ევროთასების ექო. ჰოპლა, ჩვენ ვცოცხლობთ!  ქართული კლუბების ხმამაღალი განაცხადი ევროტურნირებზე

გასულ კვირას ოთხი ქართული კლუბი ჩაება ევროთასებზე და ოთხივეს აქვს შემდეგ ეტაპზე გასვლის შანსი. ერთის (“ტორპედო”) შანსი შედარებით მცირეა, სამის - ძალიან დიდი. ეს უკვე ნიშნავს იმას, რომ ჩვენ ვცოცხლობთ! 

ზოგი იტყვის - ვაი, ასეთ სიცოცხლესო და ნაწილობრივ მართალიც იქნება, მაგრამ მთავარი ისაა, რომ ისევ ვსუნთქავთ და არ ასრულებულა იმათი გულისწადილი, ვინც საქართველოში მოედნების გადახვნასა და მათ ადგილას სიმინდისა თუ სხვა რამეების დათესვას ითხოვს...

ჩვენი წერილის მიზანს წარმოადგენს, ერთგვარად შევაჯამოთ ჩვენი კლუბების ნაღვაწი ევროთასებზე. რა თქმა უნდა, საქართველოს ჩემპიონით უნდა დავიწყოთ, მით უმეტეს, ტირასპოლში “საბურთალომ” დაუვიწყარი საფეხბურთო სპექტაკლი დადგა...

ის, რაც დაგვავიწყდა...

მართლაც დაგვავიწყდა, როდის ითამაშა ბოლოს ასე ქართულმა კლუბმა. როდის დაჩაგრა ბოლოს ასე ესოდენ ანგარიშგასაწევი მეტოქე და როდის “გააქრო” მინდვრიდან. “შერიფი” ევროთასებზე უაღრესად გამოცდილი მებრძოლია, მაგრამ, ამის მიუხედავად, მთელი მატჩის განმავლობაში მინდორზე მხოლოდ ერთი გუნდი თამაშობდა. 

გიორგი ჭიაბრიშვილის გაწვრთნილმა გუნდმა შეძლო და გამორიცხა ის შეცდომები, რომელსაც საქართველოს ჩემპიონატის შეხვედრებში უშვებს ხოლმე. შედეგად კი მივიღეთ პრაქტიკულად უშეცდომო ფეხბურთი, რომელსაც დიდი გაოცებით უცქერდა მეტოქე 90 წუთის განმავლობაში...

ნუ დაგვავიწყდება, რომ ეს იყო “საბურთალოს” პირველი თამაში ევროტურნირებზე. და ეს მაშინ, როცა “შერიფს” არაერთხელ უთამაშია თუნდაც ევროპალიგის ჯგუფურ ეტაპზე. ასეთი თამაშით “საბურთალო” უშანსოდ არც ზაგრების “დინამოსთან” იქნება, თუმცა იქამდე მოლდოველებთან საპასუხო მატჩია თბილისში, რომელსაც ამავე დონეზე სჭირდება ჩატარება.

რაც მთავარია, ჭიაბრიშვილის გუნდმა უარი თქვა “ავტობუსზე”, ითამაშა შემტევი, შემოქმედებითი ფეხბურთი, რასაც ჩვენ “ქართულს” ვეძახით.

ახალი დინამოს პირველი განაცხადი

გასაგებია, ანდორული “ენგორდანი” დიდი ვერაფერი საჯილდაო ქვაა, მაგრამ განახლებულმა “დინამომ” კარგად დაიწყო ევროთასებზე ასპარეზობა და საშინაო შეხვედრაში სულ თამაშ-თამაშით გაანადგურა სუსტი მეტოქე.

ვიცით, დღევანდელ ფეხბურთში დონე გათანაბრებულია და სუსტი ხშირად ერევა ხოლმე ძლიერს. ესეც არ იყოს, “დინამომ” თითქმის მთლიანად შეცვალა შემადგენლობა და ასეთ დამაჯერებელ თამაშსა და შედეგს კიდევ უფრო მაღალი ფასი ამადაც ადევს.

შევთანხმდეთ: “ენგორდანი” სათვალავში ჩასაგდები აღარ არის. ეს ბარიერი დაძლეულია. ახლა მთავარია, აზერბაიჯანულ “გაბალასთან” ავიღოთ რევანში და მერეც ვიფიქროთ წარმატებებზე. რატომაც არა? თანამედროვე “დინამო” ისეა დაკომპლექტებული, უნდა მოუმატოს და მოუმატოს.

ცოტა ლაპარაკი, ბევრი საქმე

“ჩიხურა” ფინანსური თვალსაზრისით, ალბათ, ერთ-ერთი ყველაზე შეჭირვებული გუნდია საქართველოში. სოსო ფრუიძემ აგერ, მერამდენედ შეაკოწიწა ახალი კრებული, მაგრამ რატომღაც გვჯეროდა - არც ამჯერად შეირცხვენდა თავს ევროთასებზე და სწორედ ასე მოხდა.

ალბათ, ასე იქნება მანამ, სანამ “ჩიხურას” მწვრთნელად ფრუიძე ეყოლება - თავისი საქმის ჩუმად და ძალიან კარგად მკეთებელი კაცი, ვინც შესანიშნავად იცის, როგორ უნდა გამოწუროს მაქსიმუმი მინიმუმიდან. ის ბევრ საქმეს აკეთებს და ძალიან ცოტას ლაპარაკობს.

“ჩიხურა” მთელი შეხვედრის განმავლობაში სჯობდა “ფოლას”. ანგარიშში ჩამორჩენის მიუხედავად გუნდი არ გატყდა, თამაში შემოატრიალა და მოიგო. ვფიქრობთ, იმერლებს საპასუხო შეხვედრაშიც თამამად შეუძლიათ გამარჯვების დაგეგმვა.

მაქსიმუმი ყაზახეთში

“ტორპედომ” ყაზახურ “ორდაბასისთან” მინიმალური ანგარიშით წააგო - ძალიან კარგ, აწყობილ, კახა ცხადაძის გაწვრთნილ გუნდთან, რომელიც ერთმანეთის მიყოლებით ამარცხებს ყაზახური ფეხბურთის ლიდერებს. 

“ტორპედო” კი ცოტა ხნის წინ თითქმის მთლიანად დაიცალა წამყვანი ფეხბურთელებისგან. შექმნილ ვითარებაში კახა ჩხეტიანი სხვანაირად ვერ ითამაშებდა და ამ თამაშმა შედეგად მოიტანა ის, რომ საპასუხო შეხვედრის წინ შანსი არის. ეს იყო მაქსიმუმი, რისი გაკეთებაც ამ ეტაპზე შეიძლებოდა. 

დანარჩენი თბილისურ შეხვედრაში გადაწყდება. ამ ეტაპზე “ორდაბასი” “ტორპედოზე” ძლიერი გუნდია, მაგრამ ჩვენ ხომ შევთანხმდით, რომ თანამედროვე ფეხბურთში ძლიერი ყოველთვის ვერ იმარჯვებს. ახლა მხოლოდ ვარაუდი შეიძლება იმაზე, რა მოხდებოდა, ქუთათურებს შემადგენლობა რომ შეენარჩუნებინათ. 

გავრისკავთ და ვიტყვით - ასეთ შემთხვევაში, როგორც მინიმუმ, წყვილის ფავორიტი ქართული კლუბი იქნებოდა. რას ვიზამთ, წუწუნი საქმეს ვერ უშველის. ჩხეტიანის ერთ საქციელზე კი უსათუოდ დავწერთ ცალკე წერილს უახლოეს მომავალში...

არანაირი ეიფორია!

რა თქმა უნდა, შედეგები კარგია. ამაში დიდი ალბათობით წვლილი სეზონის ჩატარების ფორმატის ცვლილებამაც შეიტანა. დღეს ყველა გახარებულია, ვისაც ქართული ფეხბურთი სტკივა, მაგრამ, ფაქტია ისიც, რომ ეიფორიაში არავითარ შემთხვევაში არ უნდა ჩავვარდეთ.

არ უნდა დაგვავიწყდეს, რომ ჯერ მხოლოდ პირველ ეტაპს ვთამაშობთ და გასაკეთებელი ბევრია, სავალი გზა - ძალიან გრძელი. ის კი არა, ეიფორიაში ჩავარდნამ შეიძლება ახლავე, საპასუხო შეხვედრებამდე გაგვიწიოს ცუდი სამსახური.

ისიც ფაქტია, რომ, ამ კარგად ჩატარებული მატჩების მიუხედავად, არსად წასულა მთელი რიგი იმ პრობლემებისა, რომლებიც არსებობს ქართულ ფეხბურთში და რომლებზეც ყურადღებას ვამახვილებდით მთელი სეზონის განმავლობაში. ამიტომ, ფრთხილად ყოფნა გვმართებს. არავითარ შემთხვევაში არ უნდა ჩავთვალოთ, რომ საქმე ბოლომდეა გაკეთებული!..

1087
მკითხველის კომენტარები / 0 /
მსგავსი ამბები
რუბრიკის სხვა სიახლეები
;