[VIDEO] ევროპალიგა. დინამო (თბ) 6:0 ენგორდანი: გოლების ფოიერვერკი დინამო არენაზე, ნებისმიერი გემოვნებისთვის [ვრცელი მიმოხილვა]

დინამო (თბ) 6
ენგორდანი 0 

1:0 ნინუა (6), 2:0 კუხიანიძე (21), 3:0 ქავთარაძე (61), 4:0 კუტალია (69-პენ), 5:0 კუხიანიძე (71. ზარიას პასით), 6:0 ზარია (81. რუხაიას პასით)

დინამო (4-2-3-1): პერალესი - რუხაია, მონხილი, კობოური, ქიმაძე - ნინუა, პაპავა (57. ზარია) - შენგელია (63. დაფე), კუხიანიძე (76. ქარდავა), ქავთარაძე - კუტალია.
სათადარიგოები: ლიტოვჩენკო, შულაია, იაშვილი, მეჯუბი
მწვრთნელი: ფელის ვისენტე

ენგორდანი (4-2-3-1): კოკა - აგუერო, ბრიტო, ვარელა, დევისი - ბუარმა, სპანო (85. გუიდა) - ლაბორდა (71. პეპე), სერა, გომესი (90. მენგუალი) - ლაფონტი.
სათადარიგოები: რუბიო, რუივო, მანეირო, გუიდა
მწვრთნელი: ვისენტე მირანდა

გაფრთხილებები: ბუჰარმა (5), ვარელა (66), სპანო (71), კუტალია (71), ლაფონტი (75), პეპე (85)
არბიტრი: მ. კროგი (დანია)

მეტოქისადმი პატივისცემა უეფას მთავარი დევიზია. “რესპექტ” - ასეთი ბანერი ევროპის ლამის ყველა სტადიონზეა გამოფენილი. მაგრამ ეს ის შემთხვევაა, როცა ანდორელთა მიმართ წმინდა ადამიანური თანაგრძნობა და პატივისცემა თუ გაგვიჩნდება, მაგრამ “ენგორდანი”, როგორც საფეხბურთო გუნდი, მეტისმეტად სუსტი გამოდგა...

თბილისელებს ცოტა კიდევ რომ მოენდომებინათ, უფრო დიდი ანგარიშითაც მოიგებდნენ და ევროთასებზე ქართული მოგების რეკორდულ შედეგს გააუმჯობესებდნენ. ახლა კი რეკორდი გაიმეორეს - ასეთივე ანგარიშით ბათუმის “დინამოს” ფარერების გუნდი ჰყავს დამარცხებული. თუმცა თბილისელებმა გააუმჯობესეს საკუთარი რეკორდი - 2013 წელს ასევე ფარერული გუნდი 6:1 ჰყავდათ დამარცხებული...

ანდორელები მთელი შეხვედრის განმავლობაში წინააღმდეგობის გაწევას ცდილობდნენ, მაგრამ თბილისელებმა საქმე იოლად მოაგვარეს. თამაში ახალი დაწყებული იყო, როცა სტუმართა საჯარიმოსთან ნიკა ნინუამ შეასრულა “სტანდარტული” და მეკარეს ნახტომმაც ვერ უშველა - გოლი ძალიან ლამაზი გამოვიდა.

მეორე გოლიც ინდივიდუალური ოსტატობის ხარჯზე გავიდა. “დინამო” ისევ უტევდა, მაგრამ მეტოქე კარში “ავტობუსით” კი არა, სატვირთო მატარებლის ეშელონივით იდგა. მასპინძელთა ნახევარმცველმა გიორგი კუხიანიძემ 21-ე წუთზე შორეული დარტყმით სცადა ბედი და ჯეიმს კოკას შანსი არ დაუტოვა - გოლი ამჯერადაც ძალიან ეფექტური გამოდგა.

“დინამო” მეორე გოლმა დაამშვიდა და ტაიმი მხოლოდ 2:0 მოიგო. შესვენების შემდეგ ანდორელები მოედანზე უფრო გათამამებულები გავიდნენ და ორიოდე მწავე შეტევაც წამოიწყეს...

ხუთი ქუთაისელი

...მაგრამ დინამოელებმა სტუმართა იმედებს ცივი შხაპი გადაასხეს. “დინამო” ზაფხულის შესვენებისას და მანამდეც ქუთაისის “ტორპედოდან” 5 მოთამაშით გაძლიერდა და ხუთივემ დიდი როლი ითამაშა. კუხიანიძის გოლი უკვე ვთქვით. 

61-ე წუთზე ანდორელებისთვის ყველაფერი ნათელი გახდა, რაშიც მთავარი როლი ისევ ექსტორპედოელებმა ითამაშეს. “სტანდარტული” ნინუამ შეასრულა, საჯარიმოში მცველებს ლევან კუტალიამ დაასწრო და ბურთი კარში გააგზავნა, რომელიც მეკარემ ცუდად მოიგერია და კარის ხაზთან ნოდარ ქავთარაძე აღმოჩნდა - 3:0.
მეოთხე გოლი გიორგი ქიმაძემ გამოიმუშავა, რომელსაც მცველმა საჯარიმოში ბუცი ყველაზე მტკივნეულ ადგილას (კოჭში) ჩაარტყა და პენალტი დაინიშნა, რომელიც კუტალიამ ძალიან ეფექტურად, პანენკას სტილში შეასრულა - 4:0.

კონფლიქტი პენალტის გამო

...მოედანზე ყველაზე მეტად ვითარება სწორედ ამ დროს დაიძაბა, რადგან ანდორელთა ფლანგის შემტევმა მარიო სპანომ ეს პენალტი გუნდის შეურაცხყოფად მიიღო, თუმცა არბიტრმა ემოციები ყვითელი ბარათებით ჩააცხრო...

...მაგრამ ვერ ჩააცხრო დინამოელთა სურვილი, რომ მეტოქის კარი კიდევ აეღოთ. შეცვლაზე შესულმა გიორგი ზარიამ, არფანგ დაფემ და ბაქარ ქარდავამ თამაში კიდევ უფრო გაამწვავეს. 

ორიოდე წუთში “დინამომ” ზარიას აქტიურობით კიდევ გაიტანა. ახალგაზრდა შემტევმა მოედნის ცენტრში გადაცემა ჩაჭრა და მეკარის წინ კუხიანიძე დატოვა. დუბლი - 5:0. 

საბოლოო ანგარიში თავად ზარიამ დააფიქსირა. მარჯვენა ფლანგზე გუჯა რუხაიამ მშვენივარდ ითამაშა და საჯარიმოში შევარდნილ თანაგუნდელს ზუსტად უპასა, ზარიამაც შეტევა მე-6 გოლით დააგვირგვინა. 

“დინამომ” არაოფიციალურად მომდევნო ეტაპზე აზერბაიჯანულ “გაბალასთან” თამაში გაინაღდა. 18 ივლისს ანდორაში გასამართი საპასუხო მატჩი ფორმალობად იქცა.

მატჩის შემდეგ

ანდორელებთან მატჩი პრესკონფერენციაზე “დინამოს” ესპანელმა მწვრთნელმა ფელის ვისენტემ შეაჯამა.

“დღეს მშვენიერი შედეგით გავიმარჯვეთ და მიხარია, რომ ასეთი უპირატესობა მოვიპოვეთ. მაგრამ საპასუხო შეხვედრისთვის სათანადოდ უნდა მოვემზადოთ. ანგარიშიდან გამომდინარე, გამორიცხული არ არის, ანდორაში განსხვავებული შემადგენლობა ვათამაშოთ და მოედანზე ახალგაზრდები შევუშვათ”, - ამბობს ვისენტე.

კითხვა დაისვა, ვინ არის “დინამოში” შტატიანი პენალტისტი, რადგან ანდორელთა კარში დანიშნული 11-მეტრიანის შესრულება რამდენიმე ფეხბურთელს სურდა: “კარგია, რომ გუნდში პენალტის კარგად შესრულება არა ერთ ფეხბურთელს შეუძლია. შტატიანი პენალტისტი არ გვყავს. ყველაფერი კონკრეტულ მომენტში წყდება”, - თქვა ვისენტემ.

ყოველდღიური სპორტული გაზეთი "ლელო"
2155
მკითხველის კომენტარები / 0 /
მსგავსი ამბები
რუბრიკის სხვა სიახლეები
;