ევროპალიგა. 'ტობოლი' VS 'სამტრედია'. გია ცეცაძე: მინიმუმ კარგ თამაშს ველოდებით

დღეს კუსტანაიში (ყაზახეთი), ევროპალიგის პირველ საკვალიფიკაციო ეტაპზე, "ტობოლი"-"სამტრედიას" საპასუხო მატჩი გაიმართება.

პირველ შეხვედრაში მაქსიმ ფედინმა მსაჯის მიერ დამატებული დროის ბოლო წამზე გაიტანა გოლი, რომელმაც ყაზახებს გამარჯვება (1:0) მოუტანა და ცხადია, დღეს ფავორიტები სწორედ ისინი იქნებიან.

კუსტანაიში მატჩისწინა პრესკონფერენცია გაიმართა, სადაც დღევანდელ მატჩზე კომენტარი ორივე გუნდის მთავარმა მწვრთნელმა გააკეთა.

გია ცეცაძე ("სამტრედია"): "მინიმუმ, კარგ თამაშს ველოდებით და ვეცდებით, თამაში საჩვენოდ დავასრულოთ. რეალურად, ჩვენ სულ რაღაც 10 დღის შეკრებილი ახალი გუნდი გვყავს. შემადგენლობაში დიდი ცვლილებები არ იქნება, მაგრამ გარკვეული კორექტივები მოხდება. იყო ლეგიონერებზე სავიზო პრობლემა, რომელიც უკვე მოგვარდა. სიურპრიზები? ყველა გუნდს თავისი სიურპრიზები აქვს, მაგრამ ეს თამაშის დროს გამოჩნდება".

ვლადიმირ ნიკიტენკო ("ტობოლი"): "პირველი მატჩი თანაბარ ბრძოლაში მიმდინარეობდა. ბოლო წუთებში რამდენიმე მომენტი შევქმენით, გავიტანეთ და მოვიგეთ. თუმცა კიდევ 90 წუთია სათამაშო... ჩემი აზრით, მეტოქე თავს არ დაზოგავს, გამარჯვებისთვის იბრძოლებს და აქედან გამომდინარე, მძიმე დაპირისპირება გველის. თუმცა ვიმედოვნებ, პირველ საკვალიფიკაციო ეტაპს გადავლახავთ. შესაძლოა, ხვალ ახალწვეულები ვიხილოთ. თუმცა ევროკალენდართან ჩვენი შეუთავსებლობის გამო, ყველა მათგანი სასურველ ფიზიკურ ფორმაში ვერ არის".

მატჩი კუსტანაის ცენტრალურ სტადიონზე გაიმართება. წინასწარი ინფორმაციით, "სილქ თV" 17 საათიდან პირდაპირ რეპორტაჟს გეგმავს.

ყოველდღიური სპორტული გაზეთი "ლელო"
730
მკითხველის კომენტარები / 0 /
მსგავსი ამბები
რუბრიკის სხვა სიახლეები
;