ევროპაზე მეოთხე ფინალსა და მეტს ველით

საქართველოს 18-წლამდელთა ნაკრები პოლონეთის ქალაქ პოზნანში გაემგზავრა, სადაც 25-31 მარტს "რაგბი ევროპის 18-წლამდელთა" ჩემპიონატში იასპარეზებს.

* 18-წლამდელთა ევროპის ჩემპიონატი 2004 წლიდან იმართება.
* საქართველოს ნაკრები ბოლო სამი ტურნირის ფინალისტია.
* სამი მეორე ადგილის გარდა (2015, 2016, 2017), საქართველომ ერთხელ მესამე ადგილი (2010) მოიპოვა.
* საფრანგეთმა ტურნირი 8-ჯერ მოიგო, ინგლისმა - 5-ჯერ, ერთხელ კი ირლანდიამ.

ამ შეჯიბრების ფორმატი რამდენჯერმე შეიცვალა. თავდაპირველად მასში ექვსი ერის ქვეყნების 18-წლამდელებიც ასპარეზობდნენ. მას შემდეგ, რაც საქართველოს ნაკრებმა ფინალში გააღწია და უკან მოიტოვა ინგლისი, ირლანდია, უელსი, შოტლანდია და იტალია, ამ ქვეყნებმა ტურნირში ასპარეზობაზე უარი თქვეს, ამის მერე შეჯიბრებას იაპონია, კანადა და აშშ დაემატა.

წლეულს მათაც ვერ შეძლეს ასპარეზობა და შედეგად, ტურნირი "სუფთა" ევროპული გახდა. ბობოლებიდან აქ მხოლოდ საფრანგეთის 18-წლამდელთა გუნდი ითამაშებს, რომელსაც ბოლო სამი წელიწადია, რაც ფინალში ვხვდებით.

პირველ მატჩს "უმცროსი ბორჯღალოსნები" ჰოლანდიის ნაკრების წინააღმდეგ გამართავენ მეოთხედფინალში. გამარჯვების შემთხვევაში, ჩვენი გუნდის მომდევნო მეტოქე პორტუგალიასა და რუსეთს შორის გამარჯვებული იქნება. ამ გუნდების გარდა "რაგბი ევროპის 18-წლამდელთა ჩემპიონატში" საფრანგეთის, ესპანეთის, რუმინეთისა და ბელგიის ნაკრებები ასპარეზობენ.

"სამწუხაროა, რომ იაპონია, კანადა და აშშ ტურნირიდან გავიდნენ, თუმცა, ეს ჩვენს მოტივაციაზე არ აისახება. ამ ბიჭებისთვის რუმინეთის, პორტუგალიის, ესპანეთისა და რუსეთის წინააღმდეგ თამაში საინტერესოა. თუმცა, მათი მომავალი ზრდისთვის, რა თქმა უნდა, ჯობდა უფრო ძლიერი მეტოქეები გვყოლოდა.

მიზანი წინა წლების მსგავსად ფინალში გასვლაა, სადაც, სავარაუდოდ, კვლავ საფრანგეთთან მოგვიწევს შეხვედრა. უნდა ვეცადოთ, მათთან უფრო მეტს მივაღწიოთ, ვიდრე აქამდე" - თქვა საქართველოს რაგბის კავშირის ვებგვერდთან საუბრისას 18-წლამდელთა ნაკრების მთავარმა მწვრთნელმა დავით ჩავლეიშვილმა.

საქართველოს ნაკრები
დავით აბდუშელიშვილი, ირაკლი მჭედლიძე, ლუკა ჭელიძე, ვლადიმერ ჩაჩანიძე, ბექა ყორიაული, ნიკოლოზ ღამბაშიძე, გიორგი მარგალიტაძე, დემურ თაფლაძე (ყველა - ლელო), ვანო კარკაძე, გიორგი თევდორაძე, ლაშა ლომიძე, ირაკლი სიმსივე (ყველა - აია), საბა კურატიშვილი, ლუკა მაჭარაშვილი, გიორგი მიქანაძე (სამივე - არმაზი), ხვიჩა ცოფურაშვილი (სტად ფრანსე), ტარიელ გვიმრაძე, საბა კურტანიძე, ნიკა ცინცაძე (სამივე - ხვამლი), იოანე იაშაღაშვილი, ოთარ ლაშხია, ბართლომე კალაძე (სამივე - იუნკერები), გიგი ლეშკაშელი (ბაგრატი), მიხეილ ალანია, თეიმურაზ ჭიჭინაძე (ორივე - ჯიქი), ზურაბ ქავთარაძე (ხარები).

მეოთხედფინალი -25 მარტი
საქართველო-ჰოლანდია
პორტუგალია-რუსეთი
ესპანეთი-ბელგია
საფრანგეთი-რუმინეთი

ყოველდღიური სპორტული გაზეთი "ლელო"
547
მკითხველის კომენტარები / 0 /
მსგავსი ამბები
რუბრიკის სხვა სიახლეები