ევრობასკეტი 2021. საქართველო-შვეიცარია. დიდი ბრძოლა და 96:88 ოვერტაიმში!

საქართველოს ნაკრებმა ევრობასკეტის შესარცევ ეტაპზე პირველი მატჩი გამართა. თბილისს შვეიცარიის ნაკრები ესტუმრა და დაძაბულ ბრძოლაში ქართველებმა 96:88 გაიმარჯვეს.

პირველ მეოთხედში შვეიცარია, ვერც ფარქვეშ გვჯობნიდა, ვერც პერიმატერიდან აგდებდა და საშუალო ტყორცნა ხომ ყველა ააცილა საქართველოს ნაკრების კალათს. შედეგი საწყის 10 წუთში ვიხილეთ: ცინცაძის, ბურჯანაძის, შერმადინის, სანაძისა და ბოქოლიშვილის ხუთეულმა, რომელიც სტუმრებზე გაცილებით მაღალი კლასისაა, მეტოქეს შეტევაში შანსი არ მისცა, თავად კი ქულას ქულაზე აგროვებდა და პირველი მეოთხედი 17:8 მოვიგეთ.

ისიც სათქმელია, რომ შვეიცარიელებზე სპორტის სასახლის სავსე ტრიბუნები უთუოდ დამთრგუნველად მოქმედებდა. ამ გუნდის კალათბურთელებს ხომ, 6 ათასი კაცის წინაშე შესაძლოა, აქამდე არც უთამაშიათ. ამას დაემატა ისიც, რომ მეორე პერიოდში შეცვლაზე შემოსულმა თად მაკფადენმა და მიხეილ ბერიშვილმა სტუმრები პერიმეტრიდან დაბომბეს, პირველმა 3 სამიანი გამოიყენა, მიშამ - 2 და მეორე ათწუთეულის შუაში 29:8 დავწინაურდით.

მესამე პერიოდში შვეიცარიელები ცოტა დამშვიდდნენ, ცხადია დიდი სხვაობით წინ გაჭრამ ქართველებზეც იმოქმედა და ჩვენმა მეტოქემ ანგარიშის შემცირება მეთოდურად იწყო. მათ მესამე და მეოთხე პერიოდებში პერიმეტრიდან სამიზნეც გაისწორეს და საფინალო სირენამდე 3 წუთით ადრე ანგარიშიც გაათანაბრეს - 70:70.

ამასობაში ფეხი იტკინა ჩვენმა ცენტრმა გიორგი შერმადინმა. თუმცა იგი ბოლოს ისევ დაბრუნდა.

ბოლო პერიოდში დიდი სარგებელი მოგვიტანა თად მაკფადენმა მან არაერთი სამქულიანი გამოიყენა და ბურთსაც მშვენივრად ათამაშებდა. მნიშვნელოვანი იყო ბექა ბურჯანაძის სამქულიანი საფინალო სირენამდე 40 წამით ადრე, თუმცა შვეიცარიელებმა სამიანითვე უპასუხეს და ძირითადი დროის დასრულებამდე წამით ადრე ანგარიში გაათანაბრეს - 79:79.

ოვერტაიმში შვეიცარიელებმა კარგად დაიწყეს, გაგვასწრეს კიდეც, თუმცა ბოლო ორ წუთში ჯერ გიორგი შერმადინმა ჩააგდო ორი საჯარიმო, შემდეგ ბურჯანაძემ და ბერიშვილმა სამქულიანები და სირენამდე 50 წამით ადრე 94:88 დავწინაურდით. ეს უკვე გამარჯვებას ნიშნავდა. საბოლოოდ 96:88 ჩვენს სასარგებლოდ.

21 ქულით მატჩის ბომბარდირი და გმირი ბექა ბურჯანაძე გახდა, 18 ქულა ჰქონდა თად მაკფადენს, 16 ქულა და 13 მოხსნა გიორგი შერმადინს, სანაძეს - 14 ქულა, ბერიშვილს - 11.

2395
მკითხველის კომენტარები / 0 /
მსგავსი ამბები
რუბრიკის სხვა სიახლეები
;