ევროპალიგა. კვალიფიკაცია: 'დუნაისკა სტრადა' VS 'დინამო' (თბ)

დღეს, თბილისის დროით 23 საათზე, ქართული საკლუბო ფეხბურთის ფლაგმანი თბილისის "დინამო" თავის ევროპულ თავგადასავალს იწყებს.

კახა კაჭარავას გაწვრთნილი გუნდი ევროპალიგის სასტარტო შეხვედრაში "დუნაისკა სტრედას" დაუპირისპირდება - გუნდს, რომელმაც სლოვაკეთის დასრულებულ ჩემპიონატში მესამე ადგილი დაიკავა...

ხუმრობა არ შეიძლება!

ევროპული და მსოფლიო საბუკმეკერო კანტორები სხვაგვარად მიიჩნევენ, მაგრამ სლოვაკური დაბის გუნდთან ჩვენ ფავორიტად მაინც თბილისის "დინამოს" მივიჩნევთ. ის კი თავიდანვე უნდა დავწეროთ, რომ მეტოქესთან ხუმრობა არავითარ შემთხვევაში არ შეიძლება!

დაახლოვებით ამ ყალიბის გუნდი იყო შარშან "ტრენჩინი". ისიც სლოვაკეთს წარმოადგენდა და ყველას კარგად გვახსოვს, როგორ დასრულდა მისი დაპირისპრება ქუთაისის "ტორპედოსთან". რა თქმა უნდა, ყველას დიდი იმედი გვაქვს, რომ ასეთი რამ წლეულს აღარ განმეორდება.

"დინამო" მიმდინარე ევროპალიგაზე, ალბათ, ერთ-ერთი ყველაზე ახალგაზრდული გუნდია, მაგრამ, მეორე მხრივ, ამ ბიჭებმა, რომელთა უმრავლესობა საკლუბო აკადემიის აღზრდილია, კარგად იციან, რას ნიშნავს "დინამოს" საკლუბო ფილოსოფია და რას ითხოვს მათგან მთავარი მწვრთნელი.

კიტეიშვილის ფაქტორი

გუნდის ლიდერი ოთარ კიტეიშვილი შესანიშნავ ფორმაშია. ის ამას ამტკიცებს საქართველოს ჩემპიონატის ყველა მატჩში და, რა თქმა უნდა, შეეცდება დაამტკიცოს ეს ევროთასებზეც. თანამედროვე "დინამო" ერთი კაცის გუნდი ნამდვილად არ არის, მაგრამ გუნდის თამაშს მნიშვნელოვნად განსაზღვრას სწორედ კაპიტნის გარჯა.

საიდუმლო არავისთვისაა, რომ კიტეიშვილს ერთბაშად რამდენიმე ევროპული გუნდი აკვირდება. აქედან გამომდინარე, ძალიან მნიშვნელოვანი იქნება, თუ როგორ წარმოაჩენს ის საკუთარ თავს ევროასპარეზზე.

მათე და სტეფანი

თბილისის "დინამომ" ამ დროისთვის საევროთასოდ ორი ახალი ფეხბურთელი დაიმატა. მათე ვაწაძეს ქართველი ქომაგის წინაშე წარდგენა ნამდვილად არ სჭირდება, მას არაერთი მატჩი ჩაუტარებია ჩვენი ქვეყნის პირველი გუნდის შემადგენლობაში.

ვაწაძემ დიდ ფეხბურთში პირველი ნაბიჯები სწორედ კახა კაჭარავას ხელმძღვანელობით გადადგა. ცხადია, ბოლო დროს დანიურ "სილკებორგში" მოასპარეზე ვაწაძემ "დინამო" მნიშვნელოვნად უნდა გააძლიეროს.

"დინამოში" ჩაირიცხა მოლდოველი მეკარე სტეფან სიკაჩი, ვისაც რუსეთის მოქალაქეობა აქვს. მას გამოუვლია "შერიფისა" და გროზნოს "ტერეკის" სკოლა. ესეც კარგი ნამატი უნდა იყოს დინამოელებისთვის, რადგან ფოთის "კოლხეთში" თამაშისას სიკაჩმა არაერთხელ დაამტკიცა თავისი მაღალი კლასი.

უნაისკა სტრედამ ჩამოწერა...

"დუნაისკა სტრედაში" უკვე ჩამოწერეს იმ ფეხბურთელთა ვინაობა, რომლებიც ევროთასებზე გუნდის ღირსებას დაიცავენ. რა თქმა უნდა, ეს არ არის სუპერშემადგენლობა, მაგრამ უკვე ნათლად ჩანს, როგორ მოწინააღმდეგესთან ექნება საქმე საქართველოს ყველაზე ტიტულოვან კლუბს.

მეკარეები - პარტიკ მაცეი, ადრიან სლანჩიკი, მარტინ იედლიჩკა;
მცველები - მილან სიმჩაკი, ტომაშ ჰაკი, სულეიმან კონე, კრისტიან კოსტრნა, ერიკ დევისი, დომინიკ სპირიაკი, ლუბომირ სატკა;
ნახევარმცველები - მარინ ლუბიჩიჩი, კრისტოფერ ვიდა, ჟოლტ კალმარი, კრისტიან ჰერცი, ტიმოტეი ჟაჰუმენსკი, ივ პამბუ, ესმერალდ ალუკუ;
თავდამსხმელები - ერიკ პაჩინდა, ვაკუ იუსუფ ბაიო, მარკო დივკოვიჩი, მაქსიმ ტრეტიაკოვი.

ღირსეულად დაბრუნების ეიმედებათ

"დუნაისკა სტრედა" მეოთხედი საუტკუნის შემდეგ უბრუნდება ევროთასებს. იქ გუნდს 1994 წლის შემდეგ არ უთამაშია. სწორედ ამ ფაქტს მიაქცია ყურადღება კლუბის ოფიციალურ საიტთან საუბარში გუნდის ერთ-ერთმა ლიდერმა ტომაშ ჰაკმა:

"ჩვენ მაქსიმალურად ვცდილობთ, რაც შეიძლება კარგად შევისწავლოთ მოწინააღმდეგე. მხოლოდ ასე თუ შევძლებთ წარმატების მიღწევას. რა თქმა უნდა, ჩვენი განწყობა საბრძოლოა და ყველაფერს გავაკეთებთ იმისთვის, რომ პირველ, საშინაო მატჩში ჩვენთვის სასურველი შედეგი მივიღოთ...

თამაში საინტერესო უნდა გამოდგეს, რადგან ერთმანეთს ორი ახალგაზრდული, შემტევი და ბურთის კონტროლის მოყვარული გუნდი ხვდება. ახლა არ მინდა ვისაუბრო იმაზე, თუ როგორ თამაშობს თბილისის "დინამო". ჩვენი მთავარი მიზანია, ვითამაშოთ ის ფეხბურთი, რომელიც შეგვიძლია.

უნდა ვაიძულოთ მოწინააღმდეგე, რაც შეიძლება მეტი დრო გაატაროს საკუთარ ნახევარზე და უნდა შევძლოთ გოლების გატანა. ეს აუცილებელია იმისთვის, რომ თბილისში თავი კომფორტულად ვიგრძნოთ. ჩვენი მთავარი მიზანი კი ის უნდა იყოს, რომ საშინაო შეხვედრაში გოლი არ გავუშვათ", - თქვა ჰაკმა.
რას წარმოადგენს

თანამედროვე დუნაისკა სტრედა?

მართალია, თანამედროვე "დუნაისკა სტრედა" არ არის ვარსკვლავებით დაკომპლექტებული გუნდი, მაგრამ მის შემადგენლობაში მაინც არიან ისეთი ფეხბურთელები, რომლებზეც ნამდვილად ღირს ყურადღების გამახვილება.

ჯერ ლეგიონერებზე ვთქვათ. საფრანგეთშია დაბადებული ნახევარმცველი ივ პამბუ, ვინც კონგოს ნაკრებში 2 მატჩი ჩაატარა. ეს საყრდენი ნახევარმცველი თავის დროზე იტალიის სერია B-ში თამაშობდა და "რეჯინას" ღირსებას იცავდა.

კოტდივუარელმა მცველმა სულეიმან კონემ ევროპული კარიერა ერევნის "არარატში" დაიწყო. ამის შემდეგ შვედურ "იურგორდენში" გადაბარგდა, რის შემდეგაც "დუნაისკა სტრედას" მიაშურა.

კოტდივუარელი შემტევი იუსუფ ბაიო "დუნაისკა სტრედაში" ტუნისის ყველაზე ცნობილი კლუბიდან "ეტუალ საელიდან" მივიდა. მოკლე ხანში ის სლოვაკური კლუბის ერთ-ერთ ლიდერად იქცა და 9 შეხვედრაში 4 გოლი შეაგდო.

თბილისელებს, ალბათ, დიდი ჯაფა დაადგებათ ოდესის "ჩერნომორეცის" ყოფილი ფორვარდის, მაქსიმ ტრეტიაკოვის გასანეიტრალებლად. ის ბოლო დრომდე ოდესური კლუბის ძირითადი შემტევი გახლდათ და ახლახან გადავიდა სლოვაკურ გუნდში.

ვის უქომაგებს ვაისი?

არ გამოვრიცხავთ, საქართველოს ნაკრების მთავარმა მწვრთნელმა ვლადიმირ ვაისმა ამ შეხვედრაში "დუნაისკა სტრედას" უქომაგოს გულის სირღმეში მაინც და რა უფლება გვაქვს, ამის გამო დავადანაშაულოთ?

ჯერ ერთი, ყველამ კარგად ვიცით, რომ ვაისი სლოვაკია. მეორეც, 1994 წელს საქართველოს ნაკრების დამრიგებელი სწორედ "დუნაისკა სტრედას" ღირსებას იცავდა. ამ გუნდის შემადგენლობაში ვაისმა 31 შეხვედრა ჩაატარა და 4 გოლი გაიტანა.

კახა კაჭარავა: მოსაგებად ყველაფერს გავაკეთებთ

"დუნაისკა სტრედასთან" მატჩამდე სლოვაკეთში მყოფი თბილისის "დინამოს" მთავარმა მწვრთნელმა კახა კაჭარავამ პრესკონფერენცია გამართა. ჟურნალისტებს თბილისური გრანდის ლიდერი ოთარ კიტეიშვილიც ესაუბრა.

კახა კაჭარავა: "დინამო" იმ უპირატესობას ფლობს, რომ ამ დროისთვის ჩვენთან სეზონი მიმდინარეობს, სლოვაკეთში კი მაისში მორჩა. ასე რომ, მეტოქეზე უკეთეს ფორმაში ვართ. ჩვენი გუნდი ძალიან ახალგაზრდულია, მაგრამ უზომოდ მოტივირებულები ვართ. ჩვენი მიზანია, პირველი გოლი გავიტანოთ. "დინამო" ყველაფერს გააკეთებს მოსაგებად".

ოთარ კიტეიშვილი: "ვიცით, რომ ძლიერ მოწინააღმდეგესთან მოგვიწევს თამაში. "დუნაისკა სტრედა" 3-5-2 სქემას იყენებს, "სტანდარტულებისას" ძლიერები არიან. ჩვენ გვსურს, რომ გავიტანოთ გოლი და შევინარჩუნოთ უპირატესობა".

ყოველდღიური სპორტული გაზეთი "ლელო"
442
მკითხველის კომენტარები / 0 /
მსგავსი ამბები
რუბრიკის სხვა სიახლეები