ევროპალიგა. 'დინამო' 1:2 'დუნ. სტრედა' - რაც მოგივა დავითაო, სულ ბაიოს თავითაო... [VIDEO]

'დინამო' 1:2 'დუნ. სტრედა'
პირველი მატჩი 1:1
19.07. თბილისი. დინამო არენა
1:0 ზივზივაძე (41), 1:1 ბაიო (86), 1:2 ბაიო (90)

დინამო (4-2-3-1): ბულისკერია - ლოჩოშვილი, კობოური, რუხაია, ხარაბაძე - ნინუა, ივანისენია - შულაია, კიტეიშვილი, ერგემლიძე (88. ივანიშვილი) - ზივზივაძე (74. ვაწაძე)

სათადარიგოები: სიკაჩი, დარციმელია, კუცია, ზარია, ქარდავა
მწვრთნელი: კახა კაჭარავა

დუნაისკა სტრედა (3-5-2): მაცეი - ჰაკი, სატკა, ზაჰუმენსკი - კოსტრნა, ჰერცი, ლუბიჩიჩი (72. მ. ვიდა), კ. ვიდა (80. ტრეტიაკოვი), დევისი (57. კალმარი) - პაჩინდა, ბაიო

სათადარიგოები: იედლიჩკა, დივკოვიჩი, კონე, შიმჩაკი
მწვრთნელი: მარკო როსი

გაფრთხილება: ლუბიჩიჩი (60), ბაიო (67), ლოჩოშვილი (77), კიტეიშვილი (90), მ. ვიდა (90)
არბიტრი: დ. ნეკაროვსკი (მაკედონია)

თბილისის "დინამომ" ბევრი იბრძოლა, მაგრამ თავს ზემოთ ვერ ახტა. კახა კაჭარავას გაწვრთნილი გუნდი დამარცხდა სლოვაკური დაბის, დუნაისკა სტრედას წარმომადგენელ კლუბთან. ერთხელაც დადასტურდა, რომ წარსულით სიამაყე დიდი ვერაფერი ტონია და საქმეს თუ მონდომებითა და ცოდნით არ მიუდექი, არაფერი გამოვა...

იმთავითვე უნდა ვთქვათ, რომ მწარე იქნება ჩვენი დღევანდელი წერილი და კიდევ უფრო მწარე იქნება მავანთათვის ის მასალა, რომელსაც მკითხველი ჩვენი გაზეთის მომდევნო ნომერში იხილავს. უკვე მივეჩვიეთ, რომ ევროთასები ქართული კლუბებისთვის პირველივე ეტაპზე სრულდება. "ტორპედო" ევროთასებს ახალი ფორმატის წყალობით შემორჩა. "ჩიხურა" კი გადაარჩინა იმან, რაც სხვა არც ერთ ქართულ კლუბს არ აქვს. ასე რომ, ვითარება მაინც საგანგაშოა...

არადა, კარგად დავიწყეთ...

..."დინამომ" თამაში ძალიან კარგად დაიწყო. პირველი ტაიმი, რომ იტყვიან, ერთი ამოსუნთქვით ჩავატარეთ. გუნდის თამაშში იყო აგრესია და სისწრაფე, რაც ძალიან იშვიათია სადღეისოდ ქართული კლუბების შესრულებით...

მეტოქეს ამოსუნთქვის საშუალებას არ ვაძლევდით. სახიფათო მომენტები მრავლად არა, მაგრამ მაინც იყო მაცეის კართან. უაღრესად აქტიურ აკაკი შულაიას ორჯერ შეეძლო გატანა, მაგრამ ორივეჯერ კარგად გაისარჯა სლოვაკთა მეკარე.

გოლიც ჩინებული გამოვიდა - კუთხურიდან მოწოდებულ ბურთს ბუდუ ზივზივაძე დაუხვდა და თავური დარტყმით გახსნა ანგარიში.

შეცვლილი სურათი

გამოცდილება წარმატებისთვის ერთ-ერთი აუცილებელი პირობაა. "დინამოს" ძალიან დააკლდა ეს კომპონენტი. მეორე ტაიმშიც გვქონდა მომენტები, მაგრამ ბოლოს, როცა წარმატება ძალიან ახლოს მოვიდა, როგორღაც შეგვეშინდა, ვერ ვირწმუნეთ მისი და როგორც ხშირად ხდება ხოლმე, დავისაჯეთ.

ჩვენი იმედები 21 წლის კოტდივუარელმა შემტევმა ვაკუნ ისუფ ბაიომ დამარხა. მისი თავურები აუღებელი გამოდგა "დინამოს" ახალგაზრდა მეკარის, დემეტრე ბულისკერიასთვის. იყო უხერხული მომენტიც: სლოვაკთა პირველ გოლამდე მიხეილ ერგემლიძე კარგა ხნის განმავლობაში იწვა მინდორზე, შველას ითხოვდა, მაგრამ სტუმრებმა გვერდით ხაზს იქით არ გადააგდეს ბურთი...

"დინამო"საქართველოში საუკეთესო თუ არა, ერთ-ერთი საუკეთესო მაინც არის ფიზიკური მომზადებით. მაგრამ ასეთმა მომზადებამ ევროთასებზე საშუალოზე საშუალო მეტოქესთანაც კი არ იკმარა. რა დონისაა ჩვენი პირველობა, დასკვნები თავად გამოიტანეთ.

არასწორი პოლიტიკა

ამ შემთხვევაში, ყველაზე ნაკლებად მარცხში გუნდის მთავარ მწვრთნელს, კახა კაჭარავასა და ფეხბურთელებს დავადანაშაულებთ. "დინამოს" საშუალო ასაკი ოდნავ სცდება 20 წელს და ამ მაჩვენებლით ის ევროპალიგის ერთ-ერთი ყველაზე ახალგაზრდული გუნდია.

არ შეიძლება, გამუდმებით გაყიდო ფეხბურთელები და მათ ნაცვლად არავინ მოიყვანო. ამბობენ, "დინამო" "აიაქსისა" და ზაგრების "დინამოს" გზას მისდევსო. როგორ დავიჯეროთ, როცა ამსტერდამული გრანდიც და ზაგრებული კლუბიც ყოველი სეზონის წინ რამდენიმე გამოცდილ მოთამაშეს, მათ შორის, ლეგიონერებს იმატებს.

კარგად გვესმის, რომ საქართველოს ჩემპიონატში სათამაშოდ ფეხბურთელები სიამოვნებით არ მოფრინავენ, მაგრამ რატომ არ შეიძლება, თუნდაც იმავე ბაიოს დონის ლეგიონერი ვიპოვოთ, რომელიც ახალგაზრდაა და სულ ცოტა ხნის წინ ტუნისის "ეტუალ საელში" მოხვედრა გაუჭირდა?

ფაქტია, "დინამო" ამ ევროთასების წინ თითქმის ვერ გაძლიერდა. გუნდში მხოლოდ მათე ვაწაძე ჩაირიცხა, რომელიც ამ დროისთვის არ არის მზად 90 წუთის მაღალ დონეზე სათამაშოდ.

დღევანდელ ფეხბურთში შემადგენლობის გაძლიერებისა და თუნდაც რამდენიმე კვალიფიციური ლეგიონერის გარეშე ვერავინ ვერაფერს აღწევს და ეს "დინამოს" ხელმძღვანელობამ კარგად უნდა იცოდეს.

მატჩის შემდეგ

მარკო როსი: "საწყის 15 წუთში ჩვენი გუნდი ვერ იდგა მოწოდების სიმაღლეზე. შეიძლებოდა, მეტოქეს უფრო სოლიდური უპირატესობა მოეპოვებინა პირველ ტაიმში...

მეორე ნახევარში გამოსწორდა ჩვენი თამაში და ბოლო 10 წუთში მოვახერხეთ ორი გადამწყვეტი გოლის გატანა. უნგრეთის ნაკრებში წასვლის წინ შევძელით, რომ კლუბის ისტორიაში ჩაგვეწერა განსაკუთრებული ფურცელი.

მინდა, წარმატება ვუსურვო გუნდს მეორე საკვალიფიკაციო ეტაპზე. მადლობა ჩემს ფეხბურთელებს, რომლებმაც თავი დადეს. სულ ვიქნები "დუნაისკა სტრედას" თამაშებზე. შესვენებისას ფეხბურთელებს ვუთხარი, რომ უნდა შეგვეცვალა დაცვაში თამაშის სტილი და სხვანაირად უნდა შეგვეტია. ამან შედეგი გამოიღო".

კახა კაჭარავა: "პირველ ტაიმში სრულ უპირატესობას ვფლობდით. მერე თავი იჩინა ნერვიულობამ, გამოჩნდა შეცდომები... ბოლო 6 წუთში წავაგეთ თამაში. შრომა და თავდადება არავის დაუკლია.

მე ვიტყოდი, რომ ეს ყველაფერი გამოუცდელობის ბრალია. ჩვენი მიზანი მოწინააღმდეგის ნახევარზე ბურთის დაჭერა იყო. ბუდუ ზივზივაძე დაიღალა და მის ნაცვლად მათე ვაწაძე ჩავრთეთ თამაშში.

საერთოდ, მირჩევნია, მოვერიდო წაგებული თამაშის მერე ფეხბურთელებთან გასახდელში საუბარს. ამის გაკეთება დამშვიდებულ გონებაზე ჯობია. ადრე იყო რაღაც შეთავაზებები, მაგრამ მე ისინი ვიუარე "დინამოს" გამო. დღეისთვის "დინამოში" ვარ".

ყოველდღიური სპორტული გაზეთი "ლელო"
1183
მკითხველის კომენტარები / 0 /
მსგავსი ამბები
რუბრიკის სხვა სიახლეები
;