სალომე ზურაბიშვილი: მიუნხენში დავპირდი, რომ პირადად მივხედავ ევრობასკეტისთვის ახალი დარბაზის დროულად აშენების საქმეს

30 ივლისს ლისის ტბაზე საქართველოს მთავრობა და საკალათბურთო სამყარო შეიკრიბა. სპეციალურად მოწყობილ სცენაზე დიდი ლოგო კიაფობდა - ევრობასკეტი 2021.

15 ივლისს გადაწყდა, რომ ევროპის 2021 წლის ჩემპიონატის ერთი ჯგუფის მატჩები საქართველოში გაიმართება.
ლისის ტბაზე გამართული ღონისძიება გიორგი ჭანიშვილს მიჰყავდა, რომელმაც ერთმანეთის მიყოლებით სცენაზე უხმო საქართველოს პრეზიდენტს, პრემიერს, თბილისის მერს...

- როდესაც ევროპის ჩემპიონატის მასპინძლობის უფლება მოგვანიჭეს მიუნხენში ვიყავი. ეს იყო დიდი ბედნიერება. სპორტის ისეთ სახეობაში, როგორიც კალათბურთია, ევროპის ჩემპიონატის მასპინძლობა ნიშნავს იმას, რომ საქართველო ევროპის ნაწილია. გერმანიაში დიდი პასუხისმგებლობა ვიგრძენი - დავპირდი, რომ ჩვენს დედაქალაქში აშენდება დიდი არენა ევრობასკეტისთვის. ამ საქმეს ბოლომდე მივყვები და მჯერა, რომ საქართველო ევროპის ჩემპიონატს ყოველმხრივ მომზადებული შეხვდება, - თქვა საქართველოს პრეზიდენტმა სალომე ზურაბიშვილმა.

ქვეყნის პრემიერმა მამუკა ბახტაძემ განაგრძო:

- 2021 წელს ვუმასპინძლებთ ევროპის ჩემპიონატს კალათბურთში. ეს არ არის მხოლოდ ქართული კალათბურთის წარმატება, ეს ქვეყნის მიღწევაა. მინდა საქართველოს ყველა მოქალაქეს მივულოცო, რადგან ეს ყველა ჩვენგანის გამარჯვებაა. ეს შედეგი არ მოსულა ერთ დღეში, მნიშვნელოვანი ნაბიჯები გადავდგით, რომ საქართველოს მიეღო ეს უფლება. ევრობასკეტის მასპინძლობის ფარგლებში ავაშენებთ 15-ათასიან დარბაზს და დარწმუნებული ვარ, ეს არენა გახდება ახალი სავიზიტო ბარათი ჩვენი დედაქალაქისთვის.

სცენაზე მესამე თბილისის მერი, კახა კალაძე ავიდა:

- სპორტსმენი ვიყავი და ვიცი, რა მნიშვნელობა აქვს თითოეულ გამარჯვებას. კიდევ უფრო მნიშვნელოვანია ინფრასტრუქტურის განვითარება, რადგან, ამის გარეშე წარმატების მიღწევა წარმოუდგენალია. ვმასპინძლობთ ევრობასკეტს - ეს კარგია, მაგრამ კიდევ უკეთესია, რომ თბილისში აშენდება 15-ათას კაცზე გათვლილი არენა, რომელიც ჩვენს ქვეყანას ათწლეულების განმავლობაში მოემსახურება.

კალათბურთის ფედერაციის გენმდივანი, გიორგი ქართველიშვილი იყო ერთ-ერთი პირველი ინიციატორი, რომელმაც ევრობასკეტი თბილისში ჩამოგვიტანა. მან მოკლედ და გარკვევით თქვა:

- კალათბურთის ფედერაციამ რამდენიმე წლის წინ გადაწყვიტა, რომ ებრძოლა ევრობასკეტის თბილისში ჩასატარებლად. რამდენიც უნდა გვებრძოლა, სახელმწიფოს დახმარება რომ არა, მიზანს ვერ მივაღწევდით. კულმინაცია იყო საქართველოს პრეზიდენტის, სალომე ზურაბიშვილის ჩამოსვლა მიუნხენში, რის შემდეგაც ჩვენს მასპინძლობას საბოლოოდ დაესვა წერტილი.

ლისის ტბაზე შეხვედრის კულმინაცია საქართველოს ნაკრების მოთამაშეთა გამოსვლა იყო. სცენაზე ჯერ ნაკრების ყოფილი წევრი ვლადიმერ ბოისა ავიდა, მას კაპიტანი თორნიკე შენგელია მიჰყვა:

- მინდა საქართველოს ნაკრების წვერები სცენაზე ვიხმო, რადგან, რასაც ვიტყვი, მათი სახელით ვიტყვი - თქვა თორნიკემ და განაგრძო:

- საქართველოს ნაკრებთან ერთად პირველად ევრობასკეტზე 2011 წელს ვითამაშე. ვერ წარმოიდგენთ რას ნიშნავს საკუთარი გულშემატკივრის მხარდაჭერა. ყოფილა შემთხვევები, ათიოდე ქომაგის შეძახილსაც ისე დავუმუხტივართ, თამაში შემოგვიტრიალებია. წარმოიდგინეთ, რა ემოცია იქნება 15-ათასიან დარბაზში თამაში. დარბაზში, სადაც უმეტესობა ქართველი ქომაგი იქნება. მადლობა ამისთვის ფედერაციას, მთავრობას და კალათბურთელები ვეცდებით ნდობა და მონდომება ბოლომდე გავამართლოთ.

გიორგი ჟამერაშვილის ფოტოები

ყოველდღიური სპორტული გაზეთი "ლელო"
1705
მკითხველის კომენტარები / 0 /
მსგავსი ამბები
რუბრიკის სხვა სიახლეები
;