ევროპალიგა. კვალიფიკაცია: 'ჩიხურა' VS 'ბეითარი'

დღეს, 19:00 საათზე, "მიხეილ მესხზე", ევროპალიგის პირველი საკვალიფიკაციო რაუნდის პირველი შეხვედრა გაიმართება - საქართველოს თასის მფლობელი საჩხერის "ჩიხურა" იერუსალიმის "ბეითარს" დაუპირისპირდება.

გუშინ ორივე გუნდმა წინასამატჩო ვარჯიში და პრესკონფერენცია გამართა. მანამდე ვიტყვით, რომ ევროპალიგამდე "ჩიხურამ" მხოლოდ მიხეილ სარდალიშვილი დაიმატა, რომელიც ამ გუნდში 3 წლის განმავლობაში თამაშობდა და მის ერთ-ერთ ლიდერადაც ჩამოყალიბდა, 2018 წლის დასაწყისში კი გადავიდა ქუთაისის "ტორპედოში", ახლა კი ისევ "ჩიხურაშია"...

მატჩის წინ სოსო ფრუიძე ჟურნალისტებს გიორგი გაბედავასთან ერთად შეხვდა:

"სარდალიშვილი დაგვიბრუნდა, რომელიც "ჩიხურასთვის" დიდი ძალაა. ტრავმირებულია შოთა კაშია, დღევანდელ ვარჯიშზე ლევან კაკუბავაც ვერ დავტვირთეთ და მისი თამაში საეჭვოა, თუმცა 18-კაციან განაცხადში გვეყოლება. ჩვენი გუნდის პრობლემა კვლავ მოკლე სკამია - ხვალ სულ 18 ფეხბურთელი გვეყოლება...

...ევროპალიგას შარშან კარგად ვერ შევხვდით. ავსტრიულ "ალტახთან"გადაღლილები ვიყავით. წლეულს უკეთ მოვემზადეთ. ტრანსფერებში კი ფინანსური სიტუაციის გამო შეზღუდულები ვართ. ყველამ იცის, რომ არ გვილხინს...

...რამდენიმე დღე უნგრეთში ვიმყოფებოდი, სადაც ჩვენი მეტოქის ორ ამხანაგურ შეხვედრას დავესწარი. მწვრთნელი იგივეა და სათამაშო მოდელიც არ შეუცვლიათ. "ბეითარი" ძალისმიერი გუნდია, რამდენიმე მოთამაშე უნივერსალია და სხვადასხვა პოზიციაზე თამაშობს, რაც მწვრთნელს საშუალებას აძლევს, სხვადასხვა ტაქტიკური სქემები მოსინჯოს, თუმცა "ბეითარის" შემადგენლობა თითქმის მთლიანად შეიცვალა. ბევრი წავიდა და 9 ახალწვეული ჰყავთ. პირდაპირ ვიტყვი, "ბეითართან" წარმატებული თამაში შესაძლებელია", - თქვა სოსო ფრუიძემ.

გიორგი გაბედავა: "კარგად ვხვდებით, რომ ევროპის ლიგაზე საქართველოს წარმოვადგენთ და მოსაგებად ყველაფერს გავაკეთებთ. გასაგებია, რომ ქართულ კლუბებთან ყველა მეტოქე ფავორიტია და რთული მატჩი გველის. მეტოქის თამაში არ მინახავს, მაგრამ, სავარაუდოდ, ფიზიკურად კარგად მომზადებული გუნდია, რადგან ისრაელში სუსტი ლიგა არ არის".

"ჩიხურასთან" მატჩამდე პრესკონფერენცია "ბეითარის" მთავარმა მწვრთნელმა გაი ლუზონმაც გამართა:

"ჩვენ ახალგაზრდებით დაკომპლექტებული გუნდი გვყავს. ბევრი ახალწვეულია "ბეითარში" და ამის გათვალისწინებით, ფიზიკური კონდიციების მხრივ, ჩვენს მეტოქეს უპირატესობა ექნება. ქართველი ფეხბურთელები სწრაფები და ტექნიკურები არიან და ველოდებით, რომ "ჩიხურა" აქცენტს ბურთის კონტროლზე გააკეთებს".

ისრაელის 6-გზის ჩემპიონი ბოლო ოთხი სეზონი ევროგათამაშების უცვლელი მონაწილეა. 2015/16-სა და 2017/18-ში ევროპალიგაზე მეორე საკვალიფიკაციო რაუნდამდე მივიდა, 2016/17-ში კი პლეი ოფამდე გააღწია, სადაც საფრანგეთის "სენტ ეტიენთან" დაძაბულ ბრძოლაში (0:0, 1:2) დამარცხდა.

დაცვის ცენტრში თამაშობს "პარი სენ-ჟერმენის" ყოფილი მცველი ანტუან კონტე და ესპანელი კარლოს კუელიარი (უთამაშია "ოსასუნაში", "გლაზგო რეინჯერსში", "ასტონ ვილაში", "სანდერლენდსა" და "ნორვიჩში"), რომელიც გუნდს ახლა დაემატა.

მასთან ერთად "ბეითარის" ტრანსფერებიდან აღსანიშნავია გიორგი ჩაკვეტაძის "გენტიდან" მიწვეული მარცხენა მცველი ლიორ ინბრუმი, "აშქელონის" შემტევი ნახევარმცველი ზიონ ზემანი, შუა ხაზში არიან ბრაზილიელები - "ვასკო და გამადან" კლოდერმირ და სილვა და ჟორჟინიო მინატო პაულინიო. გ

უნდში სლოვაკეთის ნაკრების ორი ფეხბურთელი - ნახევარმცველი ერიკ საბო და თავდამსხმელი იაკუბ სილვესტრი ("ნიურნბერგში" უთამაშია) თამაშობდა, მაგრამ საბო სალონიკის პაოკ-ში გადავიდა.

ზაფხულში გუნდი ასევე დატოვეს დანიის ახალგაზრდულისა და "ბრონდბიუს" ფლანგის ნახევარმცველმა დავიდ ბოისენმა და ამავე ამპლუის გერმანელმა მარსელ ჰაისტელმა, ფლანგის შემტევმა ჰენ ეზრამ, ხოლო ცენტრალური ნახევარმცველი პაულ აკუკუ ისრაელის "რიშონ ლეციონში" გადავიდა.

ყოველდღიური სპორტული გაზეთი "ლელო"
458
მკითხველის კომენტარები / 0 /
მსგავსი ამბები
რუბრიკის სხვა სიახლეები