ევროპალიგა. 'სამტრედია' - 'ტობოლი': გია ცეცაძე: პრობლემები გვაქვს, მაგრამ მთავარია, თავი არ შევირცხვინოთ

ევროპალიგაზე "სამტრედიას" სრული განაცხადი მხოლოდ გუშინ საღამოს გახდა ცნობილი. ჩვენი ჩემპიონატის მესამეადგილოსანი "ტობოლთან" მატჩისთვის 23 ფეხბურთელით ემზადება.

მეკარეები: სერგეი პოგორელი, დავით კუპატაძე, ილია სტურუა
მცველები: გიორგი ახალაძე, ვაკო ბაჩიაშვილი, რომან ჩაჩუა, ივან ფატიჩი, ჯემალ გოგიაშვილი, გიორგი გურული, გიორგი ჯგერენაია, გივი ქარქუზაშვილი, დმიტრო ულიანოვი

ნახევარმცველები: ინტერს გიი, ავთო ენდელაძე, შოთა კერძევაძე, ჯაბა ლიპარტია, ოთარ მამასახლისი, ანატოლი მესიაჩენკო
თავდამსხმელები: მაიკლ ოლაიტანი, ზაურ ხაბეიშვილი, ლაშა კუჭუხიძე, თამაზ მაქაცარია, გიორგი ფანცულაია.

სამტრედიელებმა არა მხოლოდ უკრაინელი მეკარე სერგეი პოგორელი დაიმატეს, არამედ, ქობულეთის "შუქურას" კიპერი დავით კუპატაძეც. საქმე ისაა, რომ მეკარე ილია სტურუა დაშავებულია და დღევანდელ შეხვედრაში გუნდს გამოცდილი მეორე მეკარეც სჭირდებოდა. საბედნიეროდ, ნიგერიელი თავდამსხმელი მაიკლ ოლაიტანი მომჯობინდა და, შესაძლოა, დღეს მოედანზეც ვიხილოთ. თუმცა სრულად მისი თამაში გამორიცხულია.

"ტობოლთან" მატჩამდე "სამტრედიას" მთავარმა მწვრთნელმა გია ცეცაძემ "მიხეილ მესხის" საპრესკონფერენციო დარბაზში ჟურნალისტების კითხვებს უპასუხა:

- ოთხი დღეა, რაც გუნდში ვარ, ბევრი ფეხბურთელი შეიცვალა და ჩვენი მიზანია, მაქსიმალური შედეგი ვაჩვენოთ. მაგრამ "სამტრედიას" საკადრო პრობლემები ყველასთვის ცნობილია.

- კონკრეტულად, რა რის თქვენი მიზანი?

- ...წაგება ნამდვილად არა. მთავარია, თავი არ შევირცხვინოთ.

- მაიკლ ოლაიტანი თუ ითამაშებს?

- ის სრული დატვირთვით ვარჯიშობს და არ არის გამორიცხული, ითამაშოს. მაგრამ ჯერ 90 წუთის სათამაშოდ მზად არ არის.

- კიდევ ვინმეს დამატებას თუ აპირებთ?

- შემდეგში კი, ახლა ეს ვეღარ ესწრება. იყო რამდენიმე საინტერესო მოთამაშის კანდიდატურა, მაგრამ მათ უკრაინის პრემიერლიგაში თამაში ამჯობინეს.

- გუნდში როდემდე დარჩებით?

- სექტემბრამდე, როცა ახალგაზრდული ნაკრების თამაშები დაიწყება. მერე რა იქნება, ჯერ ვერ ვიტყვი.

- "სამტრედია" ეროვნულ ლიგაში აუტსაიდერია და რა შეიძლება "ტობოლს" დაუპირისპიროთ?

- ცუდი მოთამაშეები არ გვყავს და წინააღმდეგობის გაწევა არსებული რესურსით უნდა მოვახერხოთ. "ტობოლი" კარგად შევისწავლეთ. მაგრამ მთავარია არა ის, თუ როგორ შევისწავლეთ, არამედ ის, რამდენად მოვახერხებთ ამ ინფორმაციის მოედანზე გადატანას.

- შემტევი ფეხბურთი გიყვართ. ხვალ "ტობოლს" რას დაუპირისპირებთ?

- ამის მცდელობა მაინც იქნება. თუმცა შესწორებას შევიტან და ვიტყვი, რომ მე დაბალანსებული ფეხბურთი მიყვარს, სადაც ყველა რგოლი გამართულია და კარგად უტევს. ამ კუთხით კლუბში მუშაობა უფრო ადვილია. თამაშის მსვლელობიდან გამომდინარე, კორექტივებს შევიტანთ. თუმცა დასამალი არ არის, რომ რთულ მდგომარეობაში ვართ.

- სერგეი პოგორელი საინტერესო მეკარეა, უკრაინის ნაკრების კანდიდატი იყო და ფრანგულ "სენტ ეტიენში" თამაშის პერსპექტივა ჰქონდა. მაგრამ 2017 წელი გაუცდა და წელსაც მხოლოდ 7 მატჩი ჩაატარა. თქვენი აზრით, მას უთამაშებლობა პრობლემას არ შეუქმნის?

- საერთოდ, ყველა გუნდი მოთამაშეებს შეძლების მიხედვით იმატებს. პოგორელი კი გამოცდილი მეკარეა და მიმაჩნია, რომ დღეს ის ჩვენთვის საუკეთესო ვარიანტია. გამოცდილებით ბევრი რამის დაბალანსებაა შესაძლებელი.

ტობოლის საევროპო
შემადგენლობა და ბოლო მატჩი სამტრედიამდე

მეკარეები - 1. სულთან ბუსურმანოვი, 12. დმიტრო ნეპოგოდოვი, 33. ვიაჩესლავ კოტლიარი
მცველები - 4. ფერნანდეს კასაი (ცენტრალური აფრიკის რესპუბლიკა), 5. იონუც ლარიე (რუმინეთი), 6. ვანჩე შიკოვი (მაკედონია), 7. დმიტრი მიროშნიჩენკო, 8. ვიქტორ დმიტრენკო, 19. გრიგორი სარტაკოვი, 21. სულთან აბილგაზი, მარატ ბისტროვი (რუსეთი);
ნახევარმცველები - 10. ნიკა კვეკვესკირი, 20. ჯაბა კანკავა (ორივე - საქართველო), 11. ასლან დარაბაევი, 13. აზატ ნურგალიევი, 14. სამატ ჟარინბეტოვი, 18. ტიმურ ჟაკულოვი, 44. არტურას ჟულპა (ლიეტუვა), 51. თემირლან ამირგაზი, 79. ტანატ ნუსერბაევი
თავდამსხმელები - 9. ნურბოლ ჟუმასკალიევი, 15. ბაუირჟან ტურისბეკი, 17. ჟასულან მოლდაკარაევი, 71. დმიტრი ზაგვოსტკინი, 96. მაქსიმ ფედინი
მწვრთნელი: ვლადიმირ ნიკიტენკო

"სამტრედიასთან" შეხვედრამდე, "ტობოლმა" ბოლო მატჩი ყაზახური ფეხბურთის ლიდერ "ასტანასთან" გამართა და ქულას გამორჩა (0:0). ქართული გუნდის მეტოქემ ასეთი შემადგენლობით (ძირითადი) ითამაშა: ბუსურმანოვი, დმიტრენკო, კასაი, მიროშნიჩენკო, კანკავა, კვეკვესკირი, ნურგალიევი, ჟულპა, ნუსერბაევი, ტურისბეკი, ფედინი.

ყაზახეთის პროფესიული ფეხბურთის ლიგამ მე-17 ტურის სიმბოლურ ნაკრებში "ტობოლის" ორი მოთამაშე დაასახელა - 22 წლის მეკარე სულთან ბუსურმანოვი და ცენტრალური მცველი ფერნანდეს კასაი.

მატჩის შემდეგ ნიკიტენკოს კითხვა დაუსვეს - "მეორე ნახევარში შესამჩნევი იყო, რომ ბიჭები დაიღალნენ. ცვლილებები რატომ არ განახორციელეთ?", რაზეც "ტობოლის" დამრიგებელმა ინფორმაციულად საინტერესო რამ თქვა:

"ჩვენთან სათადარიგოთა სკამი ახლა მოკლეა და გუნდში ტრავმირებულებიც არიან. ვეძებთ მარცხენა ფლანგის მცველს და, უპირველეს ყოვლისა, თავდამსხმელს, რომელიც შეტევას დაასრულებს. ეს პროცესი მარტივად ვერ მიმდინარეობს, რადგან ევროპისა და ჩვენს სატრანსფერო პერიოდებს შორის განსხვავებაა.

ფეხბურთელები, რომელთა აყვანაც 31 აგვისტომდე შეგვიძლია, ახლა წინადადებებს რუსეთის კლუბებისგან ელიან, ჩვენთან კი სატრანსფერო პერიოდი ივლისის ბოლოს იხურება", - თქვა ნიკიტენკომ.

ყოველდღიური სპორტული გაზეთი "ლელო"
1131
მკითხველის კომენტარები / 0 /
მსგავსი ამბები
რუბრიკის სხვა სიახლეები
;