - ევრო-1997-ის შესარჩევ ეტაპზე. წაგებას თავი ვერცერთ შემთხვევაში დავაღწიეთ.

ამხანაგურად ისრაელთან ოთხჯერ ვითამაშეთ. საინტერესო იყო 2013 წელი, როცა იტალიის საერთაშორისო ტურნირზე ისრაელის ნაკრებთან 79:77 ვიმარჯვეთ. აღსანიშნავია, რომ ბოლო წუთზე ჩვენმა ნაკრებმა ხუთქულიანი ჩამორჩენა აღმოფხვრა.

იმავე წელს ჩვენი გუნდი ამხანაგური ტურნირისთვის ელიათში ჩავიდა, სადაც პირველობა არავის დაუთმო, მასპინძლებს 74:73 სძლია და ელიათის თასი საქართველოში ჩამოიტანა.

უფრო ადრე, 2011 წელს ჰოლანდიურ ალმერეში წაგების გამო რევანში თბილისში ავიღეთ. მაშინაც ევროპის ჩემპიონატისთვის ვემზადებოდით.
ასე და ამგვარად, ისრაელთან საერთო ანგარიშით 4:3-ს ვიგებთ. იმედი დავიტოვოთ, რომ 13 აგვისტოს მატჩის შემდეგ ორი მოგებით დავწინაურდებით.

ყოველდღიური სპორტული გაზეთი "ლელო"
699
მკითხველის კომენტარები / 0 /
მსგავსი ამბები
რუბრიკის სხვა სიახლეები
;