ევროპალიგა. დღეს 'დინამო' VS 'დუნაისკა სტრადა': არავითარი მაგრამ: უნდა გავიდეთ!

დღეს თბილისის "დინამო" ევროპალიგის პირველი ბარიერის გადალახვას ეცდება. საქართველოს ყველაზე ტიტულოვანი კლუბი საშინაო შეხვედრაში სლოვაკურ "დუნაისკა სტრედას" შეხვდება...

გავრისკავთ და ვიტყვით, რომ "დინამო" ამ მატჩში ფავორიტია. ჯერ ერთი, რომ სლოვაკური ჯახი 1:1 მორჩა. მეორეც, საპასუხო შეხვედრის წინ მეტოქეს მწვრთნელი შეეცვალა.

კლუბი დატოვა მისი წარმატების მთავარმა შემოქმედმა, იტალიელმა მარკო როსიმ, რომელმაც უნგრეთის ეროვნული გუნდი ჩაიბარა. მის ნაცვლად კი "დუნაისკა სტრედაში" გერმანელი პეტერ ჰიბალა დაინიშნა. მართალია, კლუბის ხელმძღვანელობამ ის ოფიციალურადაც წარადგინა, მაგრამ თბილისში სლოვაკებს კვლავ როსი უხელმძღვანელებს. ეს კიდევ ერთხელ მეტყველებს იმაზე, თუ რამდენად მნიშვნელოვანია ეს მატჩი სლოვაკებისთვის.

ახალი "დინამო" მართლაც რომ გემრიელ ფეხბურთს თამაშობს. ისღა დაგვრჩენია, დღეს სტადიონზე მივიდეთ და ქართული ფეხბურთის გრანდი ტრიბუნიდან გავამხნევოთ. დანარჩენს კი უშუალოდ თამაში გამოაჩენს...

გუშინ მედიის წინაშე წარსდგნენ "დინამოსა" და "დუნაისკა სტრედას" მწვრთნელები. აი, რა თქვა თბილისელთა თავკაცმა კახა კაჭარავამ:

"პირველ რიგში, მინდა გამოვთქვა იმედი, რომ "დინამო არენაზე" ბევრი ქომაგი იქნება. ეს უაღრესად მნიშვნელოვანი იქნება ჩვენი გუნდისთვის...
"დუნაისკა სტრედასთან" მატჩისთვის ჩვეულებრივად ვემზადებით. არის მიკროტრავმები, მაგრამ მე მაინც ვიტყოდი, რომ მომზადებით კმაყოფილი ვარ...

ჩვენი მონახაზი ამ თამაშის წინ ასეთია: არც 11 კაცით შევუტევთ და არც მთელი გუნდით ჩავჯდებით დაცვაში. ისე უნდა ვითამაშოთ, რომ შემდეგი ეტაპის საგზური ჩვენ დაგვრჩეს. ამისთვის თითოეული ჩვენგანი ყველაფერს გააკეთებს...

რაც შეეხება წინა მატჩს, გახსოვთ, ორივე გუნდს შეექმნა მომენტები. ისე მოხდა, რომ რაღაც მომენტში ჩვენც დავუშვით შეცდომები, დავკარგეთ კონცენტრაცია... ვმუშაობთ იმისთვის, რომ გამოსწორდეს ეს შეცდომები. ყველაფერს გავაკეთებთ, რომ საპასუხო მატჩში ასეთი რამ აღარ განმეორდეს. ჩვენი მიზანია, მაქსიმალურად გამოვიყენოთ მომენტები. ასევე, ყურადღება უნდა მივაქციოთ მეტოქის "სტანდარტულებს"...

სტეფან სიკაჩი სულ ერთი კვირაა, რაც ჩვენთანაა. ეს მოკლე დროა და არ არის იოლი შეთამაშება. მე ახლა ვერ ვიტყვი, ვინ დაიცავს ხვალ "დინამოს" კარს"...

ოთარ კიტეიშვილი: "ეს არის ძალიან მნიშვნელოვანი დღე როგორც თბილისის "დინამოსთვის", ისე ქართული ფეხბურთისთვის. ჩვენი მიზანია შემდგომ ეტაპზე გასვლა და ეს სრულიად ცალსახაა. არ შეიძლება ისე მოხდეს, რომ მერე ვთქვათ - კარგად კი ვითამაშეთ, მაგრამ ვერ გავედით...

დიდი იმედი მაქვს ქომაგების გვერდში დგომის. ჩვენი მხრივ, მაქსიმუმს გავაკეთებთ გუნდის წარმატებისა და გულშემატკივრის გახარებისთვის. კი, ახალგაზრდული გუნდი გვყავს, მაგრამ გამოცდილებას ყველა თანდათან იძენს. სწორედ ასეთ მატჩებში მოდის გამოცდილება. ასეთ თამაშებში უნდა მიიღოს ფეხბურთელმა აუცილებელი პრაქტიკა".

ახლა კი მოვუსმინოთ ჯერ კიდევ "დუნაისკა სტრედას" მწვრთნელ მარკო როსის: "იოლი თამაში ნამდვილად არ იქნება. პირველ მატჩში გვქონდა მომენტები, მაგრამ მხოლოდ ერთხელ შევძელით გატანა. თუ ასარჩევად იქნება საქმე, ჩვენთვის უკეთესია, თუ ბოლოს გავიტანთ, რადგან მოწინააღმდეგეს დრო აღარ დარჩება საპასუხო გოლისთვის...

სეზონის დასაწყისია, მაგრამ თავს მაინც კარგად ვგრძნობთ. პირველ მატჩში ჩვენ მხოლოდ ერთი საათის განმავლობაში შევძელით იმ ფეხბურთის თამაში, რომელიც ჩვენთვის მისაღებია. ძალიან ვაფასებთ მეტოქეს.

"დინამო" ახალგაზრდა ფეხბურთელებითაა დაკომპლექტებული, თუმცა შესანიშნავ ფეხბურთს თამაშობს. ვეცდებით, 90 წუთის განმავლობაში ვიყოთ სტაბილურები".

ყოველდღიური სპორტული გაზეთი "ლელო"
1041
მკითხველის კომენტარები / 0 /
მსგავსი ამბები
რუბრიკის სხვა სიახლეები
;