ევროპალიგა. ფინალი: 'ატლეტიკო' მესამედ და სიმეონე მეორედ - ვრცელი მიმოხილვა [VIDEO]

მარსელი-ატლეტიკო 0:3
გოლები: 0:1 გრიზმანი (21), 0:2 გრიზმანი (49), 0:3 გაბი (89)

დიეგო სიმეონემ "ატლეტიკოსთან" ერთად მეორედ (სულ "ატლეტიკომ" - მესამედ) მოიგო ევროპალიგა. ამბობენ, სიმეონე "ჩაკეტილი" ფეხბურთის მიმდევარიაო. არადა, როგორი საქმეა - პირველ ფინალში მან 3:0 მოუგო "ბილბაოს" და ახლაც ამავე ანგარიშით დასცა ფრანგული "მარსელი". "ჩაკეტილი" ფეხბურთი უძახე შენ!..

...თამაშამდე ფავორიტად ესპანური კლუბი ითვლებოდა. დიეგო სიმეონეს ბიჭებმა საკუთარ თავს არ უღალატეს. ერთი შეხედვით, "მშრალი" ფეხბურთი კი ითამაშეს, მაგრამ კვლავ გამოავლინეს ჩვეული ზნე და მაქსიმალურად გამოიყენეს მოწინააღმდეგის კართან შექმნილი საგოლე მომენტები.

რა თქმა უნდა, გადამწყვეტ შეხვედრაში, რომელშიც "მარსელისთვის" სასწორზე არა მხოლოდ ტიტული, არამედ ჩემპიონთა ლიგის საგზურიც იდო (რადგან ლიგა 1-ში ეს პერსპექტივა სათუოდ გაიხადა), უფრო მეტს ველოდით. მოდი, რუდი გარსია იმით გავამართლოთ, რომ მას თავიდანვე გამოეცალა ხელიდან დიმიტრი პაიე. შევთანხმდეთ იმაზეც, რომ მისებრ ლიდერის თვისებებით აღჭურვილი ფეხბურთელი დღეს ბევრი არ არის მსოფლიოში და თითზე ჩამოსათვლელნი არიან ის მოთამაშეები, ვინც პაიეს ტექნიკური არსენალის მრავალფეროვნებაში დაეტოლება.

ცნობილია: თუ "ატლეტიკოს" დამარცხება გინდა, მაქსიმალურად უნდა მოერიდო გაუთვალისწინებელ შეცდომებს. არადა, "მარსელს" სწორედ ასე მოუვიდა: მეკარე სტივ მანდანდასა და მცველების შეუთანხმებელი მოქმედებით შესანიშნავად ისარგებლა ფრანგმა ანტუან გრიზმანმა, ვინც გაბის გადაცემით გახსნა ანგარიში. ძალიან დიდი მინუსი "მარსელის" დაცვას! - ამ ეპიზოდმა მნიშვნელოვნად განსაზღვრა თამაშის ბედი...

პირველ ტაიმში უფრო მწვავე "ატლეტიკოს" კონტრშეტევები იყო, ვიდრე "მარსელის" იერიშები, რომელსაც "იმიტაციას" დავარქმევდით. ფრანგები საკმაოდ დიდხანს აყოვნებდნენ ბურთს მოედნის ცენტრში და ეს საკმარისი იყო ესპანელი მცველებისთვის, რომ დროულად დაეჭირათ თადარიგი ფრანგთა შეტევების მოსაგერიებლად.

ფინალის ბედი მეორე ტაიმის დასაწყისში გადაწყდა. კოკეს გადაცემის შემდეგ მატჩის მთავარმა გმირმა, გრიზმანმა, მეორედ აიღო "მარსელის" კარი. ვინ იცის, ეს "პრინცისთვის" ბოლო შეხვედრაც კი იყოს მადრიდელთა მაისურით. ამბობენ, ის ძალიან მიუახლოვდა "ბარსელონასო"...

მესამე გოლი კი სრული ფორმალობა იყო და მეტი არაფერი. კოკეს შესანიშნავი გადაცემის შემდეგ გაბიმ საბოლოო ანგარიში დააფიქსირა. "მარსელს" კი, ასპროცენტიანი მომენტი რასაც ჰქვია, ერთადერთი ჰქონდა - კოსტას მიტროღლუს დარტყმის შემდეგ ბურთი ესპანელთა კარის ძელს მოხვდა.

ამრიგად, ევროპალიგის მთავარი ჯილდო მადრიდში წავიდა. ვნახოთ, 26 მაისს სად ინებებს წასვლას ჩემპიონთა ლიგის ტროფეი, როცა ფინალში ერთმანეთს "რეალი" და "ლივერპული" შეხვდებიან. არადა, ერთ-ერთი გზა ამ შემთხვევაშიც მადრიდისკენ მიდის...

"ძალიან ბედნიერები ვართ იმით, რაც მოხდა. ჩვენ ახლა ემოციების ზღვაში ვცურავთ", - თქვა თამაშის შემდეგ გრიზმანმა.

"ეს ჯილდო ჩვენ ერთად დავიმსახურეთ. ეს იყო მთელი სეზონის საზღაური. ამაყი ვარ ჩემი გუნდით, ჩემი ფეხბურთელებით, რომლებმაც ასე კარგად ითამაშეს", - აღნიშნა სიმეონემ.

ფაქტები

* "ბენფიკასთან" (1983, 2013, 2014) ერთად, "მარსელი" ის გუნდია, ვინც ყველაზე მეტჯერ (3 - 1999, 2004, 2018) წააგო უეფას თასი/ევროპალიგის ფინალი.

* ანტუან გრიზმანი პირველი ფრანგი ფეხბურთელია, ვინც თასი/ევროპალიგის ფინალში დუბლი შეასრულა.

* მადრიდის "ატლეტიკოს" შემადგენლობაში თავის ბოლო მატჩში ფერნანდო ტორესმა ამ გუნდში პირველი ტიტული მოიგო.

* 2013/14 წლების სეზონის შემდეგ ესპანურმა კლუბებმა 9 შესაძლებლიდან ჯამში 8 ევროტიტული მოიგეს. ერთადერთი გუნდი, რომელმაც 100-პროცენტიან მაჩვენებელს ხელი შეუშალა, "მანჩესტერ იუნაიტედი" იყო, რომელმაც ევროპალიგაში გასულ წელს გაიმარჯვა.

ყოველდღიური სპორტული გაზეთი "ლელო"
143
მკითხველის კომენტარები / 0 /
მსგავსი ამბები
რუბრიკის სხვა სიახლეები