ევროპალიგა. 1/18 ფინალი: საბამ მარიო დაკეტა - მოსკოვის "ლოკომოტივმა" ევროპაზე გაინავარდა [VIDEO]

ევროპალიგაზე ყველა მერვედფინალისტი გაირკვა. სასიხარულოა, რომ მათ შორისაა საქართველოს ეროვნული ნაკრების მცველი, საბა კვირკველია თავის "ლოკომოტივთან" ერთად.

იური სიომინის მიერ გაწვრთნილმა გუნდმა, პირველი მატჩის დარად, მეორე შეხვედრაც მოუგო "ნიცას", ამჯერად - 1:0. კვირკველიამ 90 წუთი ითამაშა. მას ძალიან ხშირად უწევდა თამაში მარიო ბალოტელის წინააღმდეგ და, უნდა ითქვას, ამოცანას თავი მშვენივრად გაართვა.

ტურნირს დაემშვიდობა ევროპის ერთ-ერთი გამორჩეული გუნდი "ნაპოლი". "ლაიპციგთან" პირველ შეხვედრაში მაურიციო სარის გუნდმა 1:3 წააგო. გერმანიაში სულ სხვა თამაში ვიხილეთ.

სერია A-ს ლიდერი მთელი შეხვედრის განმავლობაში უდიდეს უპირატესობას ფლობდა და საბოლოოდ 2 უპასუხო გოლის გატანაც მოახერხა, მაგრამ პიოტრ ზელინსკისა და ლორენცო ინსინიეს ჩაუქობა საბოლოო წარმატებისთვის საკმარისი არ აღმოჩნდა.

ევროპალიგას გამოეთიშა "ვილიარეალი". "ყვითელი წყალქვეშა ნავი" საშინაო ასპარეზზე ჩაიძირა. ესპანელებს იმედი ჰქონდათ, რომ "ლიონს" ორბურთიან ჩამორჩენას ამოუქაჩავდნენ, მაგრამ მასპინძლებმა არაერთი საგოლე შანსი გაანიავეს. ხაუმე კოსტას გაძევების შემდეგ "ლიონს" ხელ-ფეხი გაეხსნა და ნაბილ ფეკირმა ცარიელ კარში გაატანინა ბერტრან ტრაორეს.

დიდებული შოუ დადგა "ლაციომ", რომელმაც საშინაო შეხვედრაში ხუთჯერ აიღო "სტიაუას" კარი და ცხვირიდან ამოადინა პირველ მატჩში გამარჯვება. შესანიშნავად ითამაშა იტალიის ნაკრების შემტევმა ჩირო იმობილემ, ვინც სამჯერ დაამწუხრა რუმინელები.

გვიანი მატჩების უმრავლესობა სენსაციების გარეშე დასრულდა. ყველაზე თვალსასეირო შეხვედრა შედგა იტალიაში, სადაც "დორტმუნდმა" ბოლოსღა გამოგლიჯა მერვედფინალის საგზური "ატალანტას".

ჯანო ანანიძის გარეშე მოსკოვის "სპარტაკმა" მაგრად იბრძოლა ბასკთა ქვეყანაში. "სახალხო გუნდმა" კინაღამ დამატებით დროში გადაიყვანა თამაში. მატჩის წინ ტრაგედია დატრიალდა - ორივე გუნდის ფანებს შორის შეტაკებისას პოლიციელი დაიღუპა...

"არსენალმა", რომელსაც კვირას ინგლისის ლიგის თასის ფინალი უწევს "მანჩესტერ სიტისთან", შინ გადახალისებული შემადგენლობით წააგო (1:2) შვედურ "ოსტერსუნდსთან".

არადა, არსენ ვენგერის ბიჭებმა პირველ მატჩში მეტოქეს ბდღვირი ადინეს. ამჯერად, შვედები ორი ბურთით დაწინაურდნენ და თითქოს სასწაულიც მწიფდებოდა, მაგრამ მერე ლონდონურმა გრანდმა გამოიღვიძა და ერთი გოლი იკმარა სირცხვილის თავიდან ასაცილებლად.

კარგ ფორმაში მყოფმა "მილანმა" ფაბიო ბორინის ერთადერთი გოლით მეორე შეხვედრაც მოუგო "ლუდოგორეცს". ესეც ჯენარო გატუზოს გუნდის მორიგი გამარჯვება: ზედიზედ მეოთხე - ყველა ტურნირის ჩათვლით, ხოლო ბოლო ათიდან (აქაც ყველა ტურნირს ვგულისხმობთ) - მეშვიდე, თანაც მარცხის გარეშე.

ლოკომოტივი-ნიცა 1:0 (3:2)
გოლი: 1:0 დენისოვი (30)

ატლეტიკო-კოპენჰაგენი 1:0 (4:1)
გოლი: 1:0 გამეირო (7)

ლაციო-სტიაუა 5:1 (0:1)
გოლები: 1:0 იმობილე (7), 2:0 ბასტოსი (35), 3:0 იმობილე (43), 4:0 ანდერსონი (51), 5:0 იმობილე (71), 5:1 გნოერე (82)

პლზენი-პარტიზანი 2:0 (1:1)
გოლები: 1:0 კრმენჩიკი (67), 2:0 ჩერმაკი (90+4)

ლაიპციგი-ნაპოლი 0:2 (3:1)
გოლები: 0:1 ზელინსკი (33), 0:2 ინსინიე (86)

სპორტინგი-ასტანა 3:3 (3:1)
გოლები: 1:0 დოსტი (3), 1:1 ტომასოვი (37), 2:1 ფერნანდეში (53), 3:1 ფერნანდეში (63), 3:2 ტვუმასი (80), 3:3 შომკო (90+4)

ვილიარეალი-ლიონი 0:1 (1:3)
გოლი: 0:1 ტრაორე (85)
გაძევება: ხაუმე კოსტა (78. ვილიარეალი)

ენიტი-სელტიკი 3:0 (0:1)
გოლები: 1:0 ივანოვიჩი (8), 2:0 კუზიაევი (27), 3:0 კოკორინი (61)

მილანი-ლუდოგორეცი 1:0 (3:0)
გოლი: 1:0 ბორინი (21)

არსენალი-ოსტერსუნდსი 1:2 (3:0)
გოლები: 0:1 აიეში (22), 0:2 სემა (23), 1:2 კოლაშინაცი (47)

ატალანტა-დორტმუნდი 1:1 (2:3)
გოლები: 1:0 ტოლოი (11), 1:1 შმელცერი (83)

ბილბაო-სპარტაკი 1:2 (3:1)
გოლები: 0:1 ადრიანო (44), 1:1 ეჩეიტა (57), 1:2 მელგარეხო (85)

ბრაგა-მარსელი 1:0 (0:3)
გოლი: 1:0 ორტა (31)

ზალცბურგი-სოსიედადი 2:1 (2:2)
გოლები: 1:0 დაბური (10), 1:1 ნავასი (28), 2:1 ბერიშა (74-პენ)
გაძევება: ნავასი (71. სოსიედადი)

დინამო (კ)-აეკ 0:0 (1:1)

ყოველდღიური სპორტული გაზეთი "ლელო"
1504
მკითხველის კომენტარები / 0 /
მსგავსი ამბები
რუბრიკის სხვა სიახლეები
;