ევერტონი - 150 მილიონი ევრო უნიტაზში

ზაფხული კოშმარული გამოდგა "ევერტონისთვის". კლუბმა, არც მეტი, არც ნაკლები, 150 მილიონი ევრო გაისროლა ჰაერში. ისეთი შთაბეჭდილება იქმნებოდა, რომ მერსისაიდელები არც კი ცდილობდნენ ტრანსფერებზე ფასის დაწევას. ასეთი რამ მხოლოდ ჰოლივუდში შეიძლება მოხდეს, როცა ფილმის წარმატებაში ყველა დარწმუნებულია და თანხას არავინ ითვლის. მაგრამ ეს ფეხბურთია და ყველა პროექტს ძალიან დიდი დაკვირვება სჭირდება.

საშინელი სტარტი პრემიერლიგაში, არადამაჯერებელი თამაში ევროპალიგაზე - ყველაფერი ეს რონალდ კუმანის თავად დაჯდა, მაგრამ უშველის კი ეს მსხვერპლშეწირვა გუნდს, რომელსაც ოთხეულისათვის უნდა ებრძოლა? ოთხეულს ვინ ჩივის, ახლა მიზანი მხოლოდ პრემიერლიგაში ადგილის შენარჩუნებაა და ამასაც კითხვის დიდი ნიშანი უზის.

ფაქტია, რომ ძალიან ბევრი რამ ვერ გაკეთდა ისე, როგორც უნდა გაკეთებულიყო. "უსუსური" - ეს ალბათ ყველაზე რბილი განსაზღვრებაა, რომელიც შეიძლება ენაზე მოგადგეს, როცა "ევერტონის" თამაშს უყურებ. მდგომარეობა ისეთი რთულია, რომ ერთი შეხედვით გვირაბის ბოლოსაც არ ჩანს შუქი...


როცა ლუკაკუს ვერავინ ცვლის...

"ლივერპულისა" და "ტოტენჰემის" შეცდომები ჯერ ისევ ძალიან ახალია და "ევერტონს" აუცილებლად უნდა ესწავლა მათზე. თავის დროზე, ორივე ამ კლუბმა მიმართა ხერხს, რომელიც აშკარად ჩაფლავდა: მათ გაყიდეს ერთი გამორჩეული ფეხბურთელი, ნამდვილი ვარსკვლავი და იყიდეს კარგ მოთამაშეთა ჯგუფი. საბოლოო ჯამში ამან შედეგად ის მოიტანა, რომ ორივე კლუბის ხელმძღვანელობა მიხვდა არჩეული გზის მცდარობას და განვითარების ვექტორი შეცვალა. ზუსტად ეს მოუვიდა "ევერტონს".

თავის დროზე "ტოტენჰემმა" გაყიდა გარეთ ბეილი და მის ნაცვლად მიიყვანა ფეხბურთელთა ჯგუფი (ლამელა, ჩადლი, ჰოლტბი, სიგურდსონი). მაურისიო პოჩეტინოს კარგა ხანი დასჭირდა იმისთვის, რომ გუნდი გარდაექმნა.

ახლა ვნახოთ "ლივერპულის" მაგალითი. ლუის სუარესის ნაცვლად მოვიდნენ მარიო ბალოტელი და რიკი ლამბერტი. ვერც ერთმა ამ ფეხბურთელმა ოდნავაც ვერ გაამართლა ის იმედები, რომელსაც მათ უკავშირებდნენ.

სტივ უოლშმა ააშენა "ლესტერი", რომელმაც შექმნა დაუვიწყარი ზღაპარი, მაგრამ მას საქმე კარგად არ მისდის "ევერტონში". ადრე უოლშს არც კი დაესიზმრებოდა ის თანხები, რომლებთანაც ახლა უწევს შეხება. ყველამ როდი იცის ფულთან მუშაობა.

რომელუ ლუკაკუს გაყიდვა კიდევ სხვა თემაა. თანამედროვე "ევერტონში" არ არის ფეხბურთელი, რომელიც დაახლოებით მაინც შეასრულებდა იმ ფუნქციებს, რომელსაც ბელგიელი ასრულებდა გუნდში ყოფნის დროს. ყველა მწვრთნელს და ყველა სელექციონერს თავისი გემოვნება აქვს, მაგრამ რომელ ლოგიკაში ჯდება, გაყიდო ლუკაკუ და იყიდო... სანდრო რამირესი?

ან გუნდში მიიყვანო უეინ რუნი (მერე რა, რომ "ევერტონიდან" გაიცნო საფეხბურთო სამყარომ?!), რომელსაც ბოლო დროს მაგრად აერია პირადი ცხოვრება და ფეხბურთის თამაშზე მეტად სხვა რამეებზე ფიქრობს? შედეგიც სახეზეა...

კუმანის ტაქტიკა ყველასთვის ცნობილია. მას სჭირდება კარგი პლეიმეიკერი და ტიპური ცენტრფორვარდი, რომელიც გოლის ალღოთია დაჯილდოებული და კარგად თამაშობს მაღალ ბურთებზე. გამთამაშებლის პოზიციაზე "კანფეტებს", ასე თუ ისე, ჰყავთ ფეხბურთელები. ამ პოზიციაზე თამაშობენ რუნი, სიგურდსონი, ვლაშიჩი და ბარკლი, რომელიც ჯერ კიდევ არსად წასულა. სამაგიეროდ, კაცმა არ იცის, ასეთი თანხების პატრონმა "ევერტონმა" რატომ არ იყიდა კვალიფიციური ცენტრფორვარდი?

იყო ლაპარაკი ოლივიე ჟირუსა და დიეგო კოშტაზე, მაგრამ აქედან არაფერი გამოვიდა. არადა, რომელიმე მათგანი ოდნავ მაინც შეამსუბუქებდა ევერტონელთა უმძიმეს დღევანდელობას.

გარდაქმნის უნაყოფო ცდა

უოლში, ვინც თავიდანვე განუსაზღვრელი უფლებები მიიღო კლუბში, კიდევ ერთ რამეშია დამნაშავე. კუმანი ჭკვიანი მწვრთნელია, მას შეუძლია ტაქტიკის ვარირება, მაგრამ ჰოლანდიელი უოლშის პრინციპებმა დააბნია. კუმანს მინდორზე ადგილი უნდა მოენახა ყველა შემქმნელი ფეხბურთელისთვის ისე, რომ მათ ერთმანეთისთვის ხელი არ შეეშალათ. ეს მან ვერ მოახერხა.

ამის მკაფიო მაგალითია ისლანდიის ნაკრების ლიდერი, ზაფხულში "ევერტონის" ერთ-ერთი მთავარი შენაძენი - გილფი სიგურდსონი. გუნდის თამაშზე დაკვირვება ნათლად გვიჩვენებს, რომ რუნი უბრალოდ არ აძლევს გილფის თამაშის საშუალებას. რა თქმა უნდა, რუნის ავტორიტეტი ძალიან დიდია მშობლიურ გუნდში. სხვა საკითხია, როგორ ფორმაშია ის და რამდენად სასარგებლოა გუნდისთვის. და თუ მაინც რუნის უნდა ეთამაშა ამ პოზიციაზე, რომელსაც დაავიწყდა, როდის იყო ბოლოს ცენტრფორვარდი, მაშინ რაღა საჭირო იყო სიგურდსონი?

სხვა თემაა იმავე ამპლუის მოთამაშე როს ბარკლი. ერთ დროს ინგლისური ფეხბურთის მთავარმა ვარსკვლავბიჭუნამ ზამთარში აუცილებლად უნდა გაასწროს "გუდისონ პარკიდან", თორემ მას "ევერტონში" კარგი არაფერი ელის.

და მაინც, ვისში დახარჯა უოლშმა ამდენი ფული?

* პრემიერლიგის ერთ-ერთი აუტსაიდერის საუკეთესო ფეხბურთელში. ჯარიმების კარგ ოსტატში, მაგრამ ფეხბურთელში, რომელმაც ვერ გაამართლა გრანდში...

* ახალგაზრდა, იმედისმომცემ მეკარეში, რომელმაც მხოლოდ ერთი სეზონი ჩაატარა მაღალ დონეზე...

* ახალგაზრდა მცველში, რომელმაც ასევე მხოლოდ ერთი სეზონი ჩაატარა მაღალ დონეზე...

* ფლანგელ მცველში, რომელიც გამოსადეგია მხოლოდ და მხოლოდ როტაციისთვის...

* გამოცდილ ნახევარმცველში, რომელიც შორსაა პრემიერლიგური სტანდარტებიდან...

* ახალგაზრდა ფორვარდში, ვისი თამაშის სტილიც არ უხდება პრემიერლიგას, თუმცა ის ცუდი ფორვარდი ნამდვილად არ არის...

...ნუთუ, ამხელა თანხად უკეთესი ტრანსფერების განხორციელება არ შეიძლებოდა?! დღეს-ხვალ "ევერტონს" ახალი მწვრთნელი ეყოლება. მას გუნდში ურთულესი მემკვიდრეობა ხვდება. ვნახოთ, რამდენად გაართმევს "ის" თავს დაკისრებულ ამოცანას. ფაქტია, ეს იოლი არ იქნება...

P.S. ინგლისურ მედიაში გაჩნდა ინფორმაცია, თითქოს "ევერტონის" ხელმძღვანელობამ რონალდ კუმანის შემცვლელთან დაკავშირებით არჩევანი უკვე გააკეთა. ეს არის "ბარნლის" თავკაცი, 46 წლის შონ დიჩი, რომელიც, შეიძლება, დღესვე დაამტკიცონ მთავარ მწვრთნელად. ის უკვე 5 წელია, "ბარნლის" თავკაცობს. ამჟამად, ეს მოკრძალებული კლუბი პრემიერლიგაში მეშვიდე ადგილზეა. ელიან, რომ ყველაფერი მას შემდეგ გადაწყდება, რაც "ევერტონის" ხელმძღვანელები მწვრთნელს პირადად შეხვდებიან.

ყოველდღიური სპორტული გაზეთი "ლელო"
1469
მკითხველის კომენტარები / 0 /
მსგავსი ამბები
რუბრიკის სხვა სიახლეები
;