ევრობასკეტი 2021-ის წილისყრა. საქართველო სერბეთსა და ფინეთს შეხვდება

ევროპის 2021 წლის ჩემპიონატის საკვალიფიკაციო (შესარჩევი) ტურნირის წილისყრა, თბილისის დროით 14:15 წუთზე გერმანიის ქალაქ მიუნხენში გაიმართა. გუნდები რვა ჯგუფად გაიყო, თითოში 4-4. საქართველოს ნაკრებთან მოხვდნენ სერბეთი და ფინეთი. 

კონტინენტის 32 ქვეყნის ნაკრები 8 ჯგუფში გადანაწილდა და იბრძოლებს ფინალურ ეტაპზე გამსვლელი 24 ადგილისთვის. საკვალიფიკაციო ტურნირში მონაწილეობას მიიღებენ ევრობასკეტ 2021-ის მასპინძელი ქვეყნებიც - გერმანია, ჩეხეთი, საქართველო და იტალია, თუმცა ამ ოთხეულს საკონკურსო პირობები არ შეეხებათ და ევრობასკეტზე ჯგუფში ნებისმიერი ადგილის დაკავების შემთხვევაში გავლენ.

ფიბა-ევროპამ ეს გადაწყვეტილება იმისთვის მიიღო, რომ ევრობასკეტ 2021-ის მასპინძლებს მომავალი 2 წლის განმავლობაში სათამაშო პრაქტიკა არ მოაკლდეთ და აქტიურად იყვნენ ჩაბმულნი კონტინენტზე გამართულ მატჩებსა და მის თანმხლებ სხვადასხვა აქტივობებში. გათამაშების ფორმატის თანახმად, ევრობასკეტის 24 საგზურს თითოეული (8) ჯგუფის 3 საუკეთესო გუნდი მოიპოვებს. აქ უნდა დავაზუსტოთ, რომ იმ ჯგუფებიდან, სადაც ევრობასკეტის მასპინძელი ქვეყნები (საქართველო, გერმანია, იტალია, ჩეხეთი) იქნებიან, ევრობასკეტზე 2 საუკეთესო გავა, რომლებსაც, ცხადია, (ნებისმიერ ადგილზე გასვლის შემთხვევაში) სწორედ მასპინძელი ქვეყანა დაემატებათ. 

მე-8 კალათაში გუნდების ზუსტი ვინაობა ჯერ გარკვეული არაა, რადგან მიმდინარე წლის 3-21 აგვისტოს უნდა გაიმართოს ევრობასკეტ 2021-ის მესამე წინა-საკვალიფიკაციო ეტაპის მატჩები. აღნიშნულ კალათაში წარმოდგენილი 3-3 გუნდიდან საბოლოოდ თითო საუკეთესო მოიპოვებს საკვალიფიკაციო ეტაპის საგზურს. 

საკვალიფიკაციო მატჩები გაიმართება ფიბა-ევროპის მიერ დადგენილ 3 ფანჯრის პერიოდში: 2020 წლის 17-25 თებერვალს, 23 ნოემბერი – 1 დეკემბერი და 2021 წლის 15-23 თებერვალს. თითო ფანჯრის პერიოდში თითო გუნდი 2-2 მატჩს ჩაატარებს. თამაშები გაიმართება გასვლა – სახლის პრინციპით.

3567
მკითხველის კომენტარები / 0 /
მსგავსი ამბები
რუბრიკის სხვა სიახლეები
;